MII GUN MIINU MO 2:4-44

⁴Dhali uni ’baar mo ’tu’dkunu mo ki Shi/in Dheleladhelel mo dhali ṯel gwo ’pen mo mmowal ’twan tiya mo mmo’bitha Shi/in uni is mo mmowal ’twa/ ki she/ ki she/ mo be.

⁵Dhali ’Kwani Yahuuda/ kun ’kon e Pa Urushaliim kun iiyin ’peni bampan tiya ’baar mo ki ’beles kun ’kon ’baame’da ’ceshi momis mo. Uni ta ’Kwani Yahuuda/ kun ḵo/kina Arumgimis mo.

⁶Ki to yan ciḵkunu mo tani awaambuhany ’kwani tulki isi monṯal ’de/ mo dhali dumbulkin kagahara mo haali/ aris ’kwani ’baar mo ciḵki uni ’twa/ mo mmowala uni ’twam buni ki she/ ki she/ ka ’deṯe/ ’deṯe/ mo.

⁷Dhali uni ’baar merkin kagahara mo dhali kulum gwo ibwa mo dhali o gwo mo ki: Hili ma. ’Kona uni ki ta ’Kwani gi Pany Jaliil ’taa aris uni ’baar kun o gwo kana?

⁸Dhali ana ciḵa gwo, aris ana ’baar ka ’deṯe/ ’deṯe/ ki ’twam bana ki she/ ki she/ uni kun dhotha ana manakan?

⁹’Kwani gi Pam P̱arṯiya mo dhali ’peni Pa Maadi mo dhali Pa Iilaam mo dhali ’kwani kun ’kon e pa ma uḵa ’cesh jin tana dhan yi’deya ḵara’b mo dhali Pa Yahuudiyya mo dhali Paŋ Kappadukiyya mo dhali Pam Punṯus mo dhali Pan Asiyya mo.

¹⁰dhali Pam P̱arijiyya mo dhali Pam Pamp̱iliyya mo dhali Pam Masir mo dhali ushi bampa/ gi Pa Libiyya mo kun ’kon is ’ko’d ’peni Paŋ Kerawaan mo dhali yilkina/ ’peni Pa Ruumiya mo kun ta ’Kwani Yahuuda/ mo dhali kun ’koki ta ’Kwani Yahuuda/ mo tani hili gwo ma Arumgimis butha uni mo.

¹¹’Kwani gi Paŋ Kariiṯ mo dhali ’Kwani gi Pa Arab mo. Ana ciḵa gwo mmoṯora uni gwo ki ’twam bana ki dhan mii ma Arumgimis kun caaca mo.

¹²Dhali uni ’baar mo merkin dhali mol toŋ kamu/ mii mo dhali mmo/o gwo mo ka rem ’kup̱ ki: Ata yan wakan mo?

¹³Hili kun tiya miikin ka maḵ mo mmo/o gwo mo ki: Uni ’tu’du/ mo ki yimana mura’th jin ta jin this jin ḵa/u ki ŋah ŋah mo be.

¹⁴Hila Buṯerus doshki’d ki mis nyaḵki uniŋ ’kume’d i’ce’dka ’de/ mo dhali a’di ’de’k ’twa/ mo dhali ṯor uni gwo mo mmo/o gwo mo ki: Um ’Kwani gi Pa Yahuudiyya mo dhali um ’baar mo kun ’kon e Pa Urushaliim mo. Dhalki a’di yan mishu mo e bwam um mo dhali dhuyi ’cem bum mmociḵ gwom pem mo ma.

¹⁵Haali/ gwahan ’kon ma su ki ’kosh mo me’d jin ṯosha um mo haali/ mo ta’da tente/ jin aṯẖa’d naskina/ mo.

¹⁶Hili yan ta a’di jin okin ma manc̱i gwo ma Arumgimis kadhamo/ jin yuḵu ka Yu/iil mo ki:

¹⁷Dhali ka cim jiŋ ’ko’d jin okin ma Arumgimis mo tani aha/ mina gac̱ Shi/in pem ap̱owa ris ’kwaniny’ceshi ’baar mo. Dhali iya/m bum dhali i’bwa/m bum uni mini o gwo is mo, dhali washan bum mini p̱ar tonyjan e mo, dhali dhan ’kwanim bum mini shu’b jan mo,

¹⁸nye dhali ap̱o/ c̱iŋkinaŋ ’kwani kun yolu/ mo dhali c̱iŋkinan nyara/ ka cim gwansan mo tani miga/ gac̱ Shi/in pem mo dhali uni mini o gwo is mo.

¹⁹Dhali aha/ mina ṯora dhan mii kun caaca e momis ’peni bwam momis mo dhali momer e mony’cesh ’pena ’cesh mo dhala bas dhali o’d dhala wulp̱e/ ma ku’d mo.

²⁰Atente/ minu war mo ki mondhurumi’d mo dhala ppe ka bas mo nṯwa/a/ ka cim gi Tap̱a midi p̱u’du/ mo dhana cim yan jin mishu kagahara mo

²¹dhali a’di midi war ki a’di yin jin midi yuḵ gway Tap̱a mo tani a’di iminu woṯẖ mo be.

²²Um ’Kwani ma Israyiil, ciḵi gwo gwansan mo ma. Yesus gi Pa Naasira jin maŋ ma Arumgimis ibwam um ki mii kun ’bitha’bi’th dhali ka dhan mii gun caaca mo dhali momer kun miikin ma Arumgimis e a’di e bwam um me’d jin mishkina um mo.

²³Yesus yan mmoc̱inu a’di ki bwa ma Arumgimis ka ḵar/eŋ gana/ mo dhali mmomishkin ma Arumgimis nṯwa/a/ mo tani um ’koshki a’di jwa mo ki cwany’ciṯẖan dhul mo dhali a’di ’koshkina um jwa mo ka dun ṯorony ki jwam ’batha’d me’d ’kwani gun ush gwoŋḵan jin c̱inu mii mo.

²⁴Hili Arumgimis ki ’de’k a’di imis mo mmo’cuḵa a’di a’di ’pena nyor wu mo haali/ a’di molkunu bu’th mo e mowu kan mo. Haala Dawuu’d o gwo gom a’di ki:

²⁵Aha/ hilkina Tap̱a isa yempa/ ibwambori jis/em pem mo haali/ a’di di’d e me’da bim poros pem ki aha/ yisa minu joc̱ mo yisa.

²⁶A’di ’borkika/ bwa mo dhali ’twam pem ’kunyki’d mo. Bwam pem si’da/ midi c̱a’b ka ’teŋ kap̱e/ mo,

²⁷haali/ /e mini diki dhala ḵashiram pem ’pen eya Haawiya mo dhali /e si’da/ mini diki dhal Amanḵogum pini mmop̱ar momp̱u/ e mo.

²⁸Bway mondiki/e ṯora /e aha/ eya tente/ mo. /E mini ’tu’d mom’bor bwam pem si’da/ ki bwam/em pini mo.

²⁹Awaḵ pema, aha/ mina ’taki o um gwo ki nyanye/ goma Dawuu’d jin ta’da dhana baban dhamo/ mo, a’di jin wuki’d mo dhali kankunu si’da/ mo dhali moŋ’kup̱ajem piti di’di ana ntaga cim yan mo be.

³⁰Mmotana a’di amanc̱i gwo ma Arumgimis kadhamo/ mo tani dhali mmomisha a’di gwo jin on ma Arumgimis mmothul a’di me’da p̱o/ ki a’di midi kar emen pitiŋ kamu/ e ḵursin tap̱am piti mo tani

³¹a’di mishki’d iṯwa/a/ mo dhali oki gwo si’da/ gom mompinu ma Ḵrisṯẖos ki a’di yisa dhalkunu ’pen mo eya Haawiya yisa dhali shuman is piti yisa p̱arki momp̱u/ e yisa.

³²Yesus yan ’de’kkin ma Arumgimis imis mo tani ana ’baar tana iman/o gwo gom a’di mo be.

³³A’di mmokaru a’di ki ca e me’da bim poros ma Arumgimis mo tani dhali mmobutha a’di gwo ’peni Com jin onu is gom Shi/in Dheleladhelel mo tani a’di gac̱ki’da pije/ mo a’di yan jin misha um mo dhali jin ciḵa um si’da/ mo.

³⁴Haala Dawuu’d yisa seki momisa. Hili a’di o gwo mo ki is piti mo ki: Tap̱a ki o gwo e Tap̱am pem mo ki: C̱a’bi /e aha/ ki me’da bim poros pem mo

³⁵ntagi aha/ mina dhu ’kup̱ pini e cwa gi mondhu sho’k pini mo be.

³⁶Dhalka waḵ ’Kwani ma Israyiil ’baar mo mish mo mo ka jiŋ gana/ ka Arumgimis kar a’di ki Tap̱a mo dhali ka Ḵrisṯẖos si’da/ mo, a’di jin ta’da Yesus yan jin ’koshkina um ki cwany’ciṯẖan dhul mo.

³⁷Dhali ki uni ciḵki gwo yan mo tani uni suka gwo adum buni mo dhali owa Buṯerus mo dhali imandhun ma Yesus ki shen tiya gwo mo ki: Ikam bamma, am mina miiya ta mo?

³⁸Dhala Buṯerus ki o uni gwo mo ki: Rici adu is mo ma dhali miiyi ki yi’de/ ki gway ma Yesus Ḵrisṯẖos mo, aris umi ’baar mo ki ’beles gom miinthus bum minu gwam um mo. Dhali um mini buṯẖ Shi/in Dheleladhelel jin ta a’di jin c̱inu ki me’d mo.

³⁹Haali/ gwo jin onu is mo tani, a’di onu gom um mo dhali uc̱im bum mo dhali goma ris uni ’baar mo kun si’dkin mo be, aris uni ’baar mo kun mina Tap̱a Arumgimis bana iyuḵ i a’di mo be.

⁴⁰Dhali gwon tiya ka ris ṯora a’di uni mo dhali mmomalas uni mo mmo/o gwo mo ki: Woṯẖi/ is bum ’peni ’kwani kun tana nyaḵum yil bum kun ta thus ki thus mo.

⁴¹Yan’ko’d uni si’da/ kun bu’th gwom piti mo, uni miikunu ki yi’de/ mo dhali uni maru is ka cim yin mo ’kwani ka ris wari wana e ka alaap̱i kwara mo.

⁴²Dhali uni ’kon mmoroc̱ sho’k ki sule/ e gwo kun ṯora imandhun ma Yesus ki she/ mo dhali e mombuṯ si’da/ mo, mmo’ce’d maaŋḵuthu’d mo be dhali e mon’tho si’da/ mo be.

⁴³Dhali moŋḵogu di’da p̱o/ aris uni ’baar ki ’beles mo. Dhali miimer dhali mii kun caaca kun tana ris mo tani miikina imandhun ma Yesus ki she/ mo be.

⁴⁴Dhali uni ’baar mo kun gam gwo is mo nyaḵki ’ko mo dhali nyaḵ to dhu ’baar mo.