Hechos 4:4-27

⁴Per zieny de bniety ni bcuadiag xtiidxdeb güeldilaazdeb xtiidx Dios ax pur irate de ni reldilaaz xtiidx Dios, agucdeb zecti gaay mily bniety nguiu, chiy irɨnquɨ de bniety gunaa.

⁵Chi bragueel stuby dxi, bdxasaa de gurtisy xte Jerusalén cun de bɨngul cun de maistrɨ ni nán ley.

⁶Néza Anás bxoz ni rnabee lo de bxoz, cun Caifás, cun Juany, cun Lijandrɨ cun irate de nguiu ni rac xfamily bxoz ni rnabee lo de bxoz.

⁷Chiyru gunabeedeb chacáadeb Bed cun Juany ax bzuubdeb laadeb glay, chiy gunabdiidxdeb laadeb: —¿Tú xtidxbee, o tú pur runtɨ de cosquɨ?

⁸Chiyru zec ni quesentiand rbezné Bed Spíritu Sant, ax guniib: —Gulcuadiag guibtɨ de gurtisy ne de bɨngul Israel.

⁹Laaguibtɨ canabdiidxguibtɨ dunnɨ xa bdxacnén bniety ni biac niini, xa guc biacbɨ.

¹⁰Pur ningui nez lo iraguibtɨ idixteen par gacbeeguibtɨ ne par gacbee irate de bniety Israel, dec bniety nguiuré zuguaab rurén nez lo iraguibtɨ abiacbɨ pur guelrnabee xte Jesucrist de Nazaret, lagac Jesucrist ni bcuaaguibtɨ lo cruzy, Jesucrist ni gubíi gusbány Dios stuby.

¹¹Abannéguibtɨny zec ni run de albanily chi rbeguundeb tuby guia, ne chi gald racbeedeb dec guiaqui ná ni mazru sac par izuubdeb yuu.

¹²Anre ziyza quɨtru tu purti gac bniety perdón soltisy pur Jesucrist, te pur Dios quɨtru tu bnietti bxiaaldny lo guɨchliu par gún perdón dunnɨ.

¹³Chi guná de gurtisy quɨt rdxibti Bed cun Juany par iniideb, ne chi gucbeedeb dec quɨt tu náti Bed cun Juany, quɨt xi xcuelrooti güedeb, ax rdxalodeb. Chiyru bambeedeb dec laadebɨy cuandzanédeb Jesús.

¹⁴Ne cun né bniety nguiu ni biac de niini zuguanédeb ruy parzi quɨtru xi nialeeti niniideb pur laadeb.

¹⁵Chiyru gunabeedeb idiia Bed cun Juany par biiandeb laaizdeb cayueedeb diidx.

¹⁶Chiy guniideb: —¿Xa xquel idxannén de bnietquɨ? Irate de bniety ni rbez Jerusalén nándeb dec abaandeb milagrɨroo, an quɨt xo iniitin dixúngui.

¹⁷Per an par quɨtru irɨɨch xtiidx Jesucrist lo bniety, güenru idildnéndeb, ichibnɨdeb te par desde anre aquɨtru tu lo bnietti chazeetdeb Jesucrist.

¹⁸Chiyru gurɨdxdeb Bed cun Juany, raipdeb laadeb dec quɨtru tu chaliuutideb xtiidx Jesucrist niclɨza quɨtru tu loti chazeetdebny.

¹⁹Per Bed cun Juany cuaibdeb: —Lagac laaguibtɨ gulgaanyguibtɨ xgab. ¿Ta ná güen icuadiagnɨ xtiidxguibtɨ xlat ni icuadiagnɨ xtiidx Dios?

²⁰Per dunnɨ quɨt chaleeti isaannɨ iniin ni agunán ne ni abindiagnɨ.

²¹Ax gubíi gudildné de gurtisy laadeb stuby, chiyru bldádeb laadeb. Quɨt bdxiaaltideb xa niundeb castigu laadeb, te pur irate de bniety rnii de diidx zaac lo Dios pur milagrɨ ni gucqui.

²²Ne bniety nguiu ni biacqui más de cuarent iz anuub.

²³Chi bldá de gurtisy Bed cun Juany, zéacdeb rut zuguaa de sanireldilaazdeb Jesucrist. Chiy gudixteedeb irate ni gunii bxoz ni rnabee lo de bxoz cun de bɨngul.

²⁴Chi bindiag de bniety sanireldilaazdeb Jesucrist ni guniideb, iratecdeb gurɨdx gunaabdeb lo Dios, ax guniideb: —Xtadnɨ Dios ni rnabee, laabiu ná ni banchuubiu yabaa, guɨchliu, nisdoo ne irate ni nuu lo guɨchliu ne lo nisdoo.

²⁵Ne ziyza pur Spíritu Sant xtenbiu bdiia de diidxré ruu rey David chi guniib: ¿Xínii rdxichné de bniety guɨchliu Dios? Ne, ¿xínii rundeb de xgab ni quɨt illiú?

²⁶De rey ne de gurtisy xte de guɨdx tubyzi bdxasaadeb par baandeb contrɨ Xtadnɨ Dios ne contrɨ Crist xtenny.

²⁷’Ne anre ziytispac aguc, Herodes cun Poncio Pilat bdxasaadeb láani guɨdxré cun de bniety Israel ne cun de ni quɨt ná bniety Israel. Ax baandeb contrɨ llingaanbiu Jesús ni ná sant ni bxiaaldbiu.