ROM 12:9-20

⁹A kuluk ngo kamu armámna na támin muswan. A kuluk ngo gama tustuswai sápkin má gama katkatang pagas i a kuluk.

¹⁰Gama armámna arliu i gam ngorer gam arabuhán sár. Gama rakrakai suri gama árnga arliu i gam.

¹¹Gama kákir mai longoi a kuluk, má gama mángát pasi Tanián a Pilpil nák amálmálas i bál gam suri gamák longoi him si Konom.

¹²Gama lala laes kabin a mon i kamu ngangai i Káláu. Má gama kis pau i katbán rogorogo. Gama márásngin pagas mai sung.

¹³Gama artabar má támri bos tám ruruna er di sáhár, má gama árár pasi asir uri niá gam.

¹⁴Ái rung di long bengta gam, gama sung Káláu suri nák asosah i di. Áá, gama sungi suri nák tangan di, má koion gama sungi suri na long sáksákna di.

¹⁵Ái rung di laes, gama laes tiklik mam di. Ái rung di tinang má dik tang, gama tang tiklik mam di.

¹⁶A kuluk ngo na siaroh sár á kamu kis arliu i gam. Koion gama hol apakta i gam, mái sár gama obop gam adi lal turán rung kápte a ninir i ngis di. Koion gama tubán hol apakta pas gam sang.

¹⁷Ngo tekes ákte longoi sápkin uri narsá gam, koion gama kos kalengnai mai sápkin mul uri narsán. Gama ololoh suri gama longoi matngan tatalen er matananu no di mák ilmi ngo a nokwan.

¹⁸Ngo na arwat singim, una lu kis matau turán matananu u liu tiklik mam di.

¹⁹Lain rang buhang, koion gama kosoi mai sápkin uri narsán kálámul ákte longoi sápkin narsá gam, ái sár gama arsok on uri limán ái Káláu suri ái sang na kosoi. A ngorer dikte le on i Buk Tabu ngo, “Ái Konom ákte parai ngo, ‘Á iau sang ina oboi rangrangas narsán rung di longoi sápkin, má kak talar sár suri kokos uri narsá di.’”

²⁰Ái sár, gama longoi ngoromin a parai i Buk Tabu ngo, “Kálámul er a longoi sápkin uri narsá gam, ngo a matpám, ki gama támri. Má ngo a sák suri dan, ki gama angimi. Ngo gama longoi ngorer, kálámul er na áslai rumrum, má koran má na gáwár i bál mam gam.”