Proverbios 12:4-27

⁴Ome-innikidaedi, e-sui-nug odummoged. Ome-galagwensulidaeddina, e-sui-nug oichoged.

⁵Dule-innikidaed-e-igarmar-amiedi, ibmar-inniki-imakedgi binsaed. Dule-isgana-e-sunmakeddina, unnila emar-yardakedgi sunmaked.

⁶Dule-isgana-e-sunmakedi, emar-yardakar sunmaked, ablis-eogedgi sunmaked. Dule-nuegan-e-sunmakeddina, dulemar egi bendakleged amied.

⁷Bab-Dummad sulibinsa dule-isganamar-imaked, degidba berguddamalad. Dule-innikidaed-e-mimmigandina, gwen-berguosulid.

⁸Dule e-binsaed-nikaguedba, e-nug odummoleged. Dule-gwage-isgana-nikaddina, isdar dakleged.

⁹Dule-san-dummarba-imaked-masgunned-satedba, bur nuedid, dule-mesagwar-gudiid wis-e-mai-ega-ibmar-imaked-nikar.

¹⁰Dule-innikidaedi, na e-moli-nikad nued akwediid. Dule-isganadina, baisur e-ibmar daked.

¹¹Dule-sapurba-gadi-arbaedi, mas nikagudaed. Dule, dule-gegeganaba-gudiiddina, binsaedsuli gued.

¹²Ibmar-isganabina-surbinsa-itolegedi, dule-isganaga boniga gued. Dule-innikidaeddina, sapi-nued-durbamakgwichiyob gued.

¹³Dule-isgana na dukin gakansaar-sunmakedgi boni-amied. Dule-innikidaeddina, boniganse galakusulid.

¹⁴Dulemar-na-e-sunmakedba ibmar abingaed. E-ibmar-imakedba ibmar abingabalid.

¹⁵Dule-binsaedsulidaed na e-igar inniki-maiye bidaed. Dule-binsaed-nikarbaddina, unaleged-igarba ibsaed.

¹⁶Dule-binsaedsulidaedi, baisursunna uluddaed. Dule-itoakwaadaeddina, egi-dule-urwed igi-barsaye sogdaed.

¹⁷Dule-inniki-gudiid ibmar-napiragwad sunmaked, dule ibmar-gusad-gakansaar-barsogeddina, unnila gakanbi-sunmaked.

¹⁸Dule-yogasaar-sunmakedi, es-suidse-naibigulegeyob emar-imaked. Dule-binsaed-nikarbad-e-sunmakeddina, ina-nuedyob gued.

¹⁹Dule-ibmar-napiragwad-sunmakedi, sereddii megoed. Dule-gakanbi-sunmakeddina, sikwas gudii guoed.

²⁰Dule-galagwensuli-binsaedi, emar-yardakedgi binsaed. Dulemar-neg-bogidik-imakmaladdina, werguleged uked.

²¹Dule-innikidaedi, boniganse akar-guosulid. Dule-isganamardina, boniganse ibitomaloed.

²²Bab-Jehová dule-gadi-gakansamaladi, gwen-nabir daksulid. Dule-inniki-gudiiddi, nued daked.

²³Dule-binsaed-nikarbadi, ibmar-wisirba na san-imaksulid. Dule-binsaed-sulidaeddina, galagwensulidaed na oyoged.

²⁴Dule-gadi-arbaedi, negseoedid. Dule-wiegaladina, maiga gudii guoed.

²⁵Sulibinsa-itogedi, dule-gwage wioged. Gaya-nueddina, emar-weligwar imaked.

²⁶Dule-innikidaedi, binsaed-nued emarga uked. Dule-isganadina, e-isguedgi emar-oichoged.

²⁷Dule-wiegala masgunnedsuli gudidaed, dule-arbaegaladina, ibmar-nikagu daed.