Proverbios 23:7-32

⁷Ar e-masde, gammugi-sailagia-megeyob gued. Bega sogoed: “Mas-gunne, gobe.” Degi-inigwele, gwen gwage-nuedgi bega sogosulid.

⁸A-sorbali, be bela mas-guchad agoed, ega be nuedgi-sunmaksadi, binsa be sunmakoed.

⁹Melle be dule-binsaedsulidaedga binsaed dako. Ega be ibmar-sogoedi, be-abin isdar-itogoed.

¹⁰Melle dikasurgus-nainu-abingunaidgi ibmar-ogwichismalad be oniro. Mer be dule-sergansated-e-nainugi dogbalo.

¹¹Ar wemar Dule-E-Bendaked-Gandikid nikad. Dule-sergansated-bendakegala, be-abin gwisguoed.

¹²Ibmar-durdaksadba be ibmar imake, binsaed-nued-uklegedi, be nue-itoge.

¹³Melle be mimmigan-odurdaksuli gue, molidubgi-bibyolegedba burgosulid.

¹⁴Ar bur be molidubgi-bibyogele, burgwed-igargi be ollor-imaknaid.

¹⁵Machi, be dule-binsaed-ibedga gunonikile, gwagegi an weligwar itomogoed.

¹⁶Be-sunmakedi, napiragwadba be sunmakele, ulubgi an yeer itononikoed.

¹⁷Melle be dule-isganamargi nobgue, bur be bane-bane Bab-Dummad-nug odummodii imake.

¹⁸Adi, yoedse bega ibmar nueganbi guoed, na be ibmar-edarbediid nikudapoed.

¹⁹Machi, nue be itoge, binsaed-nikaa be dae, igar-innikigwadbarbi be nanadii sae.

²⁰Dule-gadi-mumgumaladba mer be akae. Dule-gadi-masgunmaladba mer be akadii gubali.

²¹Ar dule-gadi-mumgumaladi, degi, gadi-mas-gunmaladi, dule-wilegedga gumaloed. Ar dule-gabedginbi-binsaedi, unnila mor-siir-siir-yoi gudiguoed.

²²Be-bab-we-napnegse-be-odenonikid be itoge, be-nan seredgusale, mer be isdar-dako.

²³Igar-napiragwad, nue-binsaed-nikagued, be amie. Ibmar-durdaked, nue-ibmar-wisigued, be amie. Wemala, mer be ibmar-baid-anar ogwao.

²⁴Dule-nued-e-baba na bela-bela yeer itoged. Dule na machi-binsaed-ibed-nikad, weligwar itoged.

²⁵Be-bab, degi, be-nan, werguega be imake. Be-sergan-we-napnegse-be-senonikid wergumalaga be imake.

²⁶Machi, an-bega-binsaed-dakdiidgi be binsae, an-nanadiid be dake.

²⁷Ar ome-gambanuchu-imakedi, yaa-dummad-matusursiidyob gued. Dule-baid-ome-galagwensur-nanaedi, dia-garagwad-matusursiidyob gued.

²⁸We-omedi, dule-atursaedyob matarmakdidaed. We-ome, machergan-bukidar-e-ome-dikarba-yolemalaga imaked.

²⁹Dule-mumgued-iedisulidi, dule-sisamar-galagwensuli-gobedi, boed amied, ibmar-nunmaked-itoged amied, urwed amied, isdar-itoged amied, binsa-nailikgued amied, ibya-gudure-gued amied.

³⁰Dule-mumgued-iedisulidi, dule-sisamar-galagwensuli-gobedi, deyob gued.

³¹Vino-gisi-daklesidaedbina mer be soge, vino-noggi-dakarmaksidaedbina mer be sogbali. E-goblegedi, nolloo gobleged.

³²Degi-inigwele, dubgi-warmakeyobi, be itogoed. Naibe-e-gichi-begi-ubodeyobi, be itogoed.