WALOMA 4:6-24

⁶Avo, vivija Daudi kozilonga motelo za munhu ayo Mulungu yampetile kamba kabule uzenzeleganye kutali na sang'hano.

⁷“Wamota waja udulu wao ugeligwe kumgongo, na awo wasegezelwe vilozo vao!

⁸Kamota munhu ija Mndewa yoleka kumpetela vilozo!”

⁹Motelo zino ha wanhu wengile kumbi weiyeka, ama vivija ha wanhu walekile kwingila kumbi? Tweye tulonga, “Nhamanila ya Ablahamu iyo imtendile yawe bule uzenzeleganye.”

¹⁰Kipigiti chaki mbuli ino imulawila Ablahamu? Viyakalile yang'hali hanakwingila kumbi ama viyeshile kwingila kumbi? Imulawila kipigiti hanakwingila kumbi, na siyo kipigiti viyeshile kwingila kumbi.

¹¹Heyo kabokela kilaguso cha kwingila kumbi kamba utango wa kuwa bule uzenzeleganye kuyakalile nao kubitila nhamanila kipigiti viyakalile yang'hali hanakwingila kumbi. Avo heyo iyo tata wa waja wose wotogola bila kwingila kumbi, giladi wapetigwe kamba wabule uzenzeleganye.

¹²Na heyo vivija iyo tata wa awo wengile kumbi, siyo awo wengile kumbi tu, ila awo vivija wotembela mkuiwinza nhamanila ija yaakalile nayo tata wetu Ablahamu kipigiti viyakalile hanakwingila kumbi.

¹³Kwavija kilagano Mulungu chayailagane na Ablahamu na lukolo lwake, kamba hewo wouhala ulumwengu, hakizile ha Ablahamu ama ha lukolo lwake kubitila Malagizo ga Musa, ila sama ya kuwa bule uzenzeleganye kwizile kubitila nhamanila.

¹⁴Kwavija kamba waja wogatamanila Malagizo ga Musa wao wahazi, nhamanila izabuka na ikilagano si kinhu.

¹⁵Kwavija Malagizo ga Musa gago gogala lusango lwa Mulungu. Ila hanhu halibule Malagizo ga Musa, haduhu udulu wa Gamalagizo.

¹⁶Avo, kilagano chokwiza kubitila nhamanila, giladi kilavigwe bule kamba nhunza ya Mulungu mwa lukolo lwose lwa Ablahamu. Siyo tu ha awo wogagoga Malagizo ga Musa, ila vivija ha awo wali na nhamanila kamba ya Ablahamu. Kwavija heyo iyo tata wa tweye tose.

¹⁷Kamba viyandikigwe Mzinyandiko Zing'alile, “Nikutenda gweye uwe tata wa isi bwando.” Kilagano hicho kinoga haulongozi wa Mulungu yaamtamanile, ayo yowagwelela ugima wanhu wadanganhike na kuvikema vinhu vilihaduhu viwe baho.

¹⁸Ablahamu katamanila mbuli hazidahike kutamanilwa, katogola kokwiza kugaluka tata wa isi bwando, na kawa avo kamba viyalongeligwe, “Avo kowa na wana bwando.”

¹⁹Nhamanila yake haihungule hata haja viyalugelegeze lukuli lwake mwenyego, lukalile behi na kudanganhika kwavija kakala na milao kamba mia, na vija viyamgelegeze Sala ayo yakalile bule sambo.

²⁰Haduhu kinhu chochose kimtendile yasinhe kukitogola kilagano cha Mulungu, ila kagendelela kuwa na mhiko mnhamanila yake kuno yomuyenzi Mulungu,

²¹yotogola kamba Mulungu kodaha kugatenda gaja gayailagane.

²²Avo, sama ya nhamanila yake, “Kapetigwa kuwa munhu yalibule uzenzeleganye.”

²³Ila mbuli ilonga, “Kapetigwa,” handikiligwe heyo yeiyeka,

²⁴ila vivija sama yetu tweye, tondatupetigwe kuwa wanhu walibule uzenzeleganye tweye tumtogole heyo yamzusile Yesu Mndewa wetu kulawa mkudanganhika.