Romanos 15

1

2

3

4

5

6

7

8

9

10

11

12

13

14

15

16

¹Baḻcho ba zoac̱hac̱hcho chejnilaže'cho Criston' na' ṉezecho de latje ye'ej gagwcho bite'teze. Perw cheyaḻa' gapcho yeḻa' chxenḻaže' len beṉe' biṉa' yesejni'išagüe'de', na' bi goncho con da' žan c̱hecho.

²To tocho cheyaḻa' goncho bi da' güen da' chazlaže' beṉe' ḻježcho ca' goncho, cont gaclenen ḻegaque' yesejnilaže'che' Diosen'.

³Goncho ca', ḻe ṉe Criston' bi bene' con da' gwnazen c̱he', san goc c̱he' can' nyoj Xtiža' Diosen', žan gože' X̱e' Diosen': “Beṉe' besegue'ede' le' na' goseṉe' diža' bya' c̱hio', lencze c̱hia' neda' goseṉe'.”

⁴Na' Xtiža' Diosen' da' bosozoj beṉe' cani' chzejni'in chio' cont gwyo gwc̱hejcho šejnilaže'cho Diosen' cate' chzaca'zi'cho. Na' še goncho xbab can' žanṉa', na' gaclenchen chio' cont soacho lez gwžin ža gon Diosen' güen len chio'.

⁵Diosen' choṉe' chio' yeḻa' chxenḻaže' cont chyo chc̱hejcho cate' chzaca'zi'cho. Na' chṉablaža' ḻecze gone' gac yic̱hjlažda'ole toze tole yetole, con can' chazlaže' Cristo Jesúsen'.

⁶Na' gone' ca' cont toze can' ṉale gonxenḻe Dios ben' nac X̱a X̱ancho Jesucriston'.

⁷Da'nan' cheyaḻa' le'e to to beṉe' ḻježcho binḻo ca Criston' chle'ede' to to chio' binḻo, chio' chejnilaže'chone'. Goncho ca' cont gacxen Diosen'.

⁸Can' goc len Cristo Jesúsen', bzex̱jw yic̱hje' ben cuine' ca to beṉe' güen žin cont goclene' neto' beṉe' Israel. Blo'ede' diža' ḻi be' Diosen' cate' gože' da' x̱ozxta'oto' ca' gone' güen len ḻegaque'.

⁹Na' ḻecze bid Criston' cont le'e bi nacle beṉe' Israel ḻecze gonxenḻe Diosen' da' ba beyaše'laže'de' le'e. Chac ca nyoj Xtiža' Diosen' dan' žan: Da'nan' gua' yeḻa' chox̱clen c̱hio' gan' že beṉe' bi zjanac beṉe' Israel, goḻa' gonxena' le'.

¹⁰Na' ga yoble žan: Le'e bi nacle beṉe' Israel, ḻe yebe txen len neto' beṉe' gwlej Diosen' nacto' nación c̱he'.

¹¹Na' ḻecze žan: Yogo' le'e bi nacle beṉe' Israel, ḻe gonxen X̱ancho Diosen'. Yogo'ḻoḻle ḻe güe' diža' c̱he yeḻa' gwnabia' c̱he'.

¹²Na' da' Isaías ben' be' xtiža' Diosen' cani' bzoje' da' nga žan: To beṉe' gualaž yide', beṉe' galje' ḻo diaža c̱he da' Isaí. Ḻe' ṉabi'e beṉe' že' to to yež na' to to nación, na' beṉe' ca' bi zjanac beṉe' Israel yesebeze' gaclene' ḻegaque'.

¹³Diosen' chone' cont chebecho dan' ṉezecho šjayzoacho len ḻe'. Na' chṉaba' gonšque' cont soale mbalaz juisyw na' soa cuezle binḻo len xbab da' yo'o yic̱hjlažda'olen' da' zoale chejnilaže'le Criston'. Gonšque' ca' cont Spiritw c̱he Diosen' gaclenen le'e soac̱hac̱hle yebele da' ṉezele šjayzoale len ḻe'.

¹⁴Beṉe' migw, ṉezda' ba nacle beṉe' šagüe' beṉe' chon da' güen, na' ṉezda' chejni'ichgüele na' chac chṉeyoe ḻježle.

¹⁵Pero ḻe'e cart nga ba beyaxjda' gwdiḻa' le'e cont gonchle xbab, ḻe Diosen' beži'ilaže'de' neda' gwleje' neda'.

¹⁶Gwleje' neda' cont chyix̱jue'eda' xtižen' len beṉe' bi zjanac beṉe' Israel. Na' Diosen' yebede' da' ba goclena' ḻegaque' cont baḻe' gosejḻe'e xtižen' na' gosaque' ḻo ne'e cate' Spiritw c̱hen' benen lažda'ogaquen' xilaže'.

¹⁷Chbeda' chona' xšin Diosen' da' ba goclen Cristo Jesúsen' neda' chona'.

¹⁸Bi cheyaxjda' gua' diža' c̱he bi da' ba ben beṉe' yoble, san choa' diža' c̱he da' ba ben Criston', ḻe chaclene' neda' choa' xtižen' na' bichle da' chona' cont zan beṉe' ca' bi zjanac beṉe' Israel chosozenague' c̱he'.

¹⁹Spiritw c̱he Diosen' goclenen neda' cont bena' yeḻa' guac na' bichle da' besyebane beṉe' gate'teze gwya'a be'lena' ḻegaque' xtiža' Diosen', gwzolagua' Jerusalén na' bžintia' gan' nzi' Ilírico. Na' ba gwdix̱jue'eda' xtižen' doxen gan' gwseḻe' neda'.

²⁰Na' ba bena' byen ba bia' diža' güen da' chzejni'in c̱he Criston' gan' nono ṉa' šejnilaže'ne', ḻe bi chaclaža' tia' gwḻana' xḻatje beṉe' ba chosozejni'ide' xtiža' Diosen'.

²¹Da'nan' chac can' nyoj Xtiža' Diosen' žan: Beṉe' ca' biṉa' yesende' xtižen' yesombi'ene', na' beṉe' ca' biṉa' yeseṉezde' c̱he' yesejni'ide' c̱he'.

²²Da' chzejni'ida' beṉe' ga yoble xtiža' Criston', da'nan' bi goc yida' gan' zoalen' ḻa'czḻa' zan ṉi'a ba goclaža' yida'.

²³Cana'te zelaža' yedeṉa'a le'e, perw ṉa'ach ba beyož bena' da' gwlo'o Diosen' ḻo na' gona' do nga.

²⁴Nach cate' ša'a España cana' chacda' tia' yedeṉa'a le'e. Na' mbalaz soa' yeyož le'eda' le'e na' gaclenḻe neda' cate' ša'a Españan'.

²⁵Ṉa'a ša'a Jerusalén šjasana' mechw da' gaclenen beṉe' ḻježcho ca' že' na' beṉe' ca' ba gwlej Diosen' chesejnilaže'ne'.

²⁶Ḻe beṉe' ḻježchon' že' yež ca' zjachi' distritw Macedonia na' Acayan' bosotobe' mechw da' gaclenen beṉe' ḻježcho ca' chesejnilaže' Diosen' Jerusalén ben' zjanac beṉe' yaše'.

²⁷Beṉe' ca' bosotoben' besyebede' bosonežjue' mechon', na' naquen to goclen da' cheyaḻa' yesone' len beṉe' Israel gualaž c̱heto' ca', ḻe ḻa'czḻa' ḻegaque' bi zjanaque' beṉe' Israel, ba zjanone' c̱hegaque' yogo' da' güen da' ba bzejni'i Diosen' neto' beṉe' Israel, na' da'nan' cheyaḻa'cze yesaclene' beṉe' gualaž c̱heto' ca' len da' cheseyažjde'.

²⁸Cate' bac̱h beyož bena' ḻo na' beṉe' Jerusalén ca' mechon' bdoben', cana'ch sa'a ša'a Españan' na' tia' ṉa'a le'e.

²⁹Na' ṉezda' Criston' gaclene' neda' la'a gan' zoalen' cont güe'lena' le'e diža' güen c̱he' da' gaclenen yic̱hjlažda'olen' na' soachguacho mba.

³⁰Beṉe' migw, ṉezda' chaquele X̱ancho Jesucriston' can' chacda'ne' neda', na' Spiritw c̱he Diosen' chonen cont chaque ḻježcho tocho yetocho. Da'nan', beṉe' migw, chṉaba' gacle neda' txen yoḻ güižcho Diosen' cont gaclene' neda'.

³¹Ṉabechone' bi gaca' ḻo na' beṉe' gualaž c̱heto' ca' beṉe' bi chesejnilaže' Criston' Judean', na' ḻecze ṉabechone' cont beṉe' ḻježcho ca' že' Jerusalén beṉe' yo'o ḻo na' Diosen' yesazlaže' ca dan' güe'gaca'ne'.

³²Nach še Diosen' goṉe' latje, mbalaz yedeṉa'a le'e na' yeyaclaža' soa' na' len le'e.

³³Dios ben' chon chzoa chbezcho binḻo len xbab da' yo'o ḻo' yic̱hjlažda'ochon' gaclene' yogo'le len xbab c̱helen'. Ca'šcacze gac.