Rom 12:9-20

⁹Ou badeh, leheya kandriyen ta tikisiy ki handru. Ou ruwani kandriyen ndra-in ta balik; ya ou tawi kandriyen mwasin kihis.

¹⁰Ou aseken nadu tinem ari ari badu hawem handru. Ou sabudon ou le, arile ou anuhun sahou ta nadu tinem ari ari.

¹¹Ou saliliy ma ou sawoyah ta amekes lahou ta Laban. Arile ou alelei Malawin Ndrabun aseben ou amekes lahou le kili.

¹²Na len ou anyolom bohon i bwena ta lakou Jises kameh edeu tam badeh, ou sekesek. Buku none maha ma isi katok tam, ou sanunu-uh ma ou ado le. Ma, na len mari, ou amekes salom ma ou ado le ta salom; ou sabudon anya Kindrei kameh winiyan bamesekei bwe, ndri-iy.

¹³Ou anyohan lakou ki toro lau ta Kindrei, i buku none oro andriliu ta lakou. Ma ou asumon iri lau badu heh, badu heh kawek asiu.

¹⁴Are lau oro amekes maha-an ma isi i tam badeh, ou asolom ki ta Kindrei kanysowani oro le, ma iy sabokoro-ei oro.

¹⁵Are lau oro sekesek badeh, ou ala hawe oro, ado mari kasekesek; ya are lau oro taya ma tikisiy badeh, ou ala hawe oro taya ma tikisiy hawe oro.

¹⁶Ou manyah ado le, nono-ou ndri-iy hawe iri ari ari. Ou satudun ou, ndri-iy, arile ou amekes ou badeh, ala nah nadu bwisik ala hawe iri lau nyara iri bwe. Ya ou samekes ou anya ou tanan labai, ndri-iy.

¹⁷I buku none ari ndramak kamekes ndra-in kewek tam, ou satehei ndra-in sala bada ndra-in, ndri-iy. Ma ou badeh, madam kaleu ki doh, ki doh, ma ou amekes lahou badeh, kamekes ndrine lau mari kasekesek.

¹⁸Ou samekes losen sala ta ari ndramak, ndri-iy; arile i buku winiyan eh, ou manyah amunum le ado hawe iri.

¹⁹Aha kawas tek, aha samekes losen sala tiri, ndri-iy, arile aha katehei ki kani Kindrei kamekes, tasah sahou mene ndratorowenei tiye i buku doh: “Jo kameh atehei maha-an ili tiri, ma jo konohei saba kandriyen nane iri amekes.”

²⁰Idoh handru, ya mwasin labai ta ou amekes i buku doh, “I buku none ndramak ta amekes bahun i tam kimeson badeh, ou anyohan iy na nyamon; Ma i buku none iy anyar ta gwa badeh, ou adeu gwa ki wa-in. I buku none ou amekes kandriyen mwasin doh i tan, ou kameh winiyan amekes bwilin ama ma tubuni kandriyen tan ndra-in doh iu.”