Rom 3:9-30

⁹Maaŋgi, nza ram suaŋrie? Nza Zudaiŋ, nza mba harigi fhaiŋ ŋgui gumgi kambarigire? Zakɨra fhuvara! Nza suaŋgi, tɨva mbatɨk, za nza Zudaiŋ gu harigi fhaiŋ ki gumgi, ana za nza vharigi.

¹⁰Fhe Bakɨmen buni vhuuiŋ ki gap ne nzuav khaŋ suaŋgi, “Tɨvir vhuuiaŋ mbui guma the ki fhu. Zakɨra fhuvara!

¹¹Mba tuituigiap Fhe Bakɨme kaŋgi guma the ki fhu. Fhe Bakɨme nzuav gari guma the ki fhu.

¹²Mbe zam kɨr Fhe Bakɨme segi. Mbe za mba tɨvara mbui, mbe bigɨn the muuŋgirga tuktɨgi fhuvara. Mbe vhɨra, mbe tɨvir vhuuin muuŋgirga tuktɨgi fhuvara. Mbe the tɨvir vhuuiaŋ mbui fhu. Zakɨra fhuvara!

¹³Mben kaathoori gumgi ndi mbogi ga rɨgi mbogi fara muuŋgiap fhomsɨgiap gumgi khurav ndɨga hi fara muuŋgi buni gum gumgi shogim, mbe vhɨzi buni ntan kav hi. Mbe zira domdore rav guiguigi buni vhɨrve, mbe nta nzuai. Mbe kaathoori guigira gumgir farfagi buni, nta mben kaathoorir givav ki. Mben buni kuruga mbatɨgar kuga fara muuŋgi.

¹⁴Mbe zazera harigi gumgi ga nzuav ndavi mbarɨgap mben farfarga ndɨkndɨgi, mben ndavi vherir kim, mbe buni mbatɨgira nzuai.

¹⁵Mbe zazera harigi gumgi shogɨrim, mbe vhɨzɨ zav khuafua rui.

¹⁶Mbe zazera ruav harigi gumgi gu mbigir ntuur farfav simtɨgir mbe ndɨɨa rui.

¹⁷Mbe harigi gumgi phorgɨp ndava bavira kɨrga tɨvi kaŋgi fhu.

¹⁸Mbe thaneŋ Fhe Bakɨmen rɨvi fhu.”

¹⁹Nza khueŋ kaŋgi, Fhe Bakɨme Moses ga nɨɨŋgi tɨvi, nta suaŋgi tɨvi piin ki ntɨɨri, nta mben tɨvi ma. Fhe Bakɨme Moses ga nɨɨŋgi tɨvi khueŋ nzuai ne khaŋ muuŋgi. Nza kha gumgi, nza zam, nzan guma the Fhe Bakɨme ŋgarkarga tuktɨgi fhuvara. Nza kha nuianan ki gumgi, nza zam Fhe Bakɨme nɨma thivgirim, ana nza suaŋv suaŋgirga.

²⁰Guma the Fhe Bakɨme Moses ga nɨɨŋgi tɨvi zɨn vui ne suaŋv Fhe Bakɨme tɨvir vhuuiaŋ mbui guman anan kamgirga tuktɨgi fhuvara. Fhe Bakɨme Moses ga nɨɨŋgi tɨvi, nta nza mbui tɨvi mbatɨgir nza khɨvi.

²¹Ntigem Fhe Bakɨme tɨvir vhuuiaŋ mbui gumgi gu mbigir nzan kaai tɨv kɨrar hɨgi. Mba tɨv, ana Fhe Bakɨme Moses ga nɨɨŋgi tɨvi zɨn vui ne nzuav kɨrar hɨgi fhuvara. Zakɨra fhuvara! Ana harigi tuavra kɨrar hɨgi. Fhe Bakɨme Moses ga nɨɨŋgi tɨvi nza nzuai kameŋ gum Fhe Bakɨmen kamthooŋ gumgi suaŋgi buni ki gavi, nza Fhe Bakɨme muuŋgirga tɨvi bun nzuai.

²²Mba tɨv khaŋ muuŋgi, mba guigira Zisas Krais khothɨgi gumgi gu mbigi, Fhe Bakɨme za tɨvir vhuuiaŋ mbui gumgi gu mbigir mben kaai. Mbe Zudaiŋ gum mba harigi fhaiŋ ŋgui gumgi, mbe zam, Fhe Bakɨme tɨva bavira mben muunga.

²³Nza kha nuianan ki gumgi gu mbigi, nza za tɨvi mbatɨgi ga muuŋgi. Nza Fhe Bakɨme muungen nza vuzvugi tɨvir vhuuiŋ vhɨrve nza za ntan muuŋgirga tuktɨgi fhuvara.

²⁴Fhe Bakɨme fhura nza kora muuŋgiap, ana Krais Zisas muuŋgi ŋaarar panan, ana taagi nza vhezgiap, nza ndigap, kha zɨn nzan kaai, nza tɨvir vhuuiaŋ mbui gumgi gu mbigi ma. Nza nduarira ŋaara vhuuŋ the muuŋgi ne nzuav, ana tɨvir vhuuiaŋ mbui gumgi gu mbigir nzan kaai fhuvara. Zakɨra fhuvara! Fhe Bakɨme fhura Krais Zisasan ŋaara panan mba zɨn nza nɨɨŋgi.

²⁵Fhe Bakɨme Zisas farasarigi, ana rimgip won vɨzɨna siasuarga, guigira ana khothɨgi gumgi gu mbigi, ana vɨzɨn mbe muuŋgi tɨvi mbatɨgi ruagiri, nta vhɨzgirga. Ana won tɨvar vhuun nza khɨvɨr zav maaŋ muuŋgi. Fhum, Fhe Bakɨme mbarara kha gumgi gu mbigi ga mbuav, ana mbe muuŋgi tɨvi mbatɨgi ga nzuav vheza mbatɨgar mbe ndɨɨi fhuvara.

²⁶Fhe Bakɨme ntigem khuen nza khɨvigi, ana nduara tɨvir vhuuiaŋ mbui Fhe Bakɨme ma. Ana tɨvar vhuuŋ zɨn vov, ana guigira Zisas khothɨgi gumgi gu mbigi, ana tɨvir vhuuiaŋ mbui gumgi gu mbigir mben kaai.

²⁷Maaŋ muuŋgiap, the nduara wo zɨ ndi vun kuamkuav khaŋ suangeŋ tuktɨgi, “Gu Fhe Bakɨme nɨman tɨvir vhuuiaŋ mbui guma ma”? Maaŋ suanga guma the ki fhu. Mba tɨv za vhɨzgi. Fhe Bakɨme Moses ga nɨɨŋgi tɨvi zɨn vui tuav, mba tɨva vhɨzgi fhuvara. Nza guigira Zisas khothɨgi tɨvara, mba tɨvara nza wari wo zɨri ndiv vun kuamkuagi tɨva vhɨzgi.

²⁸Ne khaŋ muuŋgi, nza ntige khueŋ kaŋgi. Nza guigira Zisas Krais khothɨgi tuavra, nza Fhe Bakɨme nɨman, nza tɨvir vhuuiaŋ mbui gumgi gu mbigi ki. Nza Fhe Bakɨme Moses ga nɨɨŋgi tɨvi zɨn vui ne nzuav fhuvara.

²⁹Nde ram mbui ndɨkndɨga mbui? Ee, Fhe Bakɨme, ana Zudaiŋ Fhe Bakɨmera me? Ee, ana harigi fhaiŋ ŋguir Fhe Bakɨme fhuve? Zakɨra fhuvara! Fhe Bakɨme, ana vhɨra harigi fhaiŋ ŋguir Fhe Bakɨme ma.

³⁰Ne guigi guarara, Fhe Bakɨ bavira ki. Ana mba warir fooŋgi gumgi, gum mba warir fooŋgi fhuv gumgi, mbe guigira Zisas Krais khothɨgi, ana tɨvir vhuuiaŋ mbui gumgi gu mbigir mben kaai.