Loc Hechos 4:4-27

⁴Mei íadɨ aillo afe úrillauai cacádɨno ɨ́ɨnotiaɨoɨ. Afena ɨ́ɨnotɨmacɨ danɨ ɨíñɨaɨ facádua cinco mil áɨnomo dúcɨde.

⁵Afe jɨáɨruimo Jerusalemo judíuaɨ illaɨnɨ, éinamacɨ, naa ocuícafue llófueraɨnɨri gaɨrídiaɨoɨ.

⁶Afe llezica afénomo lletáriraɨnɨ illaɨma Anás ite. Afe dáanomo ite Caifás, Juan, Alejandro naa lletáriraɨnɨ illaɨnɨ comɨ́nɨri.

⁷Iemo Pedro Juan dɨga atɨ́tatiaɨoɨ. Atɨano íaɨoɨ cɨ́gɨmo naidáneta jɨcánotiaɨoɨ: —¿Nɨe rɨ́inodo bífuiaɨ fɨnódɨomɨcoɨ? ¿Bu mámecɨdo bífuiaɨ fɨnódɨomɨcoɨ?

⁸Mei jira Pedro, Ñuera Joreño úicaigamɨenaza daɨde: —Naɨraɨ illaɨnɨ, Israel éicomɨnɨ, omoɨ cácarei.

⁹Mei afe baie ɨráredɨmɨemo como fɨnoca ñúefuena jɨcánotɨomoɨ. Mei nɨɨe izói afémɨe jíllotaga daɨí daɨdɨ́omoɨ.

¹⁰Mei jira omoɨ uiécomo jino uáfodo llóitɨcoco, nana Israel naɨraɨ fɨdɨ́illena. Afémɨe omoɨ uiécori Nazaret ímɨe Jesucristo mámecɨdo, omoɨ coráɨcamɨe mámecɨdo íocɨre ite. Afe coráɨcamɨe (Jesucristo) tɨ́illanomona Juzíñamui meine abɨdo cáatate.

¹¹Bie Jesús omoɨ jofo níraɨnɨ oni dotaca jofocaɨ izóidɨmɨe. Mei íadɨ afecaɨ uálliraɨna jáizaide.

¹²Nɨe jɨáɨmɨemo jíllonafue iñede. Jesucristo jɨáɨe daɨítade jíllotaraɨmana caɨmo iñede, afémɨedo caɨ jílloillena. Ua nana énɨemo daɨítade jíllotaraɨmana iñede, —jaca dɨnori Pedro daɨde.

¹³Iemona rɨ́imacɨ Pedro Juan dɨga méaicaiñeno úrillafue cacáillano, íaillɨnoɨ llófueñegaiaillɨnoɨ íllana fɨ́dɨa llezica, ɨere fáɨgacaidiaɨoɨ, jamáimɨeillɨnoɨ illa jira. Iemona rɨ́imacɨ bíaillɨnoɨ Jesudo macádɨno daɨí íaillɨnoɨmo úibicaidiaɨoɨ.

¹⁴Afe emódomo jíllotaga aɨdaima dɨnomo íaillɨnoɨ abɨri naidaide. Ie jira aféfuena jáanoicana daɨínide.

¹⁵Mei jira gaɨrídɨnomona íaillɨnoɨna oni orédiaɨoɨ, danɨ jofo conímamo íaɨoɨ úriacana jira.

¹⁶Daɨdíaɨoɨ: —¿Bie ɨima íaillɨnoɨna nɨe izói ñéitɨcaɨ? Mei jɨɨ, nana Jerusalemo bitɨno bie cɨóraɨnina onótate raa íaillɨnoɨ fɨ́nuafuena onódiaɨoɨ; mei aféfuena jáanonidɨcaɨ.

¹⁷Mei íadɨ mai íaillɨnoɨ caɨ jácɨdolle, afefue comɨ́nɨdo jamánomo jalléiñellena. Afedo íaillɨnoɨna ráiruitɨcaɨ, Jesús mámecɨdo ja benómona batɨne úriñeillena, —daɨdíaɨoɨ.

¹⁸Mei jira íaillɨnoɨna jɨ́ɨritiaɨoɨ. Iaillɨnoɨ dúcɨdemo ocuídiaɨoɨ: —Jesús mámecɨdo jɨɨ mai due jiza úriñeno iri. Afe daɨí llófueñeno iri, —daɨdíaɨoɨ.

¹⁹Mei íadɨ Pedro Juan dɨga uai ote: —Juzíñamui uiécomo nɨ́ɨfue baɨmo ñuena comecɨ omoɨ faca: omoɨna ñue caɨ cacáreillena, nɨbaɨ jɨáɨfo Juzíñamuina ñue caɨ cacárellena.

²⁰Mei jɨɨ caɨ cɨ́onafue caɨ cacánafue dɨga aféfuemo úrillana fáɨcanidɨcaɨ, —daɨde.

²¹Mei jira rɨ́imacɨ íaillɨnoɨna jácɨdotiaɨoɨ. Ie mei íaillɨnoɨna zuitádiaɨoɨ. Iaillɨnoɨ duere fɨnóllɨfue baiñédiaɨoɨ; nana comɨnɨ afe fɨ́nua jira Juzíñamuimo ióbioidiaɨoɨza.

²²Afe cɨóraɨninafuedo jíllotaga aɨdaima, afémɨemo cuarenta fɨmona baɨmo ite.

²³Pedro Juan dɨga íaillɨnoɨ zuitaina mei íaillɨnoɨ nabáiñɨaɨ illánomo jáidiaillɨnoɨ. Dɨnomo afémacɨmo nana lletáriraɨnɨ illaɨnɨ éinamacɨ dɨga íaillɨnoɨna dáɨnana llotíaillɨnoɨ.

²⁴Aféfuena cacáillano nana dáanomo Juzíñamuimo úritiaɨoɨ. Daɨdíaɨoɨ: —Caɨ Ocuíraɨma, O Juzíñamuina; mona, énɨe, monaillai naga ráanɨaɨri fɨnódɨmɨedɨo.

²⁵O Ñuera Joréñodo, o táɨjɨtagamɨe Davido daɨdɨo: ¿Nɨbái mei náɨraɨaɨ caillɨ́oidiaɨoɨ? ¿Nɨbái mei comɨnɨ táɨnofuiaɨmo comecɨ facádiaɨoɨ?

²⁶Enɨe illaɨnɨ Juzíñamuina ie Cristo dɨga anáfenuaɨbitiaɨoɨ. Daje izói jofue illaɨnɨ Juzíñamuimo ofídiaɨoɨ ie Cristo dɨga áfedo afémɨemo fuiríllena, —daɨde.

²⁷‘Uafue bie jófuemo Herodes, Ponico Pilato dɨga o nɨ́fuenide Jitomo fɨeni gaɨrídiaɨoɨ. Afénomo jɨcánemacɨ Israel comɨ́nɨri fɨeni gaɨrídiaɨoɨ, mei íadɨ omo jaɨnáidɨmɨe Jitó illáɨmana ja jáitatɨo.