Hechos 2:4-44

⁴Ne iratedeb guleznédeb Spíritu Sant. Chiy guzulo rueedeb irɨnquɨ de ditsa zec ni rcaaz Spíritu Sant iniideb.

⁵Láani de dxiqui, Jerusalén zuguaa de bniety Israel ni zéed iranezte par itodeb Dios.

⁶Chi bindiagdeb ni gubi ax bdxasaadeb par güeguiaadeb, chiy quɨt racbeetideb xi xgab gúndeb pur ni cad tubydeb rindiagdeb ditsa xtendeb.

⁷Quesentiand rdxalodeb ne bdxibdeb ax guzulo rnabdidxsaadeb: —¿Ta gati de bniety Galilea ná irate de bniety ni cayuee diidx?

⁸¿Xínii rindiagnɨ rueedeb ditsa xte cad tubynɨ?

⁹Rurén zuguaa de bniety ni zá Partia, de bniety ni zá Media, de bniety ni zá nez Elam, de bniety Mesopotamia, de bniety Judea, de bniety Capadocia, de bniety Ponto, de bniety Asia,

¹⁰de bniety Frigia, de bniety Panfilia, de bniety Egipto, de bniety Libia ni ná nez Cirene, de bniety Roma. Nuu de bniety Romaqui guldeb Israel ax rbezdeb Roma, nuuzadeb bniety Romapac laadeb, per lo religiony xte de bniety Israel nuudeb.

¹¹Ne ziyza rurén zuguaa de bniety Creta, cun de bniety Arabia. Per iratecnɨ racbeen xi de milagrɨ cayun Dios, te pur cayueedebni cun de ditsa xtennɨ.

¹²Iratedeb quesentiand rdxalodeb, ne ni quɨt racbeedeb xi xgab gúndeb ax guzulo rnabdidxsaadeb: —¿Xi zelo ni cayac ruc?

¹³Per stuudxdeb guzulo rundeb burlɨ, rniideb: —A no rzuzdeb.

¹⁴Chiyru guzuldí Bed cun dzɨ tsɨbtuby de apóstol, ax guniib diip: —De bniety Judea, ne irate ni rbez Jerusalén. Gulcuadiag ne gulgacbee ni iniia laat.

¹⁵De bnietré quɨt rzuztideb zec ni cayuntɨ xgab te pur teste rca gaa sidooni,

¹⁶sino que cayac ni gunii profet Joel, laab guniib:

¹⁷Dios guniiny: Teru idzɨny dxi ni ixiaalda Spíritu Sant xtena par cueznény irate de bniety. Ne de llingaantɨ cun de llindxaaptɨ laadeb iteeddeb xtiidxa ax sniideb cún ni guedgac. De llingaantɨ zienzi ni iliulo lodeb, ziyza de bɨngul zienzi ni inixcaalddeb.

¹⁸Láani de dxiqui ixiaalda Spíritu Sant xtena par irate de ni cayun xtsɨɨnia zeclɨ nguiu ne zeclɨza gunaa, ne steeddeb xtiidxa par iniideb cún ni guedgac.

¹⁹Sliuua laat de cos ni idxalot yaa llayabaa, chiy lo guɨchliu iliuua laat de seny zec xte rɨny ne bal cun de zá guux.

²⁰Gubidx scayni. Chiy bueen zacni zec rɨny, anste idzɨny dxiroo ne dxi nasaa ni gueed Dios ni rnabee.

²¹Ne tutix bniety ni inaab lo Xtadnɨ Dios, laany zunny perdón laab.

²²’Anre gulcuadiag ni iniia laat de bniety Israel: Laat nántɨ dec Jesús de Nazaret, laany gucny tuby bniety ni bxiaald Dios ax baanny de milagrɨ nez lot cun iraloteru ni rdxalo bniety zec tuby seny par gacbezaactɨ dec laany beedny pur Dios.

²³Desdɨ gulo agac nanchuu Dios xi gunnét Jesús. Laat güenaaztɨny ax baantɨ entriaguny lo de bɨny mal par gutyny lo cruzy.

²⁴Per Dios gusbánny laany stuby, gucnény Jesús lo guelguty te pur guelguty quɨt napti guelrnabee zecac Jesús.

²⁵Ne chi gunii rey David de diidx pur Jesús laab guniib: Llillite gunáa zuguané Xtadnɨ Dios nare. Laany zuguaany lad naldí xtena par quɨt xi idxibia.

²⁶Pur ningui quesentiand rzaclaaza ne rniia de diidx zaac par Dios. Ne masquɨ gatia quɨt rdxibtia,

²⁷te pur laabiu quɨt isáantibiu almɨ xtena láani baa, niclɨ quɨt isaantibiu gúudx tɨɨx lliinbiu ni quɨt runti duld.

²⁸Abliuubiu nare xnez guelnabány. Quesentiand saclaaza ibanynía laabiu.

²⁹’Gulsaan iniia laat cún ni ná didxldí. To David gutybɨ ax bgaatsbɨ ne baa xtenbɨ zeczi rguiaarun axt hórandxire.

³⁰Per David gucbɨ tuby profet xte Dios, ax nánbɨ dec gunii Dios lo de xfamilbɨ idiacá Crist ni inabee.

³¹Ziy xquel guc, David lazu caguiaab desde mazru gulal cún ni gac, ax guniib dec sbíi ibány Jesucrist, ne guniizacbɨ dec almɨ xtenny quɨt yáantiny láani baa niclɨza quɨt gúudxti tɨɨx Crist.

³²Ne anre Dios agusbánny Jesús, iratecnɨ nan testigu.

³³Arbez Jesús llayabaa lad naldí xte Dios. Ne abdeed Dios laany Spíritu Sant zec ni gunii Dios desdɨ gulo, anre ax abxiaald Jesús Spíritu Santqui lo guɨchliu, pur laany niy cayac de ni caguiaat ne de ni caguindiagtɨ.

³⁴Gati Davidti bieepy yabaa, te pur laab guniib: Xtada Dios raipny Dad ni rnabee nare: “Guri lad naldí xtena,

³⁵axtquɨ chi idzɨny dxi gúna gan inabiiu lo irate de ni rdxichné liú.”

³⁶’Pur ningui, irate de bniety Israel ná par gacbeet dec Jesús ni bcuaat lo cruzy, Dios bcuabee laany gacny Dad ne Crist ni inabee dunnɨ.

³⁷Chi bindiagdeb de diidx ni gunii Bed, la nalas bziiendeb. Chiy gunabdiidxdeb Bed cun de apóstol xte Jesucrist: —¿Xa xquel idxannɨ anre?

³⁸Chiyru cuaby Bed: —Gulyialaaz pur de duld ni abaantɨ, ne gulrrubnis pur nombrɨ xte Jesucrist, par gactɨ perdón pur de xtuldtɨ. Ne ziy xquel iguaad Dios laat Spíritu Sant.

³⁹Te promesqui ná par laat ne par irate de lliintɨ, ne par irateza de ni rbez zit, par de bniety ni cuidx Xtadnɨ Dios par lagac laany.

⁴⁰Cun de diidxré ne cunru de diidx zaac, guniné Bed laadeb, raipbɨ laadeb: —Gulbicá lo de bɨny ni abnit lo Dios.

⁴¹Ziy xquel guc irate de bniety ni bcuadiag xtiidx Bed brubnisdeb. Ne dxigacqui zecti chon mily de bniety ná ni güeldilaaz Jesucrist.

⁴²Iratedeb guldípacdeb güenalddeb ne bcuadiagdeb de cos ni bseed de apóstol xte Jesucrist laadeb. Gubánydeb zacru tubylote. Gunaabdeb lo Dios ne bdxasaadeb par gudiizdeb guechtily zec ni gunabee Jesús laadeb.

⁴³Iratedeb quesentiand bdxalodeb de milagrɨ ni baany de apóstol.

⁴⁴Irate de bniety ni güeldilaaz Jesucrist tubyzi gucdeb ne gudiizdeb de cos ni gúpdeb lo saadeb.