Roma 12:9-20

⁹Mi tataru va hinokara ni sari na tie. Mi kukiti nia sa kinaleana, mamu tuqe va nabua sapu leana.

¹⁰Ke mi koa vari tatarue doduru totoso, guana tamatasi soti koe Karisito, mamu qetuqetu pude variva pamaṉi.

¹¹Mu lopu koa gua na tie hakohako, ba mi koa ṉaliṉali nia sa ninabuluna sa Baṉara pa doduru bulomia.

¹²Mi koa qetu nia gua sapu raṉea gamu sapu kote ta evaṉa, mamu aqa va ṉoṉo koari na mia tinasuna, mamu lopu makudo varavara doduru totoso.

¹³Mi poni sari na tasimia koe Karisito pu ehaka nia sa tinokae, mi va kamo qetuqetui pa mia vetu sari na tie.

¹⁴Mi varavara lani koe Tamasa pude mana ni si arini pu ṉoṉovala gamu; uve, tepa ia sa Tamasa pude mana ni, ba lopu pude leve ni si arini.

¹⁵Mi qetu somanae koa rini pu qetu, mamu kabo turaṉi si arini pu kabo.

¹⁶Mi koa varibulei pa vari korapa mia, mi lopu vahesi puleni gamu, ba koa baere turaṉi sari tie kumakumana. Mi lopu doṉo va sage puleni gamu.

¹⁷Mu lopu hobe nia kinaleana sa kinaleana, ba mi tavetia sapu gua leana koari doduru tie.

¹⁸Gua sapu bokai gamu pa mia kalina, si podekia pude mi koa bule koari doduru tie.

¹⁹Kasa qua baere, mi lopu hobe nia kinaleana sa kinaleana, ba mi veko la nia koe Tamasa sapu gua asa pude lipua, sina zama guahe sa Kinubekubere Hope: “Arau si kote tubehi; kote hobei Rau si arini,” gua sa Tamasa.

²⁰Ba mi tavetia sapu gua zama nia sa Kinubekubere Hope: “Be ovia sa mua kana, si mamu ponia, babe memeha sa, si mamu va napoa, ura be tavete guahe si gamu, si kote pulepaho sa mia kana.”