Ol Provep 22:1-23

¹Gore onaame ne ora epe aa kone sua adaa bi gialimi-daare gomere mone oyae adaapu imi aanu page rabuaniaye.

²Adaa Aa-me amo page naara onaa page luabu nipumi warisa.

³Epe kone sua redepone-rupa piri aame waeanu nipu madaa epea rabu nipumi pakeaaya. Go yapare epe-rupa napimi aanuri nimu pimi-para waeanu epea rabu nimumi go kedaa mua mea ritimi.

⁴Neme nena bi rabuaniawa ne Adaa Aa-na rolo-para pirali-daare ne mone oyaenu page adaapu sua epe-rupa pirali.

⁵Aa malopawa ma-oyaya yaere wae pora pamua pea. Aa meda nipu epe-rupa aapena niminaaliare waea pape pora pakeaya.

⁶Nena nogo naakinu epe pora ratina agaa maana mogeape. Goa paliri nipu go pora rataama pua nipu pua ogae yalia.

⁷Mone imi aanumi naraame ome aanu nimumi kogono kaloa surubeme. Aa medaloma yago meme-nuri mo yago meme aanuna kogono pama kogono pu saeme.

⁸Gore aa medame pupitagi noa aa medaloma madaa wae yae nipu madaa epalia rabu nipumi pa aa meda-para wala waea meda mada napalia.

⁹Adaa Aame mo pa piri aanu rabameme onaare oyae waru kata. Gore akolo ya? Naraa piri aanu rabamua oyae kateme-daa pea.

¹⁰Waea pi aakone aanu luabu ratu talimi rabu mo aa nimuna pemeanu rayo dia yalia.

¹¹Aa medame epe agaa loa Gote-na ini agaa madaa epe-rupa aayare gore mo aa mudu king-na adami aa piralia.

¹²Adaa Aa-me epe makuae kone luabu waru suruboa mo yaa agaa ne aanuna yaa agaa luabu rabuaniaya.

¹³Kiaa rakepene aa nipuna ada-para pama pirua nipumi gupa ta. Ni amaa palua rabu raa mena laiyonme porania ni tu nalia ta.

¹⁴Ona yolape kone saliri naaku-rupa lopo talia. Gore Adaa Aa ratu onaa madaa yawaliare go naakupara mada lopalimi.

¹⁵Nogo naakimiri maeyae aanu adaapu peme. Goa palimi pare neme mo nogo naakinu nimu aipuyame tua mana te-daare go palimide waeanu luabu mada gimalimi.

¹⁶Aa medame naraanuna oyae mulalo waea palia-dare go page mo amo ne aanu oyae ode kateadare go paliame nipu aa naraa piralia.

¹⁷Abiare epe kone imi aanuna epe makuaeyae-para epe redepone yae luabuna agaa lagiano waru pagalepa.

¹⁸Gore neme go agaa pagoa nena kone-para rubialia raburi neme mo onaa medaloma lakeloa mogeape. Goa paliri nena lo robaa raana rubialia.

¹⁹Nena bipa pagainalo go agaa apo lagialo-daa. Goa pua neme Adaa Aa madaa puri paboa kone waru rulainalo pea.

²⁰Neme go agaa 30-pela epe redepona tisudere ora epe kone gua makuae yae meainalo gisude.

²¹Goa pea-ga neme ora agaa luabu waru makuaaina. Goa pua aa medalomame ne-para ora redepo ne agaa pua asapa teme-daare mada pua meali-ya?

²²Neme go aa naraanu pa ora naraanu yade kone nasape. Goa pua neme nimuna oyaenu page pa yoloa nameape. Goa pua nimu koso talo epalimi rabu nimuna koso maoyaawa namabebolape.

²³Gore akolo ya? Adaa Aa-me nimu adabaawa surubalialo lalo. Go page aa medame naraa aanu-para wae palimi-dare Adaa Aa-me nimu-na waea mada abutea.