Muqâqiŋ Dâŋ 6:6-28

⁶Ŋic roroc qaŋqaŋne jaŋe fiu qoʒazaŋ jaŋere eebapa honerâ maŋɋârâŋ bâfuanʒepieŋ.

⁷Fiu qoʒazaŋ jaŋe soŋaŋ micne me ŋicwofuŋ me guriŋ bapafâc‐jeŋic aricne,

⁸erâ sifu hoemaŋ dameŋte manasuhuc nânâ wiac‐jeŋic ʒoaŋ dameŋkoa ro qâzuc eeŋgopieŋ.

⁹Ŋic roroc qaŋqaŋne e mo dameŋko ojoŋ juju‐ticne moc beheocmu? Me wezimucko moc faharerâ gie baocmu?

¹⁰E ʒiŋuc hâcne muekac: “No me ʒâʒâfic qarâ guŋ piticne mac fope.”

¹¹E iŋuc muhuc guŋ fohame roroczi ʒikaŋic jaŋe iŋucne ututuŋ jaha fisicnerâ bawahaocmu.

¹²Ŋic repic qapicne â sindaŋ hârindaŋne jaŋe gibioc dâŋ muhuc jueŋgopieŋ.

¹³Ehuc esâic‐ŋopaniŋte ʒâŋe bazuc eŋareeŋgopieŋ â kikezi âte ʒifuŋ‐ŋopaeŋgopieŋ erâ mezi sâsâc eŋareeŋgopieŋ.

¹⁴Jaŋe iŋuc ehuc hehesic bâfuaniŋte maŋzi dâŋ manasu biric eeŋgopieŋ, ehuc doc bapa gie bahuc jueŋgopieŋ.

¹⁵Jaŋe iŋuc eeŋgopieŋte sisipiriczi ututuŋ jaha fisi‐jarerâ bâsirowec‐jopame mocwâc mi juniŋmu.

¹⁶Wofuŋ e eebapa 7 kecʒiŋuc jaŋere maname mamakâcne eha râsi ejareekac: Pepec ʒâŋe fifi, micbipiczi wokemaŋ dâŋ mumu, ŋic bahacmâc qâqâhâmoc‐jopa, dâŋ repicne manasu biric ee, wiac hehesicne ezore fâro hata rara, dâŋgieo domahuc dâŋ muhasickerâ burec ee, erâ âgo ŋondeŋko juhuc iiriac â kikisâ bâbâfua.

²⁰Motec‐mae, go mamacgere sâcmutâc dâŋ mana rereŋ ehuc juzemec, erâ wâc neŋgocgezi wiac qazu‐garewec irec moc mi nikecguzejec.

²¹Go dâŋjekic maŋgao râetec foha paŋʒâic jaha bajuzemec.

²²Ehame hata ira me ira racmurâ jowa qataŋ egarezejec, ehuc ŋafeo ŋezicguzejec â ʒoaŋko wâc baficguzejec.

²³Sâcmutâc dâŋjekiczi lambe iŋucne tamae‐garezejec, â mumutiŋ dâŋjekiczi juju hata biaŋne irec fuŋne gaza mutâc ezejec.

²⁴Sasec ŋokac jaŋerao qohotazicte me ŋokac gâcne jaŋere wokemaŋ dâŋzi bâdocguzacte jahere dâŋzi hâcne aka sâcne hegareocmu.

²⁵Ŋokac hawari‐jeŋic biaŋne izi mi woricguzejec, me ʒâŋe rârâqâc honecgupie ririfirerâ mi docke‐jarezemec.

²⁶Ŋic moc e hata ŋokac nânâ poroŋ mocjaha maczi furine bazo murâ baocmu, mâc boe sau gie bapazi ine juju‐ticne fârine sipiricke‐fâreocmu.

²⁷Go ʒocmimiŋ hâpohaŋtec ŋaqige akickeocmu me?

²⁸Me ʒoc kine fainao âtehaŋtec kikege mi ʒaocmu me?