Rôma 12:9-20

⁹Dja gar amã me abê. Kwãrĩk wãnh amijo ajêx kêt. Dja gar mrãmri amã me abê katàtkumrẽx. Godja me abenkam axwe nàr amijo axweo ba, ar ga dja gar amã axwe kĩnh kê:tkumrẽx. Nàr, godja me abenkam mex nàr amijo ba mex ar ga dja gar amã mex kĩnh ne 'ã angrà: ne.

¹⁰Kute ar amã akamy jabê pyràk ne abenmã aprĩ:ren amã aben jabê. Kwãrĩk wãnh gar me'ã amim, —Gê me kumrẽx imã imex jarẽ. Ba kam amipãnh ã memã mex jarẽnho ane, anhỹr kêt. Ar ga akumrẽx dja gar memã wan tu memã mex jarẽnho aba. Memã mex jarẽnho aban kàjmã memã rax kamẽnho aba.

¹¹Metĩndjwỳnh kadjy mỳjja'õo aba'ã ar adjukanga kêt ne atỳx. Dja gar Karõ man kôt amã Metĩndjwỳnh jabê:n arek kadjy mỳjjao aba.

¹²Dja gar amiwỳr Metĩndjwỳnh nhõ mỳjja mexja kamnhĩxkumrẽx. Aje amiwỳr kamnhĩxkôt akĩnhkumrẽx. Dja te apỹnh ar akaprĩ djàri ar ajo ba arek amim Jeju mar tỳx rã'ãn 'ã adjukanga kêt. 'Ã adjukanga kêt ne Metĩndjwỳnhmã amijo adjà'wỳr rã'ã ne.

¹³Godja Jeju nhõ me ja õ mỳjja kêt jabej ar amã me kaprĩn amikutã memã mỳjja kwỳ ngã. Gê me ar awỳr wangjê gar meo djuw mex. Ja dja gar amã kĩnh.

¹⁴Godja me'õ ar ajo bikẽnh jabej gar Metĩndjwỳnhmã o a'uw ne kum, —Dja ga o djuw mex, ane. Ã kadjy kum ane. Kwãrĩk wãnh kum, —Dja ga ijo angryk ne o ajkẽ, anhỹr kêt.

¹⁵Godja me'õ kĩnh jabej ar gadjwỳ kôt akĩnh. Godja me'õ muw ar gadjwỳ kôt akaprĩn muw.

¹⁶Dja gar axikôt akabẽn man axikôt arẽ. Kwãrĩk wãnh amijo araxmã amijo adjàmra kêt. Ar amã me kajgo kĩnh ne ro'ã ar aba. Kwãrĩk wãnh amim, —Ba ne ba ijamak mex'ã ipydji, anhỹr kêt.

¹⁷Godja me'õ ar ajo ajkẽ kwãrĩk wãnh amipãnh o abikẽnh kêt. Dja gar akabẽn katàt ne katàt amijo aba gê me amim ajã, —Be, mrãmri, tãmwã ne katàt kute amijo bakumrẽx, ane.

¹⁸Ar ga dja gar me kunĩmẽ abenmã akabẽn mexkumrẽx jarẽ ne 'ã adjukanga kêt. Nàr gar te me'õmã akabẽn mex jarẽ nhym tu ar ajapa. Kwãrĩk wãnh rã'ã.

¹⁹Akmere, àpnhĩre ar, imã ar akĩnhkam ne ba ar amã ikabẽn jarẽ. Kwãrĩk wãnh amipãnh kêt. Dja gar Bẽnjadjwỳr djwỳnhkam ama gê ta ar ajo ngryk. Metĩndjwỳnh ne amrẽbê: me bakukãmãremã kum, “Ba ne ba ibê memã o pãnh djwỳnh. Ba dja ba ajo ingryk ne o pãnh. Kwãrĩk wãnh amipãnh kêt.” Nãm ã Bẽnjadjwỳr djwỳnh memã ane. Kam dja gar kam ama.

²⁰Nhym kam ajte memã kum, “Kam godja akurê djwỳnh kum prãm jabej ga kum mỳjja ngã gê kukrẽ. Godja kum kôr jabej ga kum ngô ru gê o ikõ. Dja ga ane nhym ta arỳm amiman amim ngryk jabej ne ajo õbikwa jabej.” Nãm Bẽnjadjwỳr djwỳnh ã me bakukãmãremã ane. Kam kwãrĩk wãnh amipãnh kêt.