Mumutara Ŋic 20:18-39

¹⁸Iŋuc erâ Israe ŋic jaŋe Bete haeo ferâ Anutu wiocnehuc mumbiŋ: “Nâŋeraonec guru wenimoizi bânie‐nâreme Benjamiŋte guru jopazo fenaŋmu?” Eme Wofuŋzi muwec: “Judare guruzi bâniezejec.”

¹⁹Eme hae fureme Israe ŋic jaŋe faharerâ Gibea hae râsi fisicneniŋte hae mendâŋko teuŋ âtembiŋ.

²⁰Ehuc Gibea hae somâckehuc orâŋkerâ fombiŋ.

²¹Ehame ʒoaŋ ira Benjamiŋte guru jaŋe Gibea haeonec waharâ Israe ŋic 22 tauseŋ jopambiŋ.

²²Iŋuc fuame Israe ŋic jaŋe ʒoɋac erâ ʒika fuŋkehuc orâŋkembiŋ mâreŋ ŋondeŋ ijaha mocwâc orâŋkerâ fombiŋ.

²³Eme Israe ŋic jaŋe Bete haeo ferâ Wofuŋtao kio wâwâsic ehuc juhapie hae ŋafeme Wofuŋ mu wioc ecnehuc mumbiŋ: “Benjamiŋte guru âgofâc‐nâŋec râsi mocwâc fisi‐jarenaŋmu me?” Eme Wofuŋzi muwec: “Sâcne, ferâ râsi fisi‐jareniŋ.”

²⁴Eme hae fureme Israe ŋic jaŋe Benjamiŋte guru râsi mocwâc fisi‐jarembiŋ.

²⁵Ehame ŋifec Benjamiŋte guru jaŋe râsi rojarehuc Gibea haeonec wahambiŋ. Ehuc Israe ŋic 18 tauseŋ jopambiŋ. Ŋic jopakicne jaŋe ʒika‐jeŋichec sasawa.

²⁶Iŋuc fuame Israe momori ŋic sasawa jaŋe Bete haeo ferâ Wofuŋte maio kio wâwâsic ehuc nânâ sowa juhapie hae ŋafewec. Iŋuc ehuc qowi bâzi â wama bâzi rikecnembiŋ.

²⁷Dameŋ ira Anuture ʒâʒâfic katapazi Bete haeo ŋejujec. Eme Aroŋte ŋosa Pinehasi, Eleaʒare ŋokâ hâcne, e dameŋ ira taha bapa juwec.

²⁸Ehame Israe ŋic jaŋe Wofuŋ mu wioc ecnehuc ʒiŋuc mumbiŋ: “Nâŋe Benjamiŋte guru âgofâc‐nâŋec jopanaŋte mocwâc fenaŋmu me sifu behenaŋmu?” Eme Wofuŋzi muwec: “Feniŋ, no tomâcko meŋeŋicko râec‐jopapemu hâcne.”

²⁹Irec Israe guru jaŋe ŋic gâcne Gibea hae somâckeniŋte râec‐jopambiŋ.

³⁰Eme hae mocwâc fureme Israe ŋic jaŋe Benjamiŋte guru râsi fisi‐jarerâ bâbâni embiŋ iŋuc ehuc Gibea hae mocwâc orâŋkembiŋ.

³¹Ehame Benjamiŋte guru jaŋe Israe ŋic jopaniŋte haeonec waharâ rambiŋ. Eme Israe ŋic jaŋe eatuc‐jopahuc wisepie bâjâpec‐joparâ rambiŋ. Ehuc bâbâni embiŋ irec sâc ehuc hae sahao Israe ŋic jâpec‐jopa raku Bete â Gibea hae hata sosohoc‐jekicko ira ŋic 30 jopambiŋ.

³²Ehuc Benjamiŋte guru jaŋe mumbiŋ: “Bâbâni bawahac‐jopambeŋ iŋuc bawahac‐jopaŋgopeneŋ.” Ehame Israe ŋic jaŋe ine mumbiŋ: “Nâŋâc eatuc‐jopahuc wisepene hae beherâ hatao fânʒepieŋ.”

³³Iŋuc murâ Israe ŋic jaŋe dodoma‐jeŋickonec âte sue rarâ Baali‐Tama haeo birickembiŋ. Eme Israe ŋic gâcne Geba haere ʒoaŋ huhunaopec ira somâ râerâ fombiŋkonec quruŋ herâ faharembiŋ.

³⁴Eme Israe guru sâc irecnec ŋic 10 tauseŋ bâwosâec‐jopakicne jaŋe Gibea hae râsi ecnehuc fisipie ʒikazi ɋârâŋke‐jâmbâŋkewec. Ehame Benjamiŋte guru jaŋe sisipiriczi bâmbeŋ‐joparâ fowec i moc mi ʒâŋitambiŋ.

³⁵Ehame Wofuŋzi Israe ŋic jaŋere ʒâŋe faio Benjamiŋte guru bawahac‐jopawec. Eme Israe ŋic jaŋe ʒoaŋ ira Benjamiŋte guruonec ŋic ʒika‐jeŋichec 25 tauseŋ â 100 jopa miziembiŋ.

³⁶Iŋuc fuame Benjamiŋte guru jaŋe dockembiŋ hâcne. Eme Israe ŋic jaŋe ŋic gâcne Gibea hae somâckerâ foniŋte râec‐jopambiŋ jaŋe manapaŋ‐jopahuc Benjamiŋte guru hae hejarembiŋ.

³⁷Eme somâ râerâ fombiŋ ŋic i jaŋe bâruŋ jaha Gibea haeo ferâ ŋic ŋokac ʒikazi imac‐jopambiŋ.

³⁸Erâ Israe ŋic guru sâko â ŋic gâcne somâ râerâ fombiŋ jaŋere ma ine hae turuŋkepie ʒahuc hosâc sâko fahareocte musereckembiŋ.

³⁹Eme guru sâko jaŋe honerâ ʒika qaniŋte forisiembiŋ. Ehame Benjamiŋte guru jaŋe fuŋkerâ jâpec‐jopa raku Israe ŋic 30 jopambiŋ. Ehuc ʒiŋuc mumbiŋ: “Bâbâni ʒika qahuc ejarembiŋ irec sâc imac‐jopaŋgopeneŋ hâcne.”