Ola Saam 89:12-37

¹²Yubin meigim nowath en sauth. Teibowa en Heman, det dubala bigwan hil sing langa yu gudbinjiwei.

¹³Yu na det brabli strongbalawan. Yu pawa im jidan nomo lilwan. Im brabli strongbala.

¹⁴God, yu jidan brabli haibalawan bos, en pipul sabi yu jidan bos raitwei en yu oldei gibit feyago. Olabat sabi yu filing blanga laigim olabat en det trubalawei blanga yu.

¹⁵YAWEI, detlot pipul hu oldei weship yu garram ola song, en hu oldei wokwok langa yu lait, olabat na jidan brabli gudbinjiwei.

¹⁶Dumaji blanga yu na, olabat oldei sing en toktokbat, en olabat preisim yu blanga det raitwei blanga yu.

¹⁷Garram yu pawa yu meigim melabat strongbala blanga win brabliwei. En blanga yu filing im laigimbat melabat olataim en meigim melabat gudbinji.

¹⁸YAWEI, yu na bin pikimat det king blanga lukaftumbat melabat jis laiga shild. Yu na, det brabli Holiwan God blanga Isreil bin gibit melabat ronwan king.

¹⁹YAWEI, longtaim langa drim yubin tok langa ol yu trubalawan wekinmen, “Aibin meigim dijan solja jidan strongbala garram big neim. Aibin pikimat dijan yangmen brom ola pipul blanga jidan haiwan king.

²⁰Aibin meigim main wekinmen Deibid jidan king wen aibin spilim det seikridwan oil langa im hed.

²¹Ai garra oldei album im, en main pawa garra oldei meigim im strongbala.

²²Im enami olabat kaan neba win en jidan bos langa im. Ola brabli nogudwan pipul kaan bidim im.

²³Ai garra binijimap im enami olabat, en kilim ded ol detlot hu nomo laigim im.

²⁴Ai garra laigim im en jidan trubala langa im. En mowa igin, ai garra oldei meigim im win.

²⁵Ai garra meigim im kantri bigwan, brom det Medatareiniyan solwoda raidap langa det Yufreitis Riba.

²⁶Deibid garra tok langa mi, ‘Yu main dedi en main God. Yu na oldei maindimbat en seibumbat mi jis laiga bigwan ston.’

²⁷Ai garra meigim im main feswan san, en det brabli nambawan king brom ol detlot najalot king.

²⁸Ai garra oldei kipum main pramis langa im, en main strongwan pramis garra jidan olagijawan garram im.

²⁹Im femili neim garra jidan olagijawan wulijim det skai. Brom im femili lain, king garra oldei jidan.

³⁰“Bat if olabat nomo teiknodis en bulurrum ol detlot lowa blanga main,

³¹en if olabat nomo dum wanim ai dalim olabat,

³²wal ai garra panishim olabat blanga olabat nogudbalawei. Ai garra meigim olabat ardimbat blanga olabat nogudbalawei.

³³Bat ai kaan stap laigimbat Deibid, en ai garra kipum main pramis langa im olagijawan.

³⁴Ai kaan breigim main strongwan pramis langa im, o deigimbek eni pramis aibin meigim langa im.

³⁵“Trubala dijan na det pramis aibin meigim garram main ronwan seikridwan neim. Ai kaan dalim laiya langa Deibid.

³⁶Im femili lain garra kipgon olagijawan. En ai garra oldei maindimbat det kantri weya im jidan bos wulijim det san weya im oldei shain olataim.

³⁷Im garra jidan olagija jis laik det mun, weya im jidan trubalawan witnis blanga mi langa skai.”