HECHOS 2:4-44

⁴Dios Be' La'y bedjsóaḻene' yógo'tegake', na' wzó ḻáwgake' ẕcháḻjgake' diža' yoble ka', kan nak da' bneẕjw Dios Be' la'y che chégake'.

⁵Kate' ža na' wnníta'gak benne' judío ka' ḻo yež Jerusalén, benne' ka' ẕka'n ẕéngake' Dios, na' zej nžoje' yógo'te yež dot yežlyó nga.

⁶Kate' benne' zan ka' béngekle' žak žax̱ton', bdóbgake' ga na', na' gok zédgekle', dan' béngekle' ẕchaḻjgak benne' ka' žejḻé'gake' che Benne' Criston' ḻen diža' che chégake'.

⁷Yógo'tegake' béngeklen', na' bebángekle', na' wnnágake': —Le wia nga. ¿Kege benne' Galilea ka' yógo'te benne' ki ẕcháḻjgake'?

⁸¿Nakx̱kzen' ženlžo ẕcháḻjgake' x̱tíža'žo da' ẕchaḻjžo to tožo?

⁹Žo'o nga nakžo benne' yež zan, benne' zej nžoje': Gan nbab Partia, na' gan nbab Media. Gan nbab Elam, na' gan nbab Mesopotamia. Gan nbab Judea, na' gan nbab Kapadosia. Gan nbab Ponto, na' gan nbab Asia.

¹⁰Gan nbab Frijia, na' gan nbab Panfilia. Gan nbab ḻo yežlyó Ejipto. Gan nbab Áfrika, gan zoaže zi'to' gan nbab Cirene. Ḻezka' zej nnita' benne' yež Roma ka' nga. Baḻe' zej nake' benne' judío ka', na' yebaḻe' nzi' ḻo ná'gake' da' žejḻe'gak benne' judío ka' che Dios.

¹¹Ḻezka' zej nnita' benne' ka' nga, benne' zej nžoje' yežlyó Creta, na' gan nbab Arabia. Ženlžo ẕcháḻjgake' diža' che chežo, na' želzenle' žo'o da' ẕen ka' da' ben Dios, da' žóngaken ga žebán ḻáže'žo.

¹²Ka' goken, bebángekle' yógo'tegake', na' benne' zanḻe'e ka' gok zédgekle'. Belyi'e ljéžgake' toe' yetóe', na' wnnágake': —¿Biẕkzen' da' žaken?

¹³Baḻe' ben dítjgekle' benne' ka' ẕcháḻjgake' diža' yoble ka', na' wnnágake': —Želzóžele'.

¹⁴Naž Bedw wzéḻene' yechinéj benne' wbás ka' bseḻa' Benne' Criston', na' wzó ḻawe' ẕnnie' zižje, na' gože' ḻégake': —Ḻe'e, benne' ka' che gan nbab Judea, na' yógo'tele zoale ḻo yež Jerusalén nga. Da' ni žaḻa' nnézlele. Le wzé nag da' yapa' ḻe'e.

¹⁵Neto' bi ẕzóžleto' kan žéklele ḻe'e, dan' ne zoažo x̱sile, na' bi ẕzožle nitó benne' ka na'a.

¹⁶Da' ni da' žaken naken dan' wnná Joel, bennen' bchaḻje' ḻo wláz Dios ža ni'te, katen' wnné':

¹⁷Ki wnná Dios: Da' ni gaken ža ze ḻawte ža ka'. Seḻa'a Be' La'y chia'. Chejsóaḻene' yógo'te benách ka'. Ẕi'nle ka', benne' byo ka', na' no'le ka', wcháḻjgake' ḻo wlaza' neda'. Ḻe'e dáwe'gekle x̱kwide' ka' da' wḻoe'ela' ḻaw, na' benne' gole ka' nnégekle' yele.

¹⁸Kate' žin ža na' chisa' Be' La'y chia', na' chejsóaḻene' wen žin chia' ka', benne' byo ka', na' no'le ka', na' wcháḻjgake' ḻo wlaza' neda'.

¹⁹Wḻoe'ela' ḻaw ya'abá ža'le da' ka' góngaken ga yebángekle benách ka', na' ḻo yežlyó že'le wḻoe'ela' ḻaw da' ka' zej nak bian', da' ka' zej naken žen che we', na' yi', na' žen che yin'.

²⁰Choḻ wbíž, na' gak byo' x̱na kan nak žen. Ki gaken kate' za' žin ža na' Dios ba bḻoe'elen'. Gak ža na' ka da' batkle bḻe'el-len.

²¹Yelagak yógo'te benne' ka' wḻížgake' La X̱anžon' cha' chejḻé'gake' chie' Ḻe'.

²²’Le wzé nag da' ni da' žapa' ḻe'e, benne' Israel ka'. Dios na'kze wdape' Jesús, benne' Nasaret, ba la'ne, ḻawle ḻe'e. Dios bi'e Ḻe' latje bene' da' ka' žóngaken ga žebán ḻáže'žo, da' zej naken yeḻa' wak ka', na' da' ka' zej nak bian'. Yógo'te da' ki ben Dios ḻo na' Jesusen', kan ba nnézkzelele ḻe'e.

²³Ḻezka', Dios bi'e to benne' latje bdie' Jesusen' ḻo na'le. Ka' goken, kan gónekzele Dios gaken, na' kan nak da' bkweze' ža ni'te. Ḻe'ekze wẕenle Jesusen', na' bdele-ne' ḻo na'gak benne' wen da' ẕinnj ka', benne' ka' bétgake' Ḻe' katen' bdá'gake' Ḻe' ḻe'e yag kroze.

²⁴Naž Dios na'kze besbane' Jesusen', na' beslé' Ḻe' ḻo yeḻa' got, dan' bi gok ga'ne' to chi'ize ḻo yeḻa' goten'.

²⁵Kan nak da' ni, Dabí bchaḻje' ḻo wláz Dios ža ni'te kan nak che Jesusen', na' wnné': Bḻé'etezela' X̱anžon', na' wzóe' ḻawa'. Ḻe' zoe' kwita' ḻi ža, na' nox̱e' neda', nich bi gak no benne' bi da' gone' chia'.

²⁶Che ḻen bebéḻe'ela', na' ḻo yeḻa' žebél chia' beḻa'. Che ḻen wx̱én ḻaža'a Ḻe' na' zejte ža gata'.

²⁷X̱ana' Dios, nnezla' bi wka'no' neda' latje choḻ chegak benne' gat ka'. Bi go'o latje kwia yi' beḻa' žen chia'. Naka' benne' nží'ikzelo' Le'.

²⁸Bzejni'ilo' neda' kan žaḻa' gona' nich gata' yeḻa' nban da' zejlí kanne chia'. Gono' ga yebela' dan' zóaḻenkzo' neda'.

²⁹’Na'a, ljéža'do' ka'. Nak bia' got x̱a gole chežo Dabín', na' bgache'e ḻo yežw ba, na' ba chien' žen' gan zoažo na' zejte na'a ža.

³⁰Dabín' bchaḻje' ḻo wláz Dios, na' wnnezle' ben choch Dios da' bchebe ḻaže'e gone' chie', gone' ga galj Benne' Criston' ladjw ẕa'sóe' ka', na' Ḻe' nna bi'e latje che Dabín'.

³¹Bḻe'el Dabín' da' ni zga'ale, na' bchaḻje' kan bebán Benne' Criston', na' kan goken, bi bga'ne' latje choḻ chegak benne' gat ka', na' bi wžía yi' beḻa' žen chie'.

³²Dios besbane' Jesusen' ḻo yeḻa' got, na' kan gok da' ni yógo'teto' ẕzoa lito' chen.

³³Ka' goken, Dios, ḻen yeḻa' wak chie', bchise' Ḻe' ža'le gan nápeḻi'e yeḻa' wnná bia'. Na'a, Jesusen', Benne' Criston', ba bseḻe'e Dios Be' La'y ga ni, na' žaken kan bchebe ḻaže' Dios gone' ḻo na' Benne' Criston', na' Dios Be' La'y na' žone' da' ki da' ẕḻé'elele, na' žénlele.

³⁴Bi beyepe Dabín' ya'abá che Dios, san Dabí na'kzen' wnné': X̱anžo Dios gože' X̱ana': “Wžé' kwita' ḻi ža gan nak blo

³⁵kate' gonža' ga benne' ka' bi ẕḻé'egekle' Le' chawe' wzóa ẕíbgake' ḻawo' Le'.”

³⁶’Na'a, benne' Israel ka', žaḻa' nnézlele da' nakkzen. Jesús nikze, Bennen' bda'le-ne' ḻe'e yag kroze, Dios bene' ga nake' X̱anžo, na' Benne' Weslá chežo.

³⁷Kate' benne' ka' béngekle' da' ni, gok zédgekle', na' belyi'e Bedon', na' yezika' benne' wbás ka' che Jesús, Benne' Criston', na' wnnágake': —Lježto' ka', ¿nakx̱kzen' gonto'?

³⁸Naž Bedon' gože' ḻégake': —Le yeyát ḻaže', na' le yezóa nis to tole ḻo la Jesús, Benne' Criston', nich yenít ḻaw Dios doḻa' da' nbága'le, na' Dios Be' La'y, Bennen' seḻa' Dios chele, yedjsóaḻene' ḻe'e.

³⁹Da' bchebe ḻaže' Dios naken chele ḻe'e, na' chegak ẕi'nle ka', na' ḻezka' chegak yógo'te benách zi'to' ka', yógo'te benne' ka' wḻíž X̱anžo Dios ḻégake'.

⁴⁰Da' ki, na' da' zan da' ki bchaḻj Bedon', da' bzejni'ile' ḻégake' kwáselo, na' wnné': —Le gon da' gon ga yelale, na' le kwas gan zej nnita' benne' wen da' ẕinnj ka', benne' ka' nníta'gake' ža ni zoažo na'a.

⁴¹Ka' goken, benne' ka', benne' wẕí' ḻo ná'gake' da' bchaḻj Bedon', bezóagake' nis. Kate' ža na' ka chonn mil benne' ka' wzó ḻáwgake' žónḻengake' ḻégake' tẕen.

⁴²Yógo'tegake' béngake' dot da' bsédgekle benne' wbás ka' bseḻa' Benne' Criston'. Gókgake' toze toe' ḻen yetóe', na' we'j bdáwgake' tẕen da' žesá' ḻáže'žo kan got Jesusen', na' tẕen bcháḻjḻengake' Dios.

⁴³Benne' wbás ka' che Benne' Criston' béngake' da' zan da' žóngaken ga žebán ḻáže'žo, na' da' zan da' zej nak bian', san bžébegak yezika' benách ka'.

⁴⁴Yógo'te benne' ka', benne' žejḻé'gake' che Benne' Criston', gókgake' toze, na' beyóngake' toze yógo'te da' zej nape'.