Rome vene 3:9-30

⁹Ye makai una Jew vene bi buni iniye ba? Ide iniye iniye! Adina senagi nioteimarafa, Jew vene ma tutubena idana vene, ina vene tau vakoi bi vegu no di vava gabireri amededi.

¹⁰Bura reyo kana: “Amiye yokoi mokena rorobo nufa de, yokoi de iniye iniye;

¹¹yokoi de yaku vegu buni diba nido, ma yokoi de Sei maina redo.

¹²Ina tau vanu gedu maradi; tau vakoi rei tavoi reyadi; yokoi maka yaku buni de redo, yokoi de iniye iniye.

¹³Ago ninari ini vena sau bi amiye guri ruba fafa rina de kana; ini afiye dudu eru rededi, gadeva aruma di gemiso no bi ini venari.

¹⁴Kiraini ma ago ru yaku ini vena vata baeyadi.

¹⁵Ini yuka dudu bi evade raga resi dava rausi regika;

¹⁶moi kekevata una ma moi no rena bi ini dina idari amededi.

¹⁷Ma uka amuta di ida bi diba de niyadi.

¹⁸Ini nemokori ka bi Sei ori de rededi.”

¹⁹Gua una diba beika ago gira yaku nido, bi kaere ago gira di vava gabireri amedo ina rofu nido, ye vena biri risi ago nina de, ma kono tora noibanu di vene tau bi Sei di nemokori ini vegu dada kota regi are reyaganedi.

²⁰Adina ini nemokori ago gira usi dina dudu, amiye yokoi bi vegu rorobo de nigo, ago gira dudu vegu no neide mama rego dada.

²¹Idu gua Sei di mokena rorobo bi ago gira etofarori moi ogau riyo, adina ago gira ma Sei di ago niyadi vene di ago ina rofu ninegau rededi.

²²Sei yaku amiye di mokena vari gira Iesu Keriso rofu aena dudu amiye moi rorobo rido; mina bi amiye tau gade rofu, kaere mokena vari gira aededi. Adina bi idana de:

²³mina bi amiye tau gade yaku vegu no resi Sei di vabara moina, bi ne tumuri keto reyadi.

²⁴Ye davana de nufa, beika buni tora gade maro dudu vegu rorobo niyadi; mina bi Iesu Keriso yaku voi resi erufuyo.

²⁵Ina bi kaere Sei yaku ini dava dudu, vegu no di obini voi regi ori sisika kana aeyo. Ye mokena vari gira aenari moigedi; ma makai reyo, Sei di mokena rorobo oteimagi, ini toro renari sena reyadi vegu no moi tai reyo dada.

²⁶Makai Sei yaku gua ini mokena rorobo oteimaro, ye makai bi rama ma kaere Iesu rofu mokena vari gira aego, ina rofu nigo ini vegu bi rorobo.

²⁷Mina dada uni nivasena rena bi beika? Bi de iniye. Ago gira neidesi nivasena reyafa, makai mokena rorobo moiyafa ba? Ide, bi mokena vari gira aena dudu maka mokena rorobo moisifa.

²⁸Adina amiye yokoi mokena vari gira aena dudu maka, bi vegu rorobo nigo mina mokesifa, ma ago gira di reremama dudu bi de.

²⁹Ye Sei bi Jew vene di Sei maka ba? Ye ina ka bi tutubena idana vene di Sei ide ba? Yo, ina ka bi tutubena idana vene di Sei,

³⁰adina Sei bi yokoi maka dada. Ye roaita nugana vene ini mokena vari gira aena dudu vegu rorobo nisi roaita nugana de vene mokena vari gira aena dudu ka vegu rorobo nigo.