SALAMO 37:5-36

⁵Oiemu mauri be Lohiabada ena imana dekenai do oi atoa. Ia dekenai do oi abidadama, vadaeni ia ese oi do ia durua.

⁶Oiemu kara namona be Lohiabada ese do ia hedinaraia, dina ena diari bamona. Ia ese oiemu kara maoromaoro, be taunimanima edia vairanai do ia hedinaraia, dina tubua bamona.

⁷Lohiabada ena vairanai do oi laga-ani. Iena vairanai do oi helai, oi naria ela bona ia ese oi do ia durua. Edia gaukara dekena amo, kohu momo idia davaria taudia, be idia dainai do oi mama lasi. Ma palani dikadia idia karaia, bona unai palani ena anina idia davaria taudia, idia totona do oi laloa hekwarahi lasi.

⁸Do oi badu lasi, do oi dagedage lasi. Do oi laloa hekwarahi o laloa badu lasi, badina unai bamona laloa ese kara dika ia havaraia noho.

⁹Badina kara dika taudia be, dika momokani do idia davaria, to Lohiabada idia abidadama henia taudia ese, edia tano dekenai do idia noho, mai namo danu.

¹⁰Nega daudau lasi lalonai kara dika taudia do idia ore. Edia gabu do umui tahua, to do umui davaria lasi.

¹¹To manau taudia ese noho gabuna tano do idia abia, do idia helai namonamo, mai moale bona mai maino danu.

¹²Kara dika taudia ese, kara maoromaoro taudia hadikaia daladia idia laloa noho, bona idia badu henidia dainai, edia isena idia koria auka masemase.

¹³To Lohiabada ese, kara dika taudia ia kirikirilaia noho, badina ia diba, dina do ia ginidae, idia be do idia lusi momokani.

¹⁴Kara dika taudia ese edia tuari kaia idia veria, bona edia peva danu idia veria noho, ogogami taudia bona gau lasi taudia do idia pidia totona, bona kara maoromaoro taudia alaia mase totona.

¹⁵To edia tuari kaia be, idia sibona edia kudouna dekenai do idia gwadaia, bona edia peva be do idia makohia.

¹⁶Kara maoromaoro tauna be sedira ia be ogogami, to unai ogogami ese, kara dika taudia momo edia kohu bada ia hereaia noho.

¹⁷Badina be kara dika taudia edia siahu, be Lohiabada ese do ia haorea, bona Lohiabada ese, kara maoromaoro taudia do ia durua momokani.

¹⁸Lohiabada ese mai edia kerere lasi taudia ia naria noho, bona Dirava ese idia dekenai ia henia gau namodia, be do idia dogoatao ela bona hanaihanai.

¹⁹Nega dika neganai, unai bamona taudia be do idia lalohisihisi lasi, bona hitolo bada neganai, idia be mai edia aniani hegeregere.

²⁰To kara dika taudia be do idia mase ore. Lohiabada dekenai idia dagedage henia taudia, be do idia kwalimu lasi. Idia be rei gabudia dekenai idia noho herahera bamona. Do idia boio haraga, kwalahu ia boio haraga bamona.

²¹Kara dika taudia ese idia abiatorehai, to idia henia lou lasi. To kara maoromaoro taudia be, mai hariharibada danu, durua bona moni idia henia.

²²Badina be Lohiabada ese ia hanamoa taudia ese, tano dekenai do idia noho, mai noho namo danu. To Lohiabada ese ia hadikaia taudia, be dika momokani do idia davaria.

²³Tau namona ena raka dalana, be Lohiabada ese ia hakaua noho, bona unai tau ena kara ia ura henia dainai, Lohiabada ese do ia naria noho.

²⁴Unai tau be do ia moru, to do ia diho momokani lasi, badina be Lohiabada ese, iena imana dekena amo do ia haginia lou.

²⁵Gunaguna lau be mero, harihari lau be buruka, to nega ta kara maoromaoro tauna ta be Dirava ese ia rakatania, a? Lasi momokani, nega ta lau itaia lasi. Bona tau namona ena natuna be nega ta idia hitolo, a? O iena natuna ese aniani totona taunimanima idia noia, a? Lasi, nega ta lau itaia lasi. Lasi momokani.

²⁶Kara maoromaoro taudia ese, nega ibounai haida dekenai idia bogahisihisi, bona idia heniatorehai, bona edia natudia ese Dirava ena hanamoa idia davaria.

²⁷Kara dika do oi rakatania, kara namo do oi karaia, vadaeni tano dekenai do oi noho namo hanaihanai.

²⁸Badina be Lohiabada ese, kara maoromaoro ia ura henia noho. Iena abidadama taudia, be ia ese do ia rakatania lasi. Kara maoromaoro taudia be, Lohiabada ese do ia naridia namonamo ela bona hanaihanai, to kara dika taudia edia natudia ese, dika do idia davaria.

²⁹Kara maoromaoro taudia ese, Dirava ia henidia tano dekenai do idia noho ela bona hanaihanai.

³⁰Kara maoromaoro tauna be mai ena diba, bona iena hereva be mai aonega danu. Mai maoromaoro bona momokani danu do ia hereva.

³¹Iena Dirava ena taravatu, be iena kudouna lalonai ia dogoatao noho, bona ia ese Lohiabada ena taravatu ia rakatania lasi momokani.

³²Kara dika tauna ese, kara maoromaoro tauna ia itaia noho, bona ia alaia totona dala ia tahua noho.

³³To Lohiabada ese kara namo tauna do ia rakatania lasi, vadaeni tau dikana ena siahu henunai do ia noho lasi. Bona Lohiabada ese kara maoromaoro tauna do ia durua, vadaeni kota dekenai idia samania neganai, dika do ia davaria lasi.

³⁴Lohiabada dekenai do oi naria, iena dala dekenai do oi raka. Unai neganai ia ese oi dekenai ia henia tano, be do oi dogoatao diba, bona Lohiabada ese tau dikadia do ia hadikaia ore neganai, oi ese inai kara do oi itaia.

³⁵Kara dika tauna ta lau itaia vadaeni, iena noho be namo herea. Ia be ia tubu badabada, Lebanona ena sida audia bamona.

³⁶To gabeai lau raka hanaia, unai tau be ia noho lasi. Lau tahua, to lau davaria lasi.