Atos 4:4-27

⁴Kytsa sizubarẽtsa siharere ziwabykynahaze Sesus harere bo hyỹ nikaranaha. Sizubarẽtsa myobarakanaha. Aba Sesus tuktsa sĩko miutsa niyziknaha.

⁵Estuba zurunahaze Serusarẽhe ezektsa taparaktsa kapitaõtsa wa tsa sihyrinymyrytsitsa Moises harere soho, iwatsa Serusarẽhe bo izumubanaha kytsawabytsitsa izumubanaha

⁶Anas niwatihi izumu. Taparakta ziknapamykysokonahatsitsa tuk Kajapas, Aresãdere, Suão ustsa taparakta tukytsa iwatsa izumubanaha.

⁷Iwaze Peduru Suão ahatsa nasioktyhyknaha. Asa tihi: — Ikiahatsa myokeryk riktotaha! — niaha. Niytahi estuba tihi: — Aty zikwy humo sa iekbyrita tsizororowynaha. Aty sa tazikwy ty ahabo nyny niy iwatahi maku tsizororowy — niy.

⁸Niytahi Peduru Deus hyrikoso humo tsiharereziurẽta niyzik iwaze taparaktsa pe niy: — O taparaktsa kapitaõtsa watsa myhudikhudikwy mype.

⁹“Hawa sa iekbyrita tsizororowy” nikaranaha. Tsipinymyry tsihikiknaha ja

¹⁰Mopamykysoko. Sesus zikwy humo izororowy. Nasare ezekta humo izororowy. Ikiahatsa Sesus iharapatawyhyta humo tsihyrizikiknaha. Deus hi zihyrizikpowy. Iwatahi iekbyrita ahabaze niriktohoko. Deus harere botu ziwataha Sesus soho my.

¹¹“Harahare batu sapy mytsaty ahabyitsa tsimykaranaha taharahare kino ipamabikia mozik.” Ziwatahakaze Sesus harahare wata niy. Atahi batu imysapy kytsa mytsaty ahabyitsa nikaranaha, atahi myhyrizikwani niyzik.

¹²Atahi myzubaha humo mymysapywyky. Atahi zuba Deus bo mymyoktyhyryk. Ustsaktsa batu zikaha. Sesus zuba Deus bo myzubaha mymyoktyhyryk iwaze simysapyrẽtsa moziknaha. Ihumo sizubarẽtsa mysizororowy iwatsahi simysapyrẽtsa moziknaha — niy.

¹³Iwa Peduru Sudeutsa taparaktsa bo nitsasoko. Taharere humo batu isikpyby, iwatsahi taparaktsa paikpa iktsa nikaranaha. Taha bo zuba mytsaty nikaranaha: — Amo sa atakta batu isikpyby mybo nipamykysoko. Peduru, Suão ahatsa papeu humo tsikaeni zuba sihyrinymyry. Sinamybyitsa asahi Sesus tuk zikzurukunaha — mytsaty nikaranaha.

¹⁴Taparaka niekbyrita tu sibaze niriktohoko. Iwatsahi taparaktsa batu harere. Anahi nitsaso tsihikiknaha batu zikaha. Tapara niekbyrita humo batu amy tohi iharere ziktsasonaha.

¹⁵Iwatsahi Peduru itukta ape baze nisipehaka. Niahatsahi taparaktsa asa zuba nipamykysokonaha: — Hawa sa tsimaha — nikaranaha.

¹⁶— Hawa sa tsimaha kytsa tuk. Anatyhi kytsa batu zikaha asaktsa niaha. Serusarẽhe ezektsa sihyrinymyrẽtsa. Taparaka niekbyrita tu zizororowy naha humo hi zihyrinymyrykynaha. Iwatsahi batu tyso “O maku ty batu tyzororowy” mybarapetu tsimykaranaha zeka sizubarẽtsa Sesus soho piwabykynaha. Iwaze hawa sa tsimaha

¹⁷Iwaha hi kytsa batu tywaby. Mytahabetsakiknahaktsa! — niaha. Katsa tihi: — Sesus soho ty sosobyitaha. Sesus soho tsinapamykysozo naha zeka tsipahasininiwykynaha! — mykaranaha. Iwa asa zuba nipamykysokonaha.

¹⁸Iwaze Peduru itukta Suão bo hua huazo niaha. Nisibetsakaknaha: — Kytsa batu isty hyrinymyry zikaha Sesus soho ty tysoso byitaha! Sesus soho tsimypamykysokozonaha zeka tsipahasininiwynaha — nikaranaha.

¹⁹Peduru tatukta tuk sibo nitsasokozo: — Hawa sa wasani mytsaty tsimykaranaha. Deus harere bo yhỹ tsimykaranaha. Ahaharere bo yhỹ tsimykaranaha. Hawa sa wasani tsipiwatawykynaha. Hawa sa Deus okzeka wasani mykara. Sesus soho kino tsimypamykysokonaha hỹ — niy.

²⁰— Sesus nihyrikosokdaze tsinynaha. Iharere tsiwabynaha. Iwatsahi tyso byizeka batu wasani tsimaha. Iwatsahi Sesus soho tsimypamykysokonaha hỹ — niy.

²¹Taparaktsa kapitaõtsa watsa ziknapamykysokonahatsa kino niwatihi ispezo niaha: — Sesus soho ty soso byitaha! Sesus soho tsimypamykysokonaha zeka tsipahasininiwykynaha — nikaranaha. Niahatsahi: — Nabo pãotaha! — niaha. Kytsa pokso batu mysisininiwykynaha batu zikaha nisisukehik zuba niaha. Myzubaha Deus bo nipamykysokonaha. — O Deus ikia hi tsamysapyrẽta — nikaranaha. Nipamykysokonahaze taparaka niekbyrita tu Deus humo zizororowy.

²²Maku taparaka niekbyrita tu nitsaikbata. Nizororota kuarẽta anos. Iwaze Peduru itukta Suão ahatsa Sesus tuktsa bo ziksizonaha.

²³Ziksizonahaze Sesus tuktsa bo nipamykysokonaha. Hawa ziknapamykysokonahatsitsa taparaktsa kapitaõtsa watsa kino niwatihi sibo nipamykysokonaha. Iwaze Peduru harere ziwabykynahaze sizubarẽtsa Deus bo nipamykysokonaha.

²⁴Asa hi: — O Deus myzo ikiahi nanabyri tsikzukniki wytyk, bijoikpe, buburu zuba iwa tsikzukni. Tsizubarẽna ikiahi tsikzukni. Mybarawy tsikzukniki.

²⁵Tubabatu taparakta mydiri Dawi aharere humo tispirikporẽta. Atahi atsumuẽhĩtsa niyzik. Tubabatu ahyrikoso humo nitsasoko: “Amy humo sa Sudeutsabyitsa tahakyrikinaha. Ustsa tyryktsa niwatihi zimyijakanaha Deus zihudidukyzykynaha.

²⁶Sipehakatsitsa inazuzukuknahaze Deus zihudidukyzykynaha, Kiristu apeha niwatihi iharere bo batu hỹ nikaranaha”.

²⁷Iwatahi Erodes, Piratus, Sudeutsa, ustsa tyryktsa iwatsa tahudikhudikwy eze inaharapekypykbanahaze simysapybyitsa nikaranaha. Atsumuẽhĩtsa Sesus tsimysapyrẽta ihumo tahakyrikinaha. Atahi iwatawyhyta Kiristu apehata my.