36Balak vada e kamonai Balaam na e maimu, bena ia na Moab hanuana ela Aranon sinavaina isena ai, ena tano hetoana ai, bae hedavari eto.
37Bena Balak ese Balaam e hereva henia, eto, Gwau-kau na siaia, na boirimu ani? Dahaka dainai o gwau edeede? Lau na basina hanamomu diba a?
38Balaam ese Balak e haere henia, eto, Vada nama; to lau na asi siahugu hereva ta baina gwauraia; Dirava ese udugu ai baine atoa herevana, una mo baina gwauraia.
39Bena Balaam na Balak ida ela, Kiriata-husoto ai e kau.
40Bena Balak ese boubou ḡaudia e aladia, boromakau bona mamoe, Balaam bona ia e bamoa lohiadia ahudia e siaidia dekediai.