Ni been ree apóstoles 4:4-27

⁴Per dád zien ree bén bacaagdiajg ni rëb ree Bëd con Waj bililadx xtiidx Dios, gojc reeman cost gaay mil xinguiaaw xcwentqui ree béngunaa.

⁵Chi bareguiaal, guxtis Jerusalén në ree bengol në ree mextr rulüü ley, badoꞌp reeman loj ciuda guin.

⁶Në Anás bidxin yagaj, bén na̱j bixhioz mazri zojbloj rniabee graczi ree bixhioz, bidxin tëë bixhioz la Caifás në Waj në Lejandr, nëtëë gra ree bén na̱j lasaꞌ ree bixhioz rniabee guin.

⁷Gunabee reeman bicaꞌ reeman Bëd con Waj, abiꞌ bazuj reeman laa reeman galay lod rigaꞌ reeman, dxel gunabdiidx reeman loj reeman, rëb reeman: ―¿Chu banee diidxbee o chu por rüjndi ni guin?

⁸Per guial yuꞌ xSprijt Dios luxdoo Bëd dád gognëman laaman, zeel rëbaman: ―Gol bacaagdiajg ni ganin lëjt bengol në lëjt guxtis,

⁹rniabdiidxidi dunujn xhienaag baguieenan béngogxuu guin yudar, xhie tëë naag gojc zeel bayajcaman.

¹⁰Yanan lojdi din gagbeedi gagbee tëë gra bén Israel xhienaag bayajc bén zaꞌ lojdi. Bayajcaman por xguialrniabee Jesucrist bén Nazaret, bén bacaadi loj crüjz abiꞌ basban Dios laaman stijb.

¹¹Beennëdi laaman ziꞌc rüjn ree bén rüjn yu chi rbëëgoꞌn reeman tijb guiaj, dxel qui ragbeeri reeman guial guiaj guin na̱j ni mazri lasajc par gacnë yu guin.

¹²Achut ben ren rüjn dux tol ree perdon, tijbzi Jesús, din achut mazri guxhaal Dios loj guidxliuj din güünman dunuj ree perdon.

¹³Chi baguiaa ree guxtis guin ad rdxebt ree Bëd con Waj guial rniee reeman, abiꞌ gogbee reeman ad bén basiidt ree mazran achu tëët na̱j reeman, badxa loj reeman bayünbee tëë reeman laa reeman guial bén binal ree Jesúsan.

¹⁴Abiꞌ yagaj gajc zaꞌ bén bayajc guin, zeel ad bileꞌtri xhie niëjb reeman contr laa reeman.

¹⁵Dxel gunabee ree guxtis guin barii ree Bëd con Waj din yayaꞌn laaz reeman din gü reeman diidx.

¹⁶Rëb reeman: ―¿Xhienaag yaguieennëꞌ ree xin guin ree? Graczi ree bén Jerusalén ma ragbee milagr been reex. Abiꞌ ad zajct yarexuu ree.

¹⁷Per chitëë guireꞌch xtiidx Jesús, yachejb reex din diizd yan achutcziri loj guzaꞌt reex laax.

¹⁸Dxel gurejdx reeman laa reeman gunabee reeman chitëë churi loj guzaꞌt reeman Jesús, ad gulüü tëëri reeman xtiidxaman.

¹⁹Per badxiꞌ Bëd con Waj laan, rëb reeman: ―Lëjt gajc gol been xgab: ¿Zagdxe na̱j yazooban xtiidxidi luar yazooban xtiidx Dios ya?

²⁰Per ad zajct yacwëëz yaguieꞌchan gra ni baguiaan baguiejn tëën.

²¹Dxel bachejb ree guxtis guin laa reeman stijb, dxelri baslaa reeman laa reeman zia reeman guial ad badxejlt xhienaag nudëëd reeman laa reeman casti, din graczi ree bejn ruzaꞌt Dios zagdxe por ni goc.

²²Nadëd tiuu ijz yuꞌ bén bayajc guin.

²³Chi baslaa ree guxtis guin Bëd con Waj, baguiaj reeman lod rigaꞌ xcompniar reeman bén rliladx ree Jesucrist, abiꞌ be reeman diidx ni rëb ree bixhioz rniabee ree bixhioz në ree bengol rniabee.

²⁴Chi gulox bacaagdiajg reeman diidx ni be reeman, graczi reeman guzuloj cabejdx canab Dios, rëb reeman: ―Dad lüj rniabee gra, lüj na̱j bén been xanyabaa në guidxliuj nëtëë nijsdoo con gra ni yuꞌ loj reen.

²⁵Por xSprijt tëël gunee rey Davi diidx guie ree, chi rëbaman: ¿Chexc zeel ridxeꞌchnë ree bénguidxliuj Dios? ¿Chexc zeel rüjn reeman xgab ni ad rüjnt wen?

²⁶Badoꞌp ree rey në gra ree guxtis din su reeman contr dux Dad ree Dios në contr Cristo.

²⁷’Abiꞌ zian ma gojc, Herodes con Poncio Pilato con ree bén Israel nëtëë ree bén ad najt bén Israel, badxajg lasaꞌ reeman luguiedx guie persi guzuj reeman contr xiꞌnl Jesús, bén naya nali, bén bacaabeel.