SAM 37:5-36

⁵Gata kayuk yutnanga akngaka Buyambam tapae kataune teyo. Baniu ie kekeknga siwi ita akgatanggamik.

⁶Gatanggaman gatane takeakngaka gunzitdane waenga aknga binga anggaman yuwik. Ngan, gatane noman takngaka itakan tasiwan aanggaman siknga aminbamde kaine siwik. Unzing gunzitda banakan pakapu yuwan kakaa siknga singgak binga.

⁷Gata Buyambam tapae wesim kuke wepda yuyo. Gatu musip kwikwik yuke kayuwi ita apme gatanggamik. Gata aminu waiaknga takngatu takngatu tasiwawa buyana aawan sanga noman nomana kwaapzang pakaing aminde ma geenguwim. Siakan siknga, gatane natdetdetda atangu sanga waaminda wa pakaingge nangaakanu ma natake unzingu ma tasiwim.

⁸Gata kaanga dua natake gata musiptok nataayak taknga ateyo. Gata sangabamde nangaakanu dua natake gatu ma satnawim. Sanga waakngata ga waiakngaatangu ganitakuwan atasia.

⁹Unzingge wai aminu gatukande wai asining. Siwan ngana aminu Buyambam tapae banip sike waaminu kepna teyamukut komune take yutning.

¹⁰Tupae dua, zeetgaman wai aminu gatukande wena siknga sining. Gata ayuaing komune kuke ngana aminu waakwakge yawambi maining.

¹¹Siwan ngana aminu inane umana yatangenatningge take dua nataaing aminde keu kuupbam ayamik. Ayaman amau wena siwa take siknga yutning.

¹²Wai aminda natdetdet naatangu amin noman tapa tasiwa maiwikge kaanga natangamunggak. Natangamuke gena sambuke yuak.

¹³Siwan ngana Buyambamtapa atnataak. Tapduu gwenduta apik. Apan tapduu wagwene wai aminu gatukande wena asining. Unzingge Buyambam tapata waaminu ayanimikgak.

¹⁴Gatu wai aminda bainatna kaiwan akopan gatu kweemna kaiwan dandakawan sangaapana wena gatu sangaapae dapmakaing amin yamnangge tasikaing. Ngan, waaminda aminu noman taknga tawakaingunin zipa kumningge tasikaing.

¹⁵Siwan ngana bainatnata inane musipna yamning. Siwan kweemna aputning.

¹⁶Sanga mateknga noman amin tapata peyuakganu sanga wai aminda kwaapzang pake yuaingu ayapbikgak.

¹⁷Dasingge? Buyambam tapata wai amindane kekekngana pasiwan sopukaing. Siawan noman aminu kakuya katak kayuak.

¹⁸Buyambam tapata aminu ie wam gwaamuke tawakaingu katak kayuak. Unzingge sanga Anututa yamunggau asinggan pake yutning.

¹⁹Tapduu wai opatangu meya takngatu dua kaning. Sike tapduu gwendu tom tapduk. Siwan ngana noman aminu nanamna kwaapzang. Waaminu dua dapning.

²⁰Siwan ngana wai aminu kuupbam gatukande wena asining. Buyambam tapatane iwana wena asining. Unzing zongazongatane tapuyata pimake butakaing binga. Siakan siknga, waaminu kupan takngata matekngasim yuke zeetgaman kuwan wena singgak binga sining.

²¹Wai aminda sanga kundu moo pakaing ngana yake dua yamukaing. Siwan ngana noman amintapa takeakngakan tasike notnaapae sangabamu moo aminu kundue yamunggak.

²²Sike Buyambam tapata wamu takeaknga yaniwan nataaing amindakan kepdakane take yutning. Siwan ngana aminu Buyambam tapata meya paningge yanggau ayanikwasiwik.

²³Sike Buyambam tapata aminu tapatutane yuyukngae take natakengu ita akekekangaman kepi noman kunggak.

²⁴Aminu waapa apimake ngana meya dua kawik. Aho, Buyambam tapata katakngine take tangenawan kekeknga gatu yuwik.

²⁵Tupa na wawi matek ngana apmanu aminuake gwasit. Siwan ngana nata kawanu Anututa amin nomanu tapatue masa dua imunggak. Gatu amin nomanu tapatutane waatdakanata nanamu yamuningge dua yawan kaat. Wena siknga.

²⁶Asingganu aminu nomana apata musip kwikwik natayamuke sanga kwaapzang aminu kundue yamunggak. Yaman kake itane waakngata minga nana pasiwan apbakngakaing.

²⁷Gata waiaknga kuupbamde masa yamuyo. Yamuke noman takngakan tasiyo. Unzing tasikengu keu andakane take asinggan yuya.

²⁸Dasingge, Buyambam tapata aminu noman taknga tasikaing aminde take nataak. Sike aminu ie banip singgau sopuningge dua nataak. Aho, ita asingganu waaminu kakuya tasiwawan kepi noman takngane kukaing. Siwan ngana ita tasiwan wai amindane waatdakana apmea aatningu wai siknga asining.

²⁹Sike noman aminu keu Anututa yaman paking komune asinggan yutning.

³⁰Noman amin tapa natdetdetna take siwan wamu take akngakan yakapmanggak Wamu noman takngaekan yanggak.

³¹Anututane mama wamu itane musiaatang yuak. Yuwawan ita Anutue wam tawake dua tewik. Siakan, ita sukuke kepi saweknga apane dua pimapik.

³²Sike wai aminda akusopuke noman amin tapa apae wamayuaing. Wamayuke kepi atzipa kumningge yawakaing.

³³Siwan ngana Buyambam tapata amin nomanu dua kapewan wai aminda zipa kumning. Wena siknga. Sike wai aminda wam yak gwene takoke temapa ba yaning ngana Buyambam tapata noman aminu inaekan dua kapewik.

³⁴Gata Buyambam tapae banip sike natanggamatake tumuk wam inike itane kepi noman takngakan tawamso. Gata unzing tasiwinu umanda kopsa aknga akgamik. Siwan keu ita yakut komu atake yuya. Yuke kaawi ita wai aminu apasiwan maining.

³⁵Nata wai aminu tapatu musiptok asinggan natake kekekngana bamban tapa kakum. Siwan ita aminu ayapbikgak. Unzing katau dakatu baka binga buyambam takake katap notna yapbike yuaing binga.

³⁶Siwan ngana masande nata wagwak saak kukum. Siwan ngana aminu waapa undang dua yukut. Aminu waapae atawamba maikut. Siwan dua kakum. Wena siknga.