Ola Saam 39:2-11

²Ai nomo bin tok enijing. Aibin jidan kwaitwan nomeda aibin jinggabat blanga tok blanga gudbala ting. Bat aibin fil brabli nogudbinji.

³Aibin wori nomo lilbit. Wen aibin kipgon jinggabat, tharran bin meigim mi mowa nogudbinji. Ai nomo bin holdimbek miselp en streidawei aibin askim YAWEI,

⁴“YAWEI, haulong ai garra jidan laibala? Wotaim ai garra dai? Dalim mi wotaim main laif garra binij.”

⁵Yubin meigim main laif shotwan. Main laif im shotwan langa yu, en trubala orait, pipul jidan jis laik det win weya im blo en binij.

⁶Olabat binij kwikbala, jis laik det shedopat. Ebrijing weya pipul dum im jis najing. Olabat gin jidan ritjwan garram ebrijing tudei bat olabat nomo sabi hu garra gajim ol detlot ebrijing bambai.

⁷Bos, ai nomo wandim enijing mowa na. Ai libum ebrijing langa yu.

⁸Seibum mi brom ol main nogudbalawei. Nomo larram sili pipul mokimbat mi.

⁹Ai garra jidan kwaitbala. Ai kaan tok enijing dumaji yu na bin panishim mi en meigim mi jidan lagijat.

¹⁰Nomo panishim mi enimo. Mi garra binij dregli dumaji yu kilimbat mi.

¹¹Ai sabi yu panishim melabat blanga melabat nogudbalawei. Yu binijimap ebrijing melabat garram jis laik det badaflai weya im dagat klos. Trubala, melabat jis laik det win weya blo en im binij kwikbala.