Ola Saam 41:1-10

¹Ol detlot pipul hu album ola powan pipul, olabat na garra jidan gudbinjiwei. YAWEI garra album olabat wen olabat abum trabul.

²YAWEI garra maindim olabat en nomo larram enijing hepin langa olabat. Im garra meigim olabat jidan gudbinjiwei langa det kantri. Im kaan larram detlot enami teikoba det kantri.

³YAWEI garra album olabat wen dei sik, en meigim olabat jidan gudwan igin.

⁴Aibin tok, “Aibin dum nogudwan ting langa yu, YAWEI. Yu sori langa mi en meigim mi gudwan.”

⁵Main enami olabat tokabat mi krulbalawei. Dei wandim mi blanga dai en fogedabat mi.

⁶Detlot pipul hu kaman blanga luk langa mi, olabat nomo trubala. Dei go en dalimbat stori blanga mi ebriweya.

⁷Ol detlot pipul hu nomo laigim mi, dei tok gija kwaitbalawei blanga mi. Dei reken mi sikwan dumaji aibin dum nogudbala ting.

⁸Dei tok, “Im brabli sikwan. Im kaan gidap brom im sweig enimo.”

⁹En main brabli gudfren weya aibin trastim brabliwei, en weya minbala bin sherimbat gija daga, im nomo laigim mi na.

¹⁰Yu sori langa mi, YAWEI, en meigim main bodi gudwan igin, en ai garra peiyimbek main enami olabat.