Rom 3:9-30

⁹Iwe, ifa usun kich chon Juta, sia mürina seni ekewe chon lükün Israel? Apwi! Esap fokun ina! Üa fen pwärätä pwe chon Juta me chon lükün Israel ra wewefengen, ir meinisin ra nonom fän nemenien tipis.

¹⁰Usun ekewe Toropwe mi Pin ra apasa: “Esap fokun wor eman chon pwüng.

¹¹Esap wor eman mi mirit, esap wor eman mi kütta Kot.

¹²Ir meinisin ra kul seni Kot, ir meinisin ra tokola. Esap fokun wor eman a föri mine a pwüng, esap fokun wor eman.

¹³Ar kewe kapas ra uren atuputup mi afeiengau. Kapas chofona a towu seni chönawer, pwal kapasen eniweniw mi usun chök poisonun serepenit ra towu seni tinawer.

¹⁴Ar kapas a ur ren ottek.

¹⁵Ra müttir ngeni ar afeiengaua o niela aramas.

¹⁶Ra afisätä tatakis me feiengau ekis meinisin ia ra feila ie.

¹⁷Resap silei met repwe föri, pwe repwe eäni kinamwe ngeni aramas,

¹⁸resap pwal silei ar repwe niuokusiti Kot.”

¹⁹Iei sia silei pwe meinisin mine a mak lon ekewe Allük a fän iten chokewe mi nom fän ekewe Allük pwe epwe aükätiu än aramas meinisin künetipingen o atolonga unusen fanüfan fän än Kot kapwüng.

²⁰Pun esap wor eman aramas epwe küna pwüng ren an apwönüetä pwüngün ekewe Allük. Nge mine ekewe Allük ra föri, ra aiti ngeni aramas pwe ra tipis.

²¹Nge iei a pwäla mine Kot a föri pwe aramas repwe küna pwüng me ren. Ei esap fis ren ekewe allük, inamwo ika än Moses kewe Allük me än ekewe soufos kapas ra pwäräta usun.

²²Kot a föri pwe aramas ra küna pwüng ren ar lükü Jesus Kraist. Kot a föri ei ngeni chokewe meinisin mi lükü Kraist, pun esap wor sokofesenin lefiler meinisin:

²³Pun aramas meinisin ra tipis, ra pwal osun lingen Kot.

²⁴Nge ren än Kot we lifangen ümöümöch esap kamö, aramas meinisin ra küna pwüng ren Kraist, ewe mi angaseerela.

²⁵Kot a fangala Kraist, pwe ren an mäla a fis amusamusen än aramas tipis ren chaan pokiten ar lükü i. Kot a föri ei an epwe pwärätä pwe i a pwüng, pun lon an mosonotam esap apwüngü än ekewe aramas tipis ra föri me mwan.

²⁶Nge ikenai Kot a föri och fän iten än aramas tipis, pwe epwe pwärala an pwüng. Ren ei Kot a pwäräta pwe püsin i a pwüng, a pwal föri pwe ir mi lükü Jesus repwe küna pwüng.

²⁷Iwe, met sia tongeni aingaing won? Esor! Met popun pwe a iei usun? Pokiten sia aleasochisi ekewe Allük? Apwi, nge sia lükü.

²⁸Pun sia silei pwe eman a küna pwüng me ren Kot ren an chök lükü, sap ren an apwönüetä pwüngün ekewe Allük.

²⁹Are ifa usun, Kot än chök ekewe chon Juta Kot? Esap pwal i än ekewe chon lükün Israel Kot? Ewer, pwal i ar Kot.

³⁰Kot eman chök, i epwe föri pwe ekewe chon Juta repwe küna pwüng pokiten ar lükülük, i epwe pwal föri pwe ekewe chon lükün Israel repwe küna pwüng ren ar lükülük.