Osee 2

1

2

3

4

5

6

7

8

9

10

11

12

13

14

¹Yinni Gusunɔ u Osee sɔ̃ɔwɑ u nɛɛ, sɑɑ yɑ sisi yè sɔɔ Isirelibɑ bɑ koo dɑbiɑ nɡe nim wɔ̃kun yɑni sɛɛri. Bɑ ǹ kpɛ̃ bu ben ɡeeru ɡɑri. Mi bɑ ku rɑ rɑɑ bu soku nɛn tɔmbu, miyɑ bɑ koo bu soku nɛ Gusunɔ, Yinni wɑson bibu.

²Yudɑbɑ kɑ Isirelibɑ bɑ koo mɛnnɑ sɑnnu kpɑ bu ɡoo ɡɔsi u n sɑ̃ɑ be kpuron sunɔ. Domi bɑ koo dɑbiɑ bu tɛriɑ tem mɛ kpuro sɔɔ. Yen dɔmɑ te, tɔ̃ɔ bɑkɑrɑ Yisirɛɛliɔ.

³Bɛɛ Yudɑbɑ kɑ Isirelibɑ, i sɔ̃ɔnɔ mɑ i sɑ̃ɑwɑ nɛn tɔn be nɑ kĩ.

⁴Nɛn bibu, i bɛɛn mɛro tɑɑrɛ wɛ̃ɛyɔ, domi u ǹ mɑɑ sɑ̃ɑ nɛn kurɔ, mɛyɑ nɑ ǹ mɑɑ sɑ̃ɑ win durɔ. I nùn sɔ̃ɔwɔ u de u win durɔ dɑmɑ nɔni yi wunɑ, kpɑ u sɑkɑrɑ kookoosu wunɑ win ɡɔ̃run di.

⁵Mɑ n kun mɛ, kon win yɑ̃nu potiri mɑm mɑm kpɑ n nùn yɔ̃su tereru nɡe mɛ bɑ kɑ nùn mɑrɑ. Kon de u n sɑ̃ɑ nɡe tem mi ɡɑ̃ɑnu ku rɑ kpi, kpɑ n de nim nɔru ɡu nùn ɡo.

⁶Nɑ ǹ mɑɑ bɛɛ win bibun wɔnwɔndu mɔ̀, domi bɛɛn mɛro u sɑ̃ɑwɑ sɑkɑrɑ kowo.

⁷U kurɔ tɑnɑru kɑ sekuru sɑriru dɔrɑ. Domi u nɛɛ, u koo win durɔ tɑnɔbu swĩiwɑ kpɑ bu nùn nim kɑ dĩɑnu kɑ tɑm kɑ ɡum kɑ yɑ̃nu wɛ̃ ni u koo doke.

⁸Yen sɔ̃, kon win swɑɑ kɛnɛ kɑ sɑ̃ki, kpɑ n ye dɑ̃ɑ sɛ̃suku kpɑ u kun mɑɑ win swɑɑ ye swĩi.

⁹Bɑɑ ù n dɑɑ yɑrɑ u win durɔ tɑnɔ be nɑɑ ɡirɑ, u ǹ mɑɑ bu nɑɑ turi. Bɑɑ ù n bu kɑsu, u ǹ mɑɑ bu wɑsi. Sɑɑ ye sɔɔrɑ u koo nɛɛ, ǹ n mɛn nɑ, ɑ de n wurɑ nɛn durɔ ɡbiikoon mi, domi nɑ rɑɑ nuku dobu mɔ win mi n kere tɛ̃.

¹⁰Mɛyɑ u ǹ dɑɑ ɡie mɑ nɛnɑ nɑ nùn dobi kɑ tɑm kpɑm kɑ ɡum wɛ̃ɛmɔ. Mɛyɑ nɑ mɑɑ nùn sii ɡeesu kɑ wurɑ tɑɑsi. Adɑmɑ u kɑ ye bũu wi bɑ mɔ̀ Bɑɑli sɑ̃wɑ.

¹¹Yen sɔ̃, kon ɡɔsirɑmɑ n nɛn dobi mwɑ yin ɡɛ̃ɛbun sɑɑ sɔɔ, kɑ tɑm mɛn sɑɑ sɔɔ kɑ sere yɑ̃ɑ ni u sebuɑ u kɑ win tereru wukiri,

¹²kpɑ n nùn sekuru doke win durɔ tɑnɔbun wuswɑɑɔ. Goo sɑri wi u koo nùn wɔrɑ nɛn nɔmɑn di.

¹³Kon win nuku dobu kpuro kpeerɑsiɑ kɑ tɔ̃ɔ bɑkɑ ni u rɑ ko suru kɑ suru kɑ tɔ̃ɔ wɛ̃rɑruɡiru kɑ sere mɛnnɔ si u rɑ ko sɑ̃ɑrun swɑɑ sɔɔ.

¹⁴Kon de win resɛm dɑ̃nu kɑ win fiɡiebɑ bu kɑm ko be u nɛɛ, u wɑ durɔ tɑnɔbun min di. Kon de ɡbee ni, nu ko dɑ̃ɑ sɔ̃ɔ, kpɑ ɡbeeku yɛɛ yi dɑ̃ɑ nin mɑrum di.

¹⁵Kon nùn sɛɛyɑsiɑ yèn sɔ̃ u mɑn deri u bũu wi bɑ mɔ̀ Bɑɑli turɑre dɔ̃ɔ dokeɑmmɛ. Mɑ u win sɑbɑ kɑ win tɑɑminu doke u dɑ u win durɔ tɑnɔbu swĩi. Nɛ, Yinni Gusunɔwɑ nɑ yeni ɡeruɑ.

¹⁶Adɑmɑ sɑɑ yɑ sisi yè sɔɔ kon nùn kɔkiri n kɑ dɑ ɡbɑburɔ kpɑ n kɑ nùn ɡɑri ko kɑ kĩru.

¹⁷Kon nùn win resɛm ɡbɑɑru wesiɑ te tɑ wɑ̃ɑ Akɔɔn wɔwɑɔ. Yĩsi ten tubusiɑnɑ nɔni swɑ̃ɑrun wɔwɑ. Yerɑ yɑ ko n sɑ̃ɑ win yĩiyɔbun tore, kpɑ u womu ko nɡe sɑnɑm mɛ u yɑrimɑ sɑɑ Eɡibitin di win wɔndiɑru.

¹⁸Yen tɔ̃ɔ te, u koo mɑn soku win durɔ. U ǹ mɑɑ mɑn sokumɔ Bɑɑli win yinni.

¹⁹Kon de u bũu wi bɑ mɔ̀ Bɑɑlin yĩsiru duɑri kpɑ u kun mɑm kpĩɑ u tu siɑ.

²⁰Sɑɑ yerɑ kon kɑ ɡbeeku yɛɛ kɑ ɡunɔsu kɑ sere yɛɛ yi yi rɑ kɑbiri ɑrukɑwɑni bɔke yi ku kɑ nɛn tɔmbu kɔ̃sɑ ɡɑɑ kuɑ. Kon de tɑbu bu kpe, kpɑ bɑ n wɑ̃ɑ bɔri yɛndu sɔɔ.

²¹Isireli, kon mɑɑ nun ko nɡe nɛn kurɔ sere kɑ bɑɑdommɑɔ, kpɑ n nun ɡem kɑ wɔnwɔndu kɑ durom sɔ̃ɔsi. Bɔrɔkiniru sɔɔrɑ kon kɑ nun ɑrukɑwɑni bɔke. Sɑɑ ye sɔɔrɑ kɑɑ wurɑ mɑ nɛnɑ nɑ sɑ̃ɑ Yinni Gusunɔ.

²³Nɛ, Yinni Gusunɔwɑ nɑ yeni ɡerumɔ. Sɑɑ ɡɑɑ sisi yè sɔɔ kon wɔllun kɑnɑnu nɔ, kpɑ n tu nim kɛ̃. Wɔllɑ koo tem kɑnɑru nɔ kpɑ tu ɡurɑ nɛɛsiɑ. Kpɑ tem mu dobi kɑ resɛm kɑ olifin kɑnɑru nɔ kpɑ ye kpuro yu kpi. Kpɑ yu Yisirɛɛlin bukɑtɑ wunɑnɑ.

²⁵Kon de nɛn tɔmbu bu sinɑ tem mɛ kpuro sɔɔ kpɑ n bu wɔnwɔndu kuɑ be, be nɑ rɑɑ yinɑ n wɔnwɔndu kuɑ. Kpɑ be, be bɑ ku rɑ rɑɑ soku nɛn tɔmbu, n bu soku nɛn tɔmbu. Kpɑ be, bu mɑɑ mɑn soku ben Yinni.