Rom 3:6-13

⁶Adurigom atin ta uwok. Aria anan ta mare nupe um nunek adurih atih aih akure, anan ta mare gamo nunek skelum ihishmorim agundok atapishi arpesh um kwotog uwe, uwok.

⁷Aria douk atin enen arpen nyukri, “Eik ikitak iyagwreh enen rohwin baraen aria enyudok nyunek Iruhin ananin adurin atin baraen nyunowereh nyutogur yopugunum aria eshesh ihishmorim shumneken aria shutuk Iruhin ananin nyeigur nyuto um, aria namudok douk ta mumam, um ta nahwaresh shenek yoweishi inahos iri aria ta wata nuwaname yoweinyi poe?”

⁸Aria enen kupainyi arpen ta nyunek rohw nyukri, “Yaipo! Apak munek enesh yoweishi inahos um yopihi aih ta hutogur.” Aria apak wosik ta mukri namudok aka, uwok? Adur atin, enesh arpesh douk shenek rohw shenek enenyenen um eik Pol shaduk baraen shakri eik yakri namudok. Aria uwok. Arpesh shakri namudok iri, kweipon Iruhin ta adur nuwanamesh yoweinyi poe kabi douk eshesh shenekehi yoweihi aih um.

⁹Eshudok yoweishi douk showeshik ihipmorim. Namudok aria um mumam? Apak Juda adur munek uhwinyum meshagrakuk eshesh madae Juda iri uwe um munek yopihi aih um aka, uwok? Aria adur atin namudok ta uwok.

¹⁰Kabi baraen nyetem Iruhin ananik Buk iri nyakrium. Douk nyakri namudok, “Madae enen arpen nyenek yopuhi adurih aih atuh iri uwe, uwok. Atin arpen meyoh nyenek yopuhi aih iri douk madae enen uwe.

¹¹Nyadukem yopuhi aih iri arpen douk shopunek madae enen uwe, uwok. Aria enen arpen nyupe nyunek mour um nyurim Iruhin uwe, uwok.

¹²Ihishmorim arpesh douk shatanam shakonaguk agabus. Aria ihishmorim shatogur yoweishi arpesh. Madae enen arpen nyunek yopuhi aih uwe, uwok. Amu wouwokuk abom.

¹³Esheshin baraen douk kabi anaruh wonugwegwiruh douk enesh shatarari arpesh shor aria paworuruh aria ba yoweiri unar rakihumori. Eshesh douk shapeum shenek rohw um kupaishi aria esheshin baraen douk wanohwin atin kabi yowenari marasin nor yoweiguhwi yuguhw-mori.