Muqâqiŋ Dâŋ 4:2-13

²Wiac qazu‐ŋareekopac i biaŋne sasawa, irec manasuhuc junʒepieŋ.

³No neŋgoc mamac jahec‐nane jahere motec wârâŋne mocsâkoa juhape

⁴mamac‐nanezi wiac qazu‐narewec. Ehuc dâŋ ʒiŋuc naza jujec: “Dâŋ gazaekopac sâc irec ninikec moc mi bâbâfua manasuhuc juzemec. Erâ sâcmutâc dâŋnane mana rereŋ ehuc sâcne juhâc qâhâmocmu.

⁵Go maŋɋârâŋ â maŋzi wiac mana utuckehuc mamana tara i bâfuazemec, ehuc dâŋ gazaekopac i mi qâsuazemec.

⁶Go maŋɋârâŋ mi râpeckecmuo ine izi hâcne sapecguocmu, â mana maŋ ecmuo ine soŋaŋguocmu.

⁷Manakic, go maŋɋârâŋhec ecmurâ ʒoɋac sâko ezemec, ʒoɋac izi hâcne maŋɋârâŋhec jujure fufuŋkene ekac. Go wiac irec me irec mâcne, maŋzi wiac mamana tara irec manatec furi sâko eha bâfua‐jâmbâŋkezemec.

⁸Maŋɋârâŋ dâŋ mana maŋ etec izi ʒâŋe biŋe sâko bâfua‐garezejec, â maŋzi hâpo heâroŋ ecnetec eri qoqonaŋge eocmu.

⁹Go iŋuc etec eri hendiŋ â eriduge eocmu hâcne.”

¹⁰Motec‐mae, go dâŋnanere hazec râec, ehuc dâŋ gazaekopac sâc manatec fârine eha bajuhuc dameŋ ʒora jufezemec.

¹¹No maŋɋârâŋte fuŋne gaza gowatuc epo, ehuc siocmâc jujure hatao jowacgupo.

¹²Irec go hatagao rahaŋtec wiac moczi aka moc mi hegareocmu â gasackerâ racmuo ine kikege wâc mi fâfâckeocmu.

¹³Wiac qazu‐garekicne irec manasuhuc juzemec, â mamana bâfuameŋ izi hâcne jujuge dopeckeekacte biaŋne soŋaŋkezemec.