Aposel 2:4-44

⁴Ana Holi Spirit ye prapra sikausi tongo, ye mambuno bogl ka kanekane dingwa i Holi Spirit dinaglmedi ormere yomba ka di menda endingwa.

⁵Enge igle Juda yomba tau Jerusalem meglkwa, i ye God dembiye siteingwa yomba, ye dumo bange bange meglkwa wu makai singwa.

⁶Mundungwa ikra yomba merkinde pirtre ye wu makai sindre ana kinano yei pirngi dingwa yomba ka dingwa i pirtre ye waikiglkwa. Sraglpre, yomba i suwarandi ye yene kanno mina nunguno embriye dingo ye pirkwa.

⁷Ana yomba nangino kogl keglango ere yegl dingwa, “Yomba ka dimeglkwa i prapra Galili yomba moglkrim kana?

⁸Ana i sraglmere orko nono suwarandi kanno perepere pamere ikra dimeglko nono prumune?

⁹Ana nono kantri Patia ya, Midian ya te Elam; te nono distrik Mesopotemia ya Judia; te provins Kapadosia ya, Pontas ya te Esia yomba nono igle mounga.

¹⁰Te distrik Prigia ya, Pamfilia ya te kantri Isip; te distrik Libia yomba tau ye Sairini kamun mangigl meglkwa, ana nono Rom yomba tau ama wu suna igle mounga.

¹¹Nono Juda yomba ya te yomba tau Juda yomba mambunono pamere duglo beglkwa yeingo, ana tau ailan Krit ya te distrik Arabia yomba, nono prapra punga; i God kongunmo giglendi orkwa i kamo ye nono kanno pamere-pamere kuno ere dingwa.”

¹²Ana ye prapra sipuglodi nomano suwo suwo yei yene mina krapeglkwa, “Taragl erikwa i sragl mambuno pamda?”

¹³Ba yomba tau bakagl gaugl eretendre yegl dingwa, “Ye wain kor nuglo merkinde nendre ana du erikwa.”

¹⁴Ana Aposel 11 wagle bogl Pita akiye andigl meglko ana ye mambuno ere ka kande di yomba merkinde meglkwa i yegl ditongwa, “Ene Juda yomba ya te yomba wu Jerusalem suna meglkwa, na taragl i mambuno ditenaglka, i ene wakai ere pirpogl siyo.

¹⁵Yomba magl meglkwa i ye wain gigle dungwa nendre, ana du erimedi ene pirkwa, ba tamanga. Erme tangina kinde ande kuiya 9 klok orkwa.

¹⁶Taragl orkwa i okuna propet Joel dumere erme wu plau dungwa,

¹⁷“‘God yegl dungwa, Enge dundinagledi mangigl eran na taragl yegl eraglka, na Spiritna toindi yagl ambu prapra mina endinaglka. Ene wano ya amburo propet mereyegl ere na kanna dinaglkwa, ene nangro yagl gakmugl wagle ama sragl ongumutno-mugl eran kanaglkwa, ana ene neno kindagl wagle ye uglkumbu kanaglkwa.

¹⁸Ana enge igle na Spiritna toindi konguna yagl ambu mina akiye endimbo, ana ye propet mereyegl mogltre na kanna dinaglkwa.

¹⁹Kamun kua mitna imbo na kimagl kanekane erimbo, te makandle igle diu gaglebogl plau dinambuka, ana bormai ya endi donga te endi inge kande plau dinan,

²⁰ana ande akemim eran te ba akegogl ere wu bormai koglo enambuka, taragl yegl eran, okuwo Yaglkande unambuka engemo kande ya te ambuglangemo i plau dinambuka.

²¹Ana taragl yegl erambuka enge, yomba ta Yaglkande wedi kangiye dagl morambuka, i God ere-inambuka.’

²²“Israel yomba, na ka dina erika i ene kinano yei piryo! Yesus Nasaret nem, ye mina God yombuglomo tongo ana ye kongun giglendi ya kimagl kanekane ya diu ene meglmara suna orkwa i enene prapra kanigura. I God diendungo ye ume dinaglmedi pre yegl orkwa.

²³God yene kamkand eragledi di panduglmara pre ana yagl i tekoglo ene mina endungo ana yomba kinde akeple dingo ene ye ipi endi-prak mina buglo-nil si pandiglkwa.

²⁴Ye goglkwa, ba God ikor endungwa, te ye giu kanekane indre goglkwa i God ikorugl endungwa. Sraglpre, geglkwa mambunomo i yombuglomo ta panan Yesus ake morambuka ta kuno erekrukwa.

²⁵Devit okuna ye pre yegl dungwa: “‘Na kaninga, Yaglkande engenge na moglmara gumanamugl moglkwa. Sraglpre, ye na onguna wokra moglkwa, ipre na kundugl ta goglkraglka.

²⁶Ipre na munduna argan orko gunyei ka wakai dinga, ombugl na okuwo wakai moglpai eraglka ipre poglodi pir sugl moraglka.

²⁷Sraglpre, ene na kanwinge etn giglpene ta pai moglkraglka, te ene Yomban Holi Moglkwa Suwara i ta kanwinge etn nangiye giglpene ta buglkrambuka.

²⁸Ene kor-meglkwa konbo i na ombunodi natnga, ene mambutn mina na gun yenaglka i sikausi naratnga.’

²⁹“Angrima wagle, nono kowano King Devit ikra pre na kundugl goglkre dipene ende ene tenaglka. Ye goglko maugl singwa, ana ye giglmo pene erme nono mounara yei pangwa.

³⁰Ye propet ta moglkwa, ana taragl okuwo ta panambuka ipre God kaima ka dipandigl Devit tongo ye pirkan orkwa. God yegl dungwa, ‘Okuwo king Devit gawan ta morambuka, ye usuglosi ene king motnere yegl morambuka.’

³¹God taragl erambuka i Devit kan kondungwa, te Mesaia gogltre andigl ukor enambuka ipre Devit yegl dungwa, ‘Makandle geglkwa mambuno i mina ye ta goglkrambuka, ba andigl ukor enambuka, te ye nangiye giglpene maugl mina ta buglkrambuka.’

³²God eremogl Yesus goglko ikor endungwa, ana no taragl orkwa i kaima kamga pre no ka i dinongugl endumga.

³³Yesus ukor pindre ana ende heven pi God ongo wokra moglkwa. Ana ye Nem okuna Holi Spirit tenagledi ka dipandigl dungo pamara pre ye Nem mina indre ana erme toindi no mina endungo, ana Holi Spirit i yombuglomo ene pirtre kandre erikwa.

³⁴Ana Devit ye ende heven ta pikrukwa. Ba ye yegl dungwa, “‘Yaglkande ka yegl di na Yaglkandena tongwa: “Na onguna wokra igle ene amedi moglo.

³⁵Ene igle mogl emin ana na kundan ikine yendimbo katn mina atnekra moraglkwa.” ’

³⁶“Yeglpre, ene Israel yomba prapra piryo, yaglmo Yesus ene ipi endi-prak mina sigeglkwa ikra, God erme ere endungo ye Yaglkande ya Mesaia akiye moglkwa!”

³⁷Ana yomba ka yegl dungwa pirtre ye deno munduno yumbun dongo ana ye krapogl Pita ya aposel tau teingwa, “Angrima wagle, no sragl eramne?”

³⁸Ana Pita yegl ditongwa, “Ene suwara suwarandi nomano yake tendre ana Yesus Krais kangiye mina baptais erimbi ana God ene tandaglmeno koko endinambuka. Yegl erimbi God munduwo argan pre Holi Spirit yoko tenan ene inaglkwa.

³⁹God okuna Holi Spirit tenagle dipanduglkwa ikra ene ya, nangro ya te yomba koglkoglo meglkwa i prapra Yaglkande, no Godno aglendi inambuka yomba ana Holi Spirit tenambuka.”

⁴⁰Pita ka tau giglendi merkinde dungwa, ba yomba bitno-kano ake ka yegl dungwa, “Ene kanpogl siyo. Aglau eran yomba mambuno kinde erikwa bogl ene akiye yumbun i-dinaglmiwa, ene ende eglke wiyo.”

⁴¹Ana Pita ka dungwa i pirngi dingwa keunde ye baptais eriko ana ande enge igle yomba nambano 3,000 mereyegl wu ye mina ainingwa.

⁴²Ana aposel wagle ka beke nerimbi piramnedi ye enge mere yombuglo ere prapra wu makaisi kaiya mokna ya bret bukondi nendre ana nomano suwara yei kamange erikwa.

⁴³Ana aposel wagle kamambuno dimara i God kimagl kanekane orko ana yomba prapra kandre nomano mina kundugl geglkwa.

⁴⁴Ana yomba Krais wedi pirngi dingwa ye prapra makaisi mogltre ana sragl kanekane ta kan neingwa imakaisi yumbusi ere neingwa.