Rom kimbi 2:13-26

¹³Ambazip Anutugöreŋ Köna keu öne mörakzei, yeŋön Anutugö jeŋe solanŋi qahö akze. Qahöpmö, Köna keu tem köla wuataŋ-gömakzei, Anutunöŋ mönö yeŋgö keuŋini jim teköiga solanize.

¹⁴Kantri tosatŋan Anutugöreŋ Köna keu qahö memba maljemö, tosatŋan töndup laŋ nanŋini imbi miaŋgö dop mötmöriba ahakze. Anutugö köna keuŋi qahö mötzemö, töndup mötmötŋinan jim kutum eŋgiiga Anutugö köna keugö dop aka miaŋgö bapŋe malje.

¹⁵Mewö maljeaŋgö könaŋi mi aukŋe asuhuba kewö ahöza: Anutunöŋ ambazip miwikŋaim neŋgiba miaŋgöreŋ Köna keuŋaŋgö jimkutukutuŋi mi körek neŋgö urunine ali ahöza. Miaŋgöra Anutunöŋ keuŋi jiba saŋep alakzawi, mi kian kantri yeŋön mewöyök mörakze. Mi uruŋinaŋgö kezapŋan mötketka keuŋini jiiga Anutubuk öröröŋ mörakze. Anutunöŋ urumötmöt eŋgiyöhi, miaŋön nalö tosatŋe keu jakeŋe ala kuŋgum eŋgiiga möt bölimahakze aka nalö tosatŋe keuŋini naŋgöba jiiga möt ölöwahakze.

¹⁶Ölöwak Buŋa jim asarimakzali, miaŋgö dop nalö ketaŋe kewö asuhuma: Kraist Jisösnöŋ Anutu bauköm waŋgiiga ambazip neŋgöreŋ keu tölapŋi tölapŋi kewöta jim teköm neŋgima. Mewö.

¹⁷Gi nangi qetki Juda azia qeta Köna keunöŋ amöt qem gihimapkö möt nariba “Anutugö buŋaya akzal,” jiba silegi möpöseinöŋga dop kölja me qahö?

¹⁸Gi Anutugö jitŋaŋgö dop malmalgö keuŋi möt sölöŋgöba maljan. Anutugö Köna keu kusum gihigeraŋgöra aka köna qetpuk sorok wuataŋgömamgö jiba keu pakpak kewöta ölŋi aka muneŋi mendeŋmakzan.

¹⁹Gi “Ölöp jegömöl ambazip alabaukŋini aka eŋguaŋgitmam,” jiba aiweliköm aŋgumakzan. Söŋaupnöŋ maljei, mi mem asarim eŋgimanaŋgö dop awösamkakak akzan.

²⁰Mewö aka kewö jimakzan, “Köna keu kusum niŋgigetka mötkutukutu lök miwikŋaiba keu ölŋaŋgö könaŋi mötzal.” Mewö jiba amqeba kewö jimakzan, “Ni ölöp ambazip mötmötŋini qahö yeŋgö böhiŋina akŋam. Ölöp mönö namande yeŋgö qaqazuŋina aka kusum eŋgimakŋam.”

²¹Mewö jiba tosatŋi kusum eŋgiba wuanöŋgöra nangi qahö kusum aŋgumakzan? “Yoŋgorö kude meman,” jiba ambazip uruŋini kuŋgum eŋgimakzanmö, nangak yoŋgorö meme aknöŋga qahö dop kölja.

²²“Sero yoŋgorö kude akŋan,” mewö jinöŋ mötketka nangak kaisero akzan me qahö? Tandö lopioŋ sisit mem eŋgimakzanmö, töndup nangak jöwöwöl jikenöŋ öŋgöba yuaiŋi aŋgön köla kiom qeba memakzan. Mi qahö dop kölja.

²³Anutugöreŋ Köna keubuk maljanaŋgöra silegi laŋ memba öŋgömakzanmö, nangak mi walöŋda mewö miaŋön Anutugö qetbuŋaŋi memba et ala malnöŋga gamuŋambuk ahakza.

²⁴Miaŋgö keuŋi mi Buŋa Kimbinöŋ kewö ohoget ahöza, “Eŋgö silikŋinaŋgöra aka kian kantri könagesö yeŋön Anutugö qetŋi ilita sutŋine mepaqepaik ahakze.”

²⁵Anutugöreŋ Köna keu wuataŋgöba maljan ewö, Anutugö aiwesökŋi silege yandigeri, miaŋön mönö bauköm gihiiga dop kölja. Mi dop köljapmö, köna keu walöŋda siŋgisöndok ahakzan ewö, mönö aiwesöki qahö memeŋi mewö tandök aka öne laŋ maljan.

²⁶Tosatŋan Anutugö aiwesökŋi sileŋine qahö yandigetka töndup köna keugö jimkutukutuŋi wuataŋgömakze ewö, Anutunöŋ aiwesök mi sileŋine ahözawaŋgö dop ewö eŋgehiga dop kölja.