Rom 12:9-20

⁹Kori vido koti dothovira na komi tinoni, oti dothovira tutuni. Oti thevuioka tadia na komi fata ke dika, moti tatango ngasi tagna na komi fata ke jino.

¹⁰Oti veidothovighi vaghagna koti tamatahi, moti veighaghana boheghi.

¹¹Oti saghoi toali kari oti agutu heta vania a Lod kori hehemiu doudolu.

¹²Oti totogo, eigna ighamu koti adoa a God keda eia na hava ke taluhaghorea itamiu. Oti sokara ngasi kori vido koti papara, moti tarai hahali.

¹³Kori vido na tinoni nigna a God ke kudo sa fata, oti hathera tadia nimiu na komi fata. Moti kaliti toetokera na komi tinoni kena mai kori melehamiu.

¹⁴Oti saghoi tarai kaea a God gi keda vadiadikalara arahai kena vaparaghamu. Keana oti tarai eidia eigna a God keda vatokera.

¹⁵Oti totogo duadia arahai kena totogo, moti dikahehe duadia arahai kena dikahehe.

¹⁶Oti sakai mono haidu toetoke. Saghoi toatogha ighamu koti nagho vano tadia arahai tavogha. Kari oti sasaa na mono haidu duadia na komi tinoni kena boi nagho. Moti saghoi toatogha ighamu koti thaothadogha vano tadia arahai tavogha.

¹⁷Gi sa tinoni ke eia na fata ke dika itamiu, oti saghoi tughu tabirua. Keana oti eia vamua na hava ke jino kori matadia na komi tinoni.

¹⁸Oti hatia na hetamiu eigna kotida mono haidu toetoke duadia na komi tinoni gougovu.

¹⁹Ara kulagu kiloau, gi ahai keda eia sa fata ke dika itamiu, oti saghoi tughu tabirura. Kari oti lubatia a God eigna keda vaparara. Eigna tadia na komi Rioriso ke Tabu a God ke velea, “Inau hiri kuda vaparara arahai kena eia na komi fata ke dika. Inau kuda tughu tabirua na hava kena eia itamiu.”

²⁰Oti leghua na rioriso iaani ke mono tadia na komi Rioriso ke Tabu, “Gi nimua na thevuioka keda rofo, o hea ghagna na vanga. Gi imanea keda haga kou ghagna, o vakoua. Gi ighoe koda eia vaghagna iangeni itagna, imanea keda maomamogna puala.”