Numero 16:27-35

²⁷Umbe, mibpekeziyù is menge etew puun dutun te menge tulda ni Kora, ni Datan, wey ni Abiram. Ne migawas si Datan wey si Abiram ne midhitindeg dan diyà te ǥemawan te menge tulda zan duma te menge esawa zan wey menge anak dan.

²⁸Migkeǥiyan ni Moises is menge etew te, “Pinaaǥi kayi egketuenan niw he iyan midsuǥù kedì is Nengazen te kebaal kayi he menge vaal, ne kenà kediey zà he suat!

²⁹Emun netural he kemetayen is ibpatey kayi he menge etew, ne wazè e ves suǥua te Nengazen.

³⁰Iyan, emun edhimu is Nengazen te egkein-inuwan, ne ebeka is tanà he ed-eveleng kandan he uuyag duma te langun he menge azen dan pehendiyà te kelibutan te menge minatey, ne egketuenan niw he heini he menge etew inselikwey zan is Nengazen.”

³¹Ne hein nekepasad si Moises he egkaǥi, mibeka is tanà he nehitindeǥan ni Datan wey ni Abiram.

³²Ne mid-eveleng sikandan duma is pemilya zan te tanà, duma is langun he menge sumusunud ki Kora wey is langun he azen dan.

³³Uuyag sikandan is langun he mid-eveleng te tanà duma is langun he azen dan. Nekedlikuey is tanà ne nahanew sikandan puun te kezekelan.

³⁴Is langun he menge Israilihanen he nekeliǥuy kandan mibpekeziyù hein nezineg dan is kulehian duen te menge etew, su neisip dan he kela ke elin sikandan evelenga te tanà.

³⁵Ne mibpengelinteuwan te Nengazen he medtuvù is hapuy ne neepur sikan is 250 he menge sumusunud ni Kora he nemuhat te veyewà.