Roma 2:13-26

¹³Sâcmutâc dâŋ mâc hazeczi mananiŋmu jaŋe Anutuzi honec‐jopame tiŋne mi eŋgopieŋ, manarâ reŋkeeŋgopieŋ jaŋe ine tiŋne mujareocmu.

¹⁴Ŋic qâpuc sâcmutâc dâŋ mi mufua‐jarekicne jaŋe maŋjeŋicte sâcmutâc dâŋ reŋkehuc ine sâcmutâc dâŋ tâmiriczi sâcmutâc dâŋhec tinac eeŋgopieŋ.

¹⁵Iŋuc epie sâcmutâc dâŋ i maŋjeŋicko qâreŋkekicne, irec fuŋne jaŋgeŋkeekac. Sâcmutâc dâŋ maŋjeŋicko qâreŋkekicnere maŋjeŋiczi tutuc qajareekac, erâ wâc maŋ mamanasu‐jeŋiczi foc forisic ehuc ŋifec mu qatarac eekac â ŋifec mu bâmiriŋ eekac.

¹⁶I dameŋ sâkore iŋuc eekac. Ira Anutuzi Jesu Kristo ecneme maŋnâŋecko wiac soŋsoŋ fokac irec fuŋne bataniŋkeocmu. No Biŋebiaŋ muekopac irec sâcko bataniŋkeocmu hâcne.

¹⁷Go ʒâŋege Judaŋic muhuc sâcmutâc dâŋzi roŋgâŋ egareme herâ foekic. Erâ no Anuture fuŋne manakopac muhuc sahac fefe juekic.

¹⁸Go Anuture micdâŋ manaekic, erâ sâcmutâc dâŋ qazu‐garekicnere keci ezo, keci mi ezo i mana wosâeekic.

¹⁹Ehuc gahacnere ʒiŋuc muekic: “No tiŋtuŋ sâcne jowa qataŋ ejarepemu, â dapâcko juŋgopieŋ jaŋe sâcne batamae‐jarepemu,

²⁰â ŋic maŋpuriŋhec jaŋe sâcne jaza bâtiŋ ejarepemu, â ɋiemaŋ jaŋe wiac sâcne qazu‐jarepemu. No sâcmutâc dâŋhecte mamana â dâŋfâri irec wamboŋne rauckerâ jukopac i.”

²¹Go iŋuc muekiczi ŋic gâcne miti qazu‐jarehuc gahacne maŋ mi qazucneekic. Go ŋic fiuc mi ronʒepieŋ jazahuc gahac fiuc roekic.

²²Ŋowe ŋonâŋ ŋohe bebehec mi ezepirec jazahuc gahac ŋonâŋge beheekic. Go nemuɋâŋ sureekiczi nemu ufuŋte wiac fiuc roekic.

²³Go sâcmutâc dâŋte manasuhuc maŋfefe eekiczi sâcmutâc dâŋ qâsuahuc Anutu gâc hecneekic.

²⁴Irec hâcne kecʒiŋuc qâreŋkekicne: “Qâpuc jaŋe ŋoŋere kiŋte erâ Anuture ʒâŋe musoriŋkeeŋgopieŋ.”

²⁵Go sahacgao Anuture ma bakicne i sâcmutâc dâŋ reŋketec fârinehec eocmu. Me sâcmutâc dâŋ qataratec sahacgao ma izi fârimâc eocmu.

²⁶Erâ dâŋ irec ŋifecne qac qârisic fokac wâc. Ŋic moc ma tâmiriczi sâcmutâc dâŋ reŋkeocmuo mahec tinac eocmu.