Ola Saam 81:6-16

⁶“Aibin deigimwei ola hebiwan loud brom yumob bekboun, ol detlot brabli adwek langa Ijip.

⁷Wen yumob bin abumbat trabul, yumob bin jingat langa mi en aibin seibum yumob. Aibin ensim yumob brom main haiding pleis deya langa det stom klaud. Aibin testimbat yumob deya langa det springwoda langa Meriba.

⁸Main pipul olabat, lisin langa main woning! Isreil, yumob nomo sabi haumatj ai wandim yumob blanga lisin langa mi.

⁹Yumob nomo lau weship eni drimin.

¹⁰Mi na YAWEI det trubala God blanga yumob hubin bringimat yumob brom Ijip. If yumob jidan trubala langa mi, ai garra gibit yumob ola gudbala ting, jis laik det mamiwan bard weya im gibit daga langa im beibi.

¹¹“Bat main pipul olabat nomo bin lisin langa mi. Ola Isreil pipul nomo bin wandi teiknodis langa mi.

¹²Aibin lafta larram olabat dum wanim deibin wandim dum dumaji olabat nomo bin wandim lisin langa mi.

¹³Brabliwei ai wandim main pipul olabat blanga lisin langa mi. If dei bina duwit langa mi,

¹⁴ai bina bidim olabat enami kwikbalawei. Ai bina bidim olabat garram main pawa.

¹⁵Detlot hu nomo laigim mi garra nildan bradinwei langa mi, en ai garra panishim olabat olagija.

¹⁶Bat if yumob teiknodis langa mi ai garra meigim yumob brabli bulap binji garram ola brabli gudwan sid daga en brabli switwan shugabeig.”