2Preisim det haibalawan neim blanga YAWEI. Nildan lida langa YAWEI, det brabli holiwan God.
3Wen YAWEI tok, yu gin irrim im oloba langa det solwoda. Wen det haibalawan God tok, im jis laik thanda. Oloba langa det solwoda na yu gin irrim im.
4Wen YAWEI tok im shoum im pawa. Im shoum im na det brabli haibalawan.
5Wen YAWEI tok im breigimap detlot strongwan tri, ol detlot strongwan sidatri na langa Lebanan.
6Im meigim detlot bigwan hil langa Lebanan jamparanbat wulijim gabigabi, en im meigim det bigwan hil gulum Heman jamp wulijim yangwan buligi.
7Wen YAWEI tok, im meigim laitining kamat.
8Wen YAWEI tok, im meigim det draiwan kantri sheiksheikbat nomo lilbit. Im sheikimap det draiwan kantri gulum Keidish.