Salmo 39:2-11

²Umbe, mibpereremek e zà, ne wazà ad megkaǥikaǥi. Iyan, wazà heini meketavang kedì su nasì en med-iseg is mesakit he egkeǥezam ku.

³Ne nesemukan utew is isip ku. Ne hein edtulungan ku en egngunngunua ke ebpedayun e ve he ebpereremek etawa kenà, ne nasì en med-iseg is kegkesemuki te isip ku. Umbe wazè ku en meeǥen is gehinawa ku; nekekaǥi a te,

⁴“Nengazen, petentenuzi nu kedì he zuen ketepusan te untung ku wey nevilang en is kahabet te menge andew te ked-ubpè ku; ipesavut nu kedì ke sengemenu zà keluǥayad is untung ku.”

⁵Utew zà mevavà is untung he imbeǥey nu kediey. Diyà te kenikew is keluǥayad te untung ku ne wazè din bali. Su is tutuu iyan heini: is untung te etew ne iring dà te keramag he edlavey zà,

⁶wey iring te alung he egkaawà. Utew egkesamuk is etew te menge vuluhaten he wazè din pulus. Edtiǥum sikandin te menge ketiǥeyunan, iyan, emun ebpatey en sikandin, ne kenè din en egketuenan ke hentei is egkepulusan dutun.

⁷Guntaan, Nengazen, wazè en duma he edseriǥan ku. Iyan ke zà edseriǥan ku.

⁸Ipelingkawas a te langun he menge salè ku, ne kenè nu ituǥut he sudia a te menge tulebung.

⁹Ebpereremek e en; kenà ad edriklamu, su iyan ka midrasey kedì.

¹⁰Guntaan, kenà ad kenikew siluti. Su henduen e en te ebpatey kayi te kebpeentusa nu kedì.

¹¹Ebmensuwen nu is etew pinaaǥi te kedsewaya nu kandin, tenged te menge salè din. Ne iring is ebeelan nu te kegketket su id-awè nu id-amin is mahalen he menge azen din. Tutuu iyan he iring dà te keramag is untung te etew su edlavey zà.