ROMA 3:6-13

⁶Asiḡina, Barau ma ḡena maoro. Bema Barau tu asi roroḡoto nai tu, ḡia na tanobara mabarana tu kamasi bevevaḡa-maoro viniani?

⁷Tarima ta ma bevefafau-ḡauni, bekirani, “Bema au ḡegu ḡofaḡofa na Barau ḡena guruḡa moḡoniri evaḡa-fofori ginikaurini ema ḡia marevana evaḡa-baregoani nai tu, kara dainai au tu roḡo mo evaḡa-daḡaguni rakava tarimagu etoni?”

⁸Mo guruḡa tu babo, noḡa moḡo ini guruḡa kavana, “Rakava sivei, be namo bene fofori.” Tarima kotari na ḡai ḡevaḡa-rakavamani, ḡeḡofaḡofa-iaḡimani, ḡekirani, ḡai tu maiḡesi ḡakirani ḡetoni. Maiḡesi ḡai ḡeḡofaḡofa-iaḡimani tarimari Barau na voiri metona bevinirini tu asi vetoukauna, korana ḡeri ḡofaḡofa lorinai.

⁹Benamo kara ma bita toni? Ḡita Iuda tarimara moḡo namo, a irau bese tarimari tu asiḡi? Asiḡina ḡinavaḡi! Varau bita kiraḡia, Iuda tarimari e irau bese tarimari vekaravari ai ta tu asi ḡena rakava asi bita toni.

¹⁰Buka Veaḡai tu maiḡesi ḡetoreato: “Tarima ta asi iobukaiobuka, sebona kwarikwari ta maki asiḡina;

¹¹tarima ta asi etuḡamaḡi-roroḡotoni, ta na maki Barau asi evetauani.

¹²Mabarari ḡeraka-doḡe-muriḡito, ḡia mabarari veiḡa iobukaiobukana tu asi ḡeveiani, mabarari asi ḡevei-roroḡotoni, ta veiḡa namo asi ribana, sebona kwarikwari ta maki asiḡi.

¹³Ḡia godokari mase guriri kouḡari kavana; meari na ḡofaḡofa rakavari ḡekiraḡirini. Ḡeri guruḡa na mase ḡevaḡa-ḡorarini, noḡa moḡo mota foisiniri ḡia bibiḡari ai ḡetanuni.