Rom 4:6-24

⁶Nonova Davida ipuipupu taui ivi‑tau tunutunuhi Yaubada matana wayahi. Ka Davida ivona aituhu aviyaivia eha ipaipaisewa, kate aituhu taui ivi‑tau tunutunuhi Yaubada matana iuna tauna ana heta wayahina ivaniahei, akanai taui avaha nau‑iaiava ananina ivaniahei deina. Davida ivona,

⁷“Aituhu aviyaivia avaha nua‑piaha ivaniahei Yaubada wayahina, ka aituhu aviyaivia wayahi Yaubada avaha yai dewa goyona bwaei, akanai, taui avaha nau‑iaiava ananina ivaniahei deina!

⁸Aituhu aviyaivia wayahi Yaubada avaha yai dewa goyona nua‑pania, akanai, taui idewa‑haiawa ananina nau‑iaiavana wayahina!”

⁹Ka itomi me Iudea anau‑dadanemi vi‑tanai tupwai wayahina. Itoka me Iudea medeina? Kaiwadi, Yaubada ya nuanua nau‑iaiavaia vivane itoka me Iudea aka heta wayahika, iuna yaka aidaba mamaei? Avonemi eha. Yaubada ya nuanua kadu taui eha yai aidaba nau‑iaiavaia ivaniahei. Avaha kanuani, “Abaraham Yaubada vitumahanei. Wayahina, Yaubada awaehei vivane tauna tau tunutunuhina, eha aitam yana dewa goyona Yaubada matana deina.”

¹⁰Ka avi tuta Yaubada awaeha deina? Medeina? Naona Abaraham wagana dabei, e munia Yaubada yanꞌ awaeha vinꞌ‑omo tauna wayahina? O kadi naona Yaubada yanꞌ awaeha vinꞌ‑omo, e munia Abaraham wagana dabei?

¹¹Udu! Naona Yaubada awaehei Abaraham tau tunutunuhina tauna matana. Iuna Abaraham ya vitumahana mamaei. Ka munia Yaubada dewa‑dabadaba venei. Ka dewana vivane pai viwavenena ana heta Abaraham ya vitumahana wayahina. Ka kadu kana‑vona aidabana pai ainana deina. Ka pai ainana viwaveneka Abaraham avaha vi‑tau tunutunuhina Yaubada matana. Wayahina, aituhu aviyaivia Yaubada ivitumahanei, taui habuhabui amai vivane Abaraham. Aituhu aviyaivia eha yai aidaba, ka aituhu Yaubada ivitumahanei, akanai, taui amai vivane Abaraham.

¹²Ka kadu itoka yaka aidaba deina. Aituhu Yaubada kavitumahanei, ka kadu aituhu itoka yawaika Abaraham yawaina deina, tutana tauna Yaubada vitumahanei, akanai tauka amaka vivane Abaraham. Aituhu aviyaivia Yaubada ivitumahanei, Yaubada nꞌ‑awaehei taui tau tunutunuhi matana.

¹³Yaubada Abaraham vona‑dabedabei, ka Yaubada ivona deina, “Yauke nau‑iaiava avenem, ka apaina wanowanohim avenei deina, vivane tanopi habuhabuna evaniahei, aitam onoto amana yana gabu vaniahei deina.” Ka nau‑wawanika kanuani, vona‑dabadabana vinꞌ‑omo, kate Abaraham eha naona Yaubada ya veimea ta‑vi‑ateteye. Eha‑ohota. Vona‑dabadabana vinꞌ‑omo iuna naona Abaraham Yaubada yana vona vitumahanei.

¹⁴Eha Yaubada ya nuanua naona tomotau ya veimea ivi‑munie, e munia tauna nau‑iaiava vene. Aituhu Yaubada ya nuanua deina, akanai taui ivitumahanei yai vitumahana eha aitam aviani, ka kadu kana‑vona Yaubada ya vona‑dabadaba eha aitam aviani.

¹⁵Yaubada nua‑goyo yaka dewa goyona wayahi. Ka tauna ya nua‑goyo wayahina aka dewa‑yaiyai vinꞌ‑omo iuna itoka tauna ya veimea katana‑bwegebwegei. Ka udu! Aituhu veimeana eha, eha aka pata veimeana katana‑bwege.

¹⁶Wayahina, Yaubada nau‑iaiava wayahina vona‑dabadaba, ka itoka aka pata nau‑iaiavana kavaniahei vitumahana wayahina. Ka kadu kana‑vona nau‑iaiavana vinꞌ‑omo wayahikaia Yaubada yanꞌ am‑venena awawaehina wayahina. Ka nau‑wawanika kanꞌ‑anamanei Yaubada ya vona‑dabadabana boui tau vitumahana habuhabui wayahi. Eha itoka me Iudea aka heta Abaraham dayahina wayahina katupua. Kate aituhu aviyaivia Yaubada ivitumahanei, Abaraham deina, akanai kadu taui ai pata nau‑iaiavana ivaniahei.

¹⁷Ka Iginuma nihenina Yaubada ivona Abaraham wayahina deina, ivona, “Yauke yau nuanua wamke ininim wayahina tupua‑nenenehi habuhabui ivinꞌ‑omo, taui habuhabui ivi‑wahanim ‘Amau’.” Wayahina, Yaubada matana itoka tau vitumahana amaka vivane Abaraham, iuna Abaraham Yaubada vitumahanei. Ka Yaubada bagibagi‑vainena. Tauna tomotaui aninigai si‑vi‑mini‑havine yawayawai. Ka kadu dewaia eha aka pata kadudueye, tauna dewaia wayahi ipuipupu, kadu apa‑taputapuei, ka kadu vona‑dabadaba wayahi munia iomomo.

¹⁸Abaraham vona‑dabadabana vitumahanei. Kaiwadi, aituhu vona‑dabadabana kanononi, kava‑hamwahamwana, o kanuanua, “Eha ana pata dewana vinꞌ‑omo.” Kate Abaraham onoto tunina. Wayahina, tauna ya nua‑vaniaha nui potapota a itoava Yaubada ya vona‑dabadabana ya tupua‑nenenehi wayahi vaniahei wayahina. Iuna Yaubada avaha vona‑dabedabeyei, “Apaina wamke yam tupua‑nenenehi habu‑vainei imamaei, taui ai yau wadima ai yau deina.”

¹⁹Ka vona ahiahina, Abaraham avaha a ponimana 100 vaniahei, ka tauna avaha anamanei ininina ihanua, ka kadu avaha anamanei awana Sara gagana ka madina ihanua deina. Kate Abaraham ya vitumahana bagibagina eha ta‑ihanua.

²⁰Ka eha ta‑va‑hamwahamwana, kate tauna Yaubada ya vona‑dabadaba vitumahanei. Ika, ya vitumahana natanata, ka tauna ate‑vatu vaniahei, ka Yaubada didigana vo‑vi‑natei yana dewa wayahina deina.

²¹Iuna Abaraham vitumahanei vivane Yaubada ya vona‑dabadaba kadu ya bagibagi vivane aitamoata.

²²Wayahina, “Yaubada awaehei tauna tau tunutunuhina, eha aitam yana dewa goyona Yaubada matana deina.”

²³Yaubada tauna a tau apa‑taputapu awaehei tauna vonaia Iginuma nihenina ginumi, “Yaubada awaehei tauna tau tunutunuhina, eha aitam yana dewa goyona Yaubada matana deina.” Ka eha Yaubada ya nuanua Abaraham ana heta vonaia na‑nononi,

²⁴kate Yaubada ya nuanua aituhu aviyaivia ivitumahanei tauna avaha yaka Kauvea Iesu anigea si‑vi‑mini‑havinei, akanai taui nau‑wawani ivi‑tau tunutunuhi Yaubada matana aitamoata deina.