Romanos 6

1

2

3

4

5

6

7

8

9

10

11

12

13

14

15

16

¹¿Nacxen' cheyaḻa' goncho ṉa'a ba ṉezecho nži'ilaže' Diosen' chio'? ¿Gonchcho da' malen' cont yezi'xenchcze Diosen' c̱he chio'?

²Gague can' goncho. Cate' gwzolao chejnilaže'cho Criston' bich goclaže'cho ṉabia' da' malen' chio'. Da'nan' guac ṉacho ba gotcho len da' xiṉjen cont bich gonchon.

³¿Bi chacbe'ele can' zejen da' gwzoacho nis? Zejen da' chejnilaže'cho Jesucriston' ben' got ṉec̱he chio', bac̱h naccho ca to beṉe' guat len da' xiṉjen' cont bich gonchon.

⁴Na' dan' gwzoacho nis ḻecze guac ṉacho bgaše'cho can' bosocuaše' Criston'. Na' con can' bec̱his bosban X̱ancho Diosen' Criston' ladjo beṉe' guaten' len yeḻa' guac xen c̱he', ca'czen' bene' len chio', ba bocobe' yic̱hjlažda'ochon' cont soa cuezcho goncho da' güen.

⁵Na' can' žacho ba gotcho len da' xiṉjen' dan' chejnilaže'cho Criston', ḻecze guac ṉacho bec̱his bosban Diosen' chio' can' bec̱his bosbane' Criston', ḻe ba bocobe' yic̱hjlažda'ochon'.

⁶Cana' ṉe' chnabia' da' malen' chio' len yogo' da' choncho. perw ṉa'a da' chejnilaže'cho Criston' ben' got ṉec̱he chio', ba none' chio' ca to beṉe' guat len da' xiṉjen' cont bich gonchon na' cont da' mal dan' yo'o ḻo' yic̱hjlažda'ochon' bich soan ṉabian' chio'.

⁷Beṉe' ba got bich zoe' chone' da' xiṉj, na' ca' nacczen len chio' chejnilaže'cho Criston', bich che'necho ṉabia' da' malen' chio' na' bich zoacho chzenagcho c̱hen. Na' chejḻe'cho gone' cont soacho bancho len ḻe' ṉa'a na' toḻi tocaṉe.

⁹Na' ṉezecho Criston' beyas bebane' ladjo beṉe' guaten' na' gwbat gate' da' yoble ḻe bich soe yeḻa' goten' ḻe'.

¹⁰Na' cate' gosote' Criston', tṉi'aze bnežjw yeḻa' mban c̱he' ṉec̱he xtoḻa'chon'. Bich chyažjen gwnežjw cuine' da' yoble, san ba zoalene' Diosen' chone' con bi da' chazlaže' Diosen'.

¹¹Nach dan' gote' ṉec̱he xtoḻa'chon', cheyaḻa' soacho goncho cont da' mal dan' yo'o ḻo' yic̱hjlažda'ochon' bic̱h ṉabian' chio', na' cheyaḻa' soacho txen len X̱ancho Jesucriston' cont goncho dan' chazlaže' Diosen'.

¹²Da'nan' bi güe'cho latje ṉabia' da' malen' cuerp c̱hechon' dan' nac da' gat na' goncho bi da' xiṉj da' selažen'.

¹³Bi cheyaḻa' gon cuincho ḻo na' da' gwxiyen' cont goncho da' mal len cuerp c̱hechon'. Cheyaḻa' gon cuincho ḻo na' Diosen' cont goncho da' güen. Guac ṉacho Diosen' bec̱his bosbane' chio' ladjo beṉe' guaten' da' bocobe' yic̱hjlažda'ochon'.

¹⁴Bich ṉabia' da' malen' chio', ḻe ṉezecho Diosen' chbede' chio' gague ṉec̱he da' choncho can' ža ley dan' bzoj da' Moisés, san dan' naque' beṉe' šagüe'.

¹⁵¿Gontezcho da' xiṉjen' da' ṉezecho nži'i Diosen' chio' na' ṉezecho bi chone' cuent še ba bencho da' ža leyna' cheyaḻa' goncho? Bitw goncho ca'.

¹⁶Ṉezecho še ba chzenagcho c̱he to beṉe' cont goncho bite'tez že', choe'cho latje chnabi'e chio'. Na' ca'cze naquen len chio' še chzenagcho c̱he da' malen' na' chontezchon, ba chnabia' da' malen' chio' še ca'; na' bi gac šjayzoalencho Diosen' toḻi tocaṉe še ca' choncho. San še zoacho chzenagcho c̱he Diosen', nachen' zejczcho choncho da' güen na' šjayzoalencho Diosen' toḻi tocaṉe.

¹⁷Na' choa' yeḻa' chox̱clen c̱he Diosen' ṉa'a ba chzenagle do yic̱hj do laže'le xtiža' Diosen' da' ba bzejni'ito' le'e, na' bich chzenagle c̱he da' malen' can' benḻe cana'.

¹⁸Diosen' ba bebeje' le'e ḻo' da' malen' na' ba ben cuinḻe ḻo ne'en cont soale gonḻe da' güen.

¹⁹Ba bzejni'ida' le'e bia' diža' c̱he bi da' chac c̱he chio' beṉac̱h cont šejni'ile. Nachen' chnia' le'e, con can' gwzoale bentezle da' nac da' yeḻa' zto' len cuerp c̱helen', na' benchguale da' malen', ḻecze can' cheyaḻa' gon cuinḻe ḻo na' Diosen' gonḻe da' güen cont c̱hazlaže' Diosen' can' chonḻen'.

²⁰Caten' ṉe' zejcho choncho da' malen' bi chzenagcho c̱he Diosen' ṉeca choncho da' güen.

²¹Na' bibi banez ṉa' le'echo c̱he da' mal ca' ba bencho, san ṉa'a ba cheto'echo c̱hen. Beṉe' ca' ṉe' chesonteze' da' malen' gata' castigw c̱hegaque' toḻi tocaṉe.

²²Na' chio', Diosen' ba bebeje' chio' ḻo da' malen' na' yo'ocho ḻo ne'ena'. Da'nan' zejech choncho da' güen can' chazlaže' Diosen' na' šjayzoacho len ḻe' toḻi tocaṉe.

²³Še zoacho choncho da' xiṉjen', gata' castigw c̱hecho toḻi tocaṉe cate' gatcho. San Diosen' choṉdadze' chio' to da' güen juisyw, chio' chejnilaže'cho X̱ancho Jesucriston', chone' cont šjayzoacho len Diosen' toḻi tocaṉe.