Romanos 3:9-30

⁹Trube, treeg købene, ¿nam judíosmerabe katøguchi tabelø købra chindah? ¡Kah! mumaygucha chi treeg kømøn. Kaguende: “Judíosmeran lata, judíos kømeelan lata, kaibe mayeelanba nø karub tøga pasran” cha. Yandø nambe: “Treeg køn” cha chab trendaig kuig køn.

¹⁰Tiuswei wamwan pørigu maig taimbala: “Sølgandø tabiibe ni kan kandøguen mu kawei,

¹¹maig kuigwan chi chibig kui mørtrabig muguen kawei, Tiuswan isub lanrrabiibe muguen kawein køn cha.

¹²Mayeeløba peeburabgøba amba, møitøgucha chi martrabgaig kailø misrin køn cha. Tabig marøbiibe muguen kaagøn cha, ni kan kandøguen mu kaagøn cha.

¹³Nømui mørambe kan kwaig sørin trabwan kura pasri lataig køben, nømui niløtøgabe may wamincha, isa kegørrøsrkøbelø køn. Nømui trikkalusyube ulmerai venenon muga latailø, treelø køn cha.

¹⁴Katø nømui trigube kaig nebunrrai trømbø wamamibah, larrø pusrkwanrraptiig wamamig møbgølig lataibatø netsailø køn cha.

¹⁵Nømbe kweechib, ani lushib luløb pønrramig srøbmerabe unchaguen tøgar køn cha.

¹⁶Nømui amønailøbe purø isumdiig kørrømisra waramig kønrraimba, chugurringuen kømuielø isuig kørrømisra waramig kønrraimba, treeg marøbelø køn cha.

¹⁷Ambumay imay tab amønamigwane ashmø misaamera køn cha.

¹⁸Nømbe Tiuswan kørig tøgagømigwane ni managuen isumeelø, treelø køn” cha, trenchibig køn.

¹⁹Pøs nambe ashibelø ker, tru maig maramigwan martrai Moisés pøriibe tru pørig maig chiben truigwan marøb melabelaimburab waminchibig kui, mumeratøgucha chi chinchab kaima pønrramig kønrraimba, katø Tiuswei merrab pirau maya misaamera kerriguba nømui chi mariilan eshkab pønrramig kønrraimba.

²⁰Kaguende tru maig maramigwan martrai Moisés pørig maig chibig køben trunun marikkurri Tiuswei merrab chi kaig marmíig lataig munguen tabig kørrømarig kønrraamøn. Treeg kømøtø, tru pøriibe nambe kaig marøbelø kui trunun kenamarøb pasran.

²¹Inchen møimbe tru chi kaig marmeelø lataig tabig kørrømisra pønrramig kønrrai marøbig Tiuswei yandø kenamisrin køn, tru maig maramigwan martrai Moisés pøriiba chi asamikkaig, Tius maig karuigwan tru eshkabeløba, katø tru maig maramigwan martrai Moisés pøriguba, tru truigweimburab maig wamindig køben, treeg.

²²Iig tru chi kaig marmeelø lataig tabig kørrømisra pønrramig kønrrai marig Tiusweimbe, isubigwan Jesucristoinug pasra pønrraikkurri arrubig køn mayeelø nun kørebelaimbe, mungucha nøørø marøb kandarøtø inchimø.

²³Kaguende mayeeløba kaig mara, Tiuswei tørguegwalmabigwane chincha nebumøn.

²⁴Incha tru chi kailø kømeelø lataig tabig pønrramig keta traniibe Tius ka yandø tab indikkurrin køn, Cristo Jesúskurri Tiusweyelø kønrrai wesruilø kuikkurri.

²⁵Tiusbe Cristone kan animal kweecha tranøb lataitøwei marig køn, Cristoi ani lusinug nømui isubigwan pasrikkurri misag kaig mariilan Tius ulø paymumig kønrrai. Øyeeg marøppe, Tius nui tru sølgandø tabigwan ashchai kenamaran, kaguende tammay muniirabig køptø, tru merrabwan kaig mariilane chi ulø paymønrrab pesannawa.

²⁶Nøbe øyeeg marøppe, tru møi øyan kwaløm nui sølgandø tabigwan kenamartrab indig køn. Katø nøbe isubigwan Jesúsweinug pasrøbigwane chi kaig kømíig lataig tabig kørrømisrtrai marøbig køn.

²⁷Trube, treeg købene, ¿chiyu møg inchib pønrrønrrerah? Pøs treeg indamibe yandø patsan. Trube, ¿trunune mumay martrai pasriitøga patsøga pasrah? ¿Chigøben tabig mariiløtøga kønrrab kø chindah? Kah, treeg kømøtø, truibe isubigwan Cristoinug pasrtrai indiitøga patsøgan.

²⁸Pøs nambe øyamay køn chibrren pønrrer, tru chi kaig kømíig lataig tabig pasramibe isubigwan Cristoinug pasra tøgagúikkurrin køn cha, tru maig maramigwan martrai pørigu truilan mariiløgurrin kønrrab kømøtø.

²⁹¿Kabe Tiusbe judíosmerayasiitø Tius kønrrab kø chindah? ¿Nøbe judíos kømø misaameraingucha Tius kømuitarru? ¡Pøs yamba treegwein kømuitarru! Judíos kømø misaameraingucha nøbe Tius køn.

³⁰Kaguende Tiusbe nøtø kandø køn, isubigwan nuinug pasrikkurri judíosmera, tru asru circuncidawarmeran chi kailø kømeelø lataig tabig pønrramig marøb, katø judíos kømeelø, tru asru circuncidawa kømeelangucha nømui isubigwan nuinug pasrikkurri chi kaig kømeelø lataig tabig pønrramig marøb inchibig.