Proverbios 22:1-23

¹Aypalla gorita, guellayta charänanpa ruquin mas alliga caycan pï-maywanpis rejsinacushanmi, alli parlasha cashanmi.

²Rïcutapis pobritapis Tayta Diosllami rurasha.

³Alli tantiyacoj runaga mana alliman chayananpaj cashanta musyar witicunmi. Mana tantiyacoj runami ichanga mana cäsupaypa aywar fiyupa ñacayman chayan.

⁴Umildi cashpan, Tayta Diosta rispitaptenga Paymi camacächin chay runa ima-aycayojpis cananpaj, rispitasha cananpaj, alli cawananpaj.

⁵Fiyu runacunapa purinanchöga churaraycan trampacunawan cashacunallami. Alli cawayta munajcunaga chay caminupita witicunmi.

⁶Tacsha cashancama wamrataga sumaj willapay. Alli yachachiptiquega jatunyarpis manami gongangachu.

⁷Pobricunataga rïcumi munaynincho chararan. Jaga-tucojcunapapis guellayta ristajmi mandajnin ricacun.

⁸Fiyu runaga juchata rurashanpitami ñacanga. Chay-niraj runataga Tayta Diosmi castigar ushacächenga.

⁹Cuyapäcoj runaga bindisyuntami chasquenga pobricunata tarichishanpita, millgashanpita.

¹⁰Fiyu runata garguriptiquega chiquinacuypis, rimanacuypis, achäquita ashipänacuypis jamangami.

¹¹Rayga alli runata cuyanmi. Rasun cajta parlajcunawanga amïgutami ruran.

¹²Tayta Diosga yachajcunata yanapänanpämi ricapaycan. Llullacunatami ichanga manacajman churan.

¹³Guella runaga mana arunan-cashami nin: «Jircachöga liyunmi caycan. Micumaytami munaycan» nir.

¹⁴Majanta ganrachir jananpaj warmiga yanauyaycaj jatuncaray uchcunömi. Runapis Tayta Diosta mana wiyacoj cäga chaymanmi yaganga.

¹⁵Wamra-mösucunaga wichaypa uraypami yarpan. Chaypis astiptenga wiyacur tantiyacunmi.

¹⁶Rïcuyänan casha pobrita ñacachëga, ima-aycantapis rïcucunata goycöga pasaypami pobriyanga.

¹⁷Yachaj musyajcuna willapäshushayquitaga sumaj wiyacuy. Willapar yachachishäcunataga llapanta yarparay.

¹⁸Chaycunataga allipämi umayquiman churacunqui. Chay yachacushayquicunataga mana gongaypami yarparaycanquipaj.

¹⁹Llapan yarpayniquiwan Tayta Diosllaman yäracunayquipämi canan willapar yachaycächë.

²⁰Nogaga quimsa chunca (30) yachachicuytami yachachishcä. Chaynöga willapashcä yachaj canayquipaj, tantiyaj canayquipämi.

²¹Chay yachachishäcunami tantiyachishunquipaj rasun cajllata ruranayquipaj. Pipis tapucushuptiquega allitami willanquipaj.

²²Pobri cashan-raycu, pobri runataga ama suwapanquichu. Pïninpis mana caj runatapis autoridäcunacho ama ichiycachächinquichu.

²³Paycunapa faburnin Tayta Diosmi canga. Paycunata suwapajtaga Tayta Diosmi ima-aycantapis guechonga.