Romanos 3:9-30

⁹¿Bixen' ša? ¿Naquech chio' beṉe' Israel beṉe' güench ca beṉe' bi zjanac beṉe' Israel? Bi naccho ca'. Ba bzejni'ida' toz ca nac c̱he chio' beṉe' Israel len c̱he beṉe' bi zjanaque' beṉe' Israel, yogo'cho de xtoḻa'cho.

¹⁰Na' Xtiža' Diosen' nyojen žan: Nono zoa beṉe' zej to ḻicha, ṉe toe'.

¹¹Nono nḻa' beṉe' chejni'i cont gwzenague' c̱he Diosen', nono nḻa' beṉe' cheyiljue' ḻe'.

¹²Yogo' beṉac̱h ba zjanque'e nez mal. Yogüe' ba zjanaque' ca to da' bibi zaca'. Ṉe to nono zoa beṉe' chone' da' güen.

¹³Len xtiža'gaquen' chesex̱oayague' beṉe'. Ca zban chḻa' cho'a ba c̱he beṉe' guat še bi nyeyjon binḻo, ca' zban chḻa' xtiža'gaquen'. Na' ca venen c̱he beḻ znia nac xtiža'gaquen' da' cheso'e.

¹⁴Pur diža' mal diža' bya' že' cho'agaquen'.

¹⁵Con bize da' chosode'ede' cont chesote' beṉe'.

¹⁶Gate'teze chja'aque' zjanse'e yeḻa' yaše' yeḻa' zi' ca nac da' chesone'.

¹⁷Bi chesezoe' binḻo len ḻježe'.

¹⁸Bi chesežebe' Diosen' len bi da' mal chesone'.

¹⁹Na' ṉezecho Diosen' beṉe' chio' beṉe' Israel ley c̱hen'. Da'nan' ṉe tocho bi chac ṉacho bibi xtoḻa'cho de, ḻe bi choncho can' žanṉa'. Nachen' Diosen' že' si'cho castigw c̱he xtoḻa'chon', con can' že' c̱he yogo' beṉac̱h, ḻe yogüe' bi chesone' can' ža ley c̱hen'.

²⁰Bi ṉacho zoa beṉe' naque' beṉe' güen len Diosen' da' chone' yogo' da' ža leyna', ḻe notno chon ca'. Leyna' chlo'en chio' naccho beṉe' güen da' xiṉj.

²¹Na' ṉa'a Diosen' ba blo'e can' goncho cont gaccho beṉe' güen len ḻe', na' bich bi že' c̱he da' ca' ža leyna' cheyaḻa' goncho, san že' cheyaḻa' šejnilaže'cho Jesucriston' cont gaccho beṉe' güen len ḻe'. Doxen Xtiža' Diosen' dan' nyojen cani'te chzejni'in cheyaḻa' šejnilaže'cho Jesucriston' cont gaccho beṉe' güen. Na' toz can' chon Diosen' len yogo'ḻoḻ beṉac̱h.

²³Ḻe yogo'cho ba bencho da' xiṉj, na' ṉe tocho bi naccho beṉe' güen can' chaclaže' Diosen' gaccho.

²⁴Perw na' Diosen' nži'ilaže'de' chio', na' gague bi chzi'e par že' naccho beṉe' güen len ḻe', ḻe Cristo Jesúsen' ba bṉitlagüe' xtoḻa'chon'.

²⁵Diosen' gwseḻe' Jesucriston' bnežjw cuine' gosote'ne' ṉec̱he xtoḻa' beṉac̱h. Na' note'teze beṉe' yesejnilaže'ne' ṉitlao xtoḻa'gaque'. Diosen' gwseḻe'ne' cont nacbia' zeje' to ḻicha da' gwdape' yeḻa' chxenḻaže' bezi'xene' xtoḻa' beṉe' ca' gwnita' cani' beṉe' gosejnilaže'ne'.

²⁶Na' ḻecze gwseḻe'ne' cont nacbia' zeje' to ḻicha da' že' c̱he yogo' chio' chejnilaže'cho Jesúsen' naccho beṉe' güen.

²⁷Bi cheyaḻa' gonxen cuincho güe'cho diža' naccho beṉe' güen. Šaca' choncho doxen dan' ža ḻeyna' zaca' gonxen cuincho güe'cho diža' naccho beṉe' güen, perw nono chon can' ža leyna'. Con da' chejnilaže'cho Jesucriston', da'nan' zaca' cont yeyaccho beṉe' güen len Diosen'.

²⁸Can' naquen, note'tez beṉe' chejnilaže' Jesucriston', Diosen' že' naque' beṉe' güen len ḻe' da' chejnilaže'ne', gague lagüe dan' chone' can' ža ḻeyna'.

²⁹¿Chaquele Diosen' naque' Dios c̱he chio' naccho beṉe' Israel ngaze? Ḻecze naque' Dios c̱he beṉe' bi zjanac beṉe' Israel.

³⁰Ḻe toze Diosen' zoa na' ḻen' že' c̱he yogo'cho naccho beṉe' güen len ḻe' con še chejnilaže'cho Jesucriston', na' toz can' chone' len chio' zoacho señw dan' že' circuncisión na' len beṉe' cbi zjazoa señwna'.