Walumi 3:9-30

⁹Sambi tulonge choni? Vino tweye Wayahudi tunoga kubanza wanhu haweli Wayahudi? Bule, nimala kuwalongela kuwa Wayahudi na wanhu haweli Wayahudi wose wotawaligwa na nzambi.

¹⁰Kamba Maandiko Gang'alile vigalonga, “Kuduhu hata munhu imoja yanogile mgameso ga Mulungu,

¹¹kuduhu munhu yeli na nzewele hebu yomzahila Mulungu.

¹²Wanhu wose wamuleka Mulungu, wose wotenda gehile, kuduhu munhu yotenda ganogile, kuduhu hata imoja.

¹³Mitundu melo yao iigala na mapanga hagafukiligwe milimi yao yolonga uvizi, na mumilomo yao zolawa mbuli zili na sumu iigalile na sumu ya mgendela hasi,

¹⁴ulonzi wao umema kuduila kugela usungu.

¹⁵Hawakawa kukoma.

¹⁶Kokose kuwochola wohabananga na kuhananga.

¹⁷Hawajuwile kukala kwa tindiwalo,

¹⁸hawamdumba Mulungu.”

¹⁹Sambi tojuwa kuwa Malagizo ga Mulungu gahalonga, golonga kwa wanhu wose wolongozigwa na Malagizo, muladi wanhu sekewaigombele, na wanhu wose wa mwiisi watagusigwe na Mulungu.

²⁰Kwavija kuduhu munhu yotendigwa kanoga mgameso ga Mulungu kwa kutenda gaja golondigwa na Malagizo, ila Malagizo ga Mulungu gotutenda tweye tujuwe totenda nzambi.

²¹Lakini sambi nzila ya Mulungu ya kuwatenda wanhu wanoge mgameso gake igubuligwa. Haitendeka kwa Malagizo ga Musa, hamoja Malagizo ga Musa na watula ndagu wa Mulungu wolonga mbuli ayo.

²²Mulungu kowatenda wanhu wanoge mgameso gake kubitila tamanilo jao kwa Yesu Kilisito. Mulungu kotenda avo kwa wanhu wose womtogola Kilisito, kwavija wose waigala.

²³Wanhu wose watenda nzambi na wahungukilwa na ukulu wa Mulungu.

²⁴Lakini kwa nhunza ya ng'hekewa ya Mulungu, wanhu wose wotendigwa wanoga na Mulungu kubitila Yesu Kilisito, yowalekesa.

²⁵Mulungu kamulava Yesu muladi kwa damu yake, yazigele kumgongo nzambi za wanhu kwa kumtamanila heyo. Katenda avo kulagusa viyotenda ganogile kwa wanhu, kwavija baho umwaka kafunga umoyo na hawataguse bule.

²⁶Katenda avo kulagusa viyanogile kwa wanhu mna ikipindi cha sambi na komtenda munhu yoyose yomtogola Yesu yanoge mgameso gake.

²⁷Lelo toigodela choni? Kuduhu! Choni kilamuso cha mbuli ino? Kwavija togagoga Malagizo ga Mulungu? Bule, lakini kwavija totogola.

²⁸Kwavija Mulungu komtenda munhu yanoge mgameso gake kwa kumtamanila kwiiyeka, na siyo kwa kutenda gaja golondigwa na Malagizo.

²⁹Vino Mulungu ni Mulungu wa Wayahudi waiyeka? Vino vivija heli Mulungu wa wanhu haweli Wayahudi? Ona, vivija Mulungu wa wanhu haweli Wayahudi.

³⁰Mulungu ni imoja, na kowatenda awo wengile kumbi wanoge mgameso gake kwa kumtamanila, vivija kowatenda awo hawengile kumbi wanoge mgameso gake kwa kumtamanila.