Psalm 37:5-36

⁵Eiskomyang sifacna nu sin LEUM GOD; Lulalfongel, ac El ac fah kasrekom.

⁶El ac fah oru suwoswos lom in arulana kalem, Oana kalmen faht ke infulwen len.

⁷Kom in mongfisrasr ac tupan ma LEUM GOD El fah oru; Nikmet elya kaclos su kapkapak, Ku elos su eis woiyen pwapa kutasrik lalos.

⁸Nik kom eiskomyang in fosrnga ku kasrkusrak; Ma inge mwe kolla nu ke ongoiya.

⁹Elos su lulalfongi LEUM GOD fah usrui acn uh, A mwet koluk fah lisyukla.

¹⁰Ac tia paht mwet koluk fah wanginla; Kom finne sokolos, kom ac tia konalosyak.

¹¹A mwet fakpap ac fah usrui acn uh, Ac elos fah engankin mwe insewowo ac misla.

¹²Mwet koluk elos pwapa in lain mwet wo; Elos suelosi ke kasrkusrak.

¹³Tusruktu Leum El isrun mwet koluk, Mweyen El etu lah elos ac fah sa in kunausyukla.

¹⁴Mwet koluk elos faisak cutlass natulos ac akola pisr natulos In uniya mwet sukasrup ac mwet enenu, In onelosi su oru ma suwohs;

¹⁵Tusruktu elos ac fah anwuki ke cutlass natulos sifacna, Ac pisr natulos fah kotkot uh.

¹⁶Finne pu ma su oan yurin sie mwet wo, A yohk sripa liki na mwe kasrup puspis su oan yurin mwet koluk nukewa,

¹⁷Mweyen LEUM GOD El ac fah eisla ku lun mwet koluk, Ac karinganulos su wo.

¹⁸LEUM GOD El karinganulos su aksol, Ac acn uh fah ma lalos nwe tok.

¹⁹Elos ac fah tia keok in pacl koluk; Elos ac fah kihp in pacl sracl.

²⁰A mwet koluk elos ac fah misa; Mwet lokoalok lun LEUM GOD elos ac fah wanginla oana ros inimae; Elos fah wanginla oana kulasr.

²¹Mwet koluk elos ngusr ac tia folokin, A mwet wo elos sang ke kulang.

²²Elos su akinsewowoyeyuk sin LEUM GOD fah usrui acn uh, A elos su selngawiyuk sel fah lisyukla.

²³LEUM GOD El kol mwet uh ke inkanek fal elos in fahsr kac, Ac El karinganulos su akinsewowoyal.

²⁴Elos fin ikori, elos ac fah tia mutana ten, Mweyen LEUM GOD El ac tulokunulosyak.

²⁵Nga matuoh inge; nga moul paht na, Tusruktu nga soenna liye sie mwet wo in pilesreyuk sin LEUM GOD, Ku tulik natul in ngusr mwe mongo.

²⁶In pacl nukewa el insewowo in sang mwe kite nu sin mwet, ac tia tupan in eis molo, Ac tulik natul elos mwe insewowo.

²⁷Forla liki ma koluk ac oru ma wo, Na fwil nutum elos ac fah mutana fin facl se inge;

²⁸Tuh LEUM GOD El lungse ma suwohs, Ac El tia pilesralos su oaru nu sel. El karinganulos nwe tok, A fwil nutin mwet koluk fah lisyukla.

²⁹Mwet suwoswos fah usrui acn uh, Ac elos ac fah muta fac ma pahtpat.

³⁰Kas lun sie mwet wo, kas lalmwetmet, Ac ma el oru uh suwohs pacl nukewa.

³¹El sruokya ma sap lun God lal ke insial Ac tiana fahsr liki.

³²Sie mwet koluk el tawi mwet wo Ac suk in unilya.

³³Tusruktu LEUM GOD El ac tia eisalang nu ye ku lun mwet lokoalok lal, Ac El ac tia lela in itukyang mwatal ke pacl in nununku nu sel.

³⁴Filiya finsrak lom in LEUM GOD ac akos ma sap lal; El ac fah akfulatye kom ke El asot sie facl tuh in mwe usru lom, Ac kom ac fah liye ke mwet koluk elos lisyukyak.

³⁵Sie pacl ah nga liye sie mwet koluk su arulana sulallal; El fulat liki mwet nukewa, oana soko sak cedar in acn Lebanon,

³⁶Tusruktu tok ke nga fahsryak we el wangin; Nga sokol a nga tia ku in konalak.