Erubasa 4:2-13

²Meupiya is penurù ku keniyu umbe kenè niw iselikwey.

³Siak, hein batè e pa, is budtung he anak te ginikanan ku, pinelanggà a te iney ku.

⁴Mibpenurù a te amey ku. Migkeǥiyan e zin te, “Ipurung nu itaǥù diyà te isip nu is menge penurù ku. Layun nu tumana is menge suǥù ku su wey mebmeluǥayad is untung nu.

⁵Peniguduwi nu he maangken nu is ketau wey kedsavut. Kenè nu lipati is menge lalag ku kenikew, ne kenè nu heini suwayi.

⁶Kenè nu iselikwey is ketau, kekenà, mahala nu heini su iyan heini ebantey wey ed-elima kenikew.

⁷Is ketau etawa is kedsavut iyan utew impurtanti he kinahanglan te etew, umbe penigudu ka wey nu maangken heini minsan maamin pa is langun he azen nu.

⁸Mahala nu utew wey tipiǥi nu is ketau, ne pinaaǥi kayi egkevantug ka.

⁹Iring heini te kuruna he menge vulak he ebpekeveǥey kenikew te kekempet wey zengeg.”

¹⁰Mama, pemineǥa nu wey tumana nu is menge egkeǥiyen ku su wey ka luǥeyazi te untung.

¹¹Mibpenurù ku en sikew ke ebmenmenuwen is kebpengungubpaan he egkezumahan te ketau wey kebpurungpurung.

¹²Emun edtumanen nu heini, wazà egkehimu he velavag te kebpengungubpaan nu, wey wazà mezaat he egkehitavù kenikew.

¹³Pekezeseni nu te egawed is penurù ku; kenè nu ituǥut he maawà diyà te kenikew, pekeventayi nu su iyan heini untung nu.