Itendwa 2:4-44

⁴Boa ngabatweleigwa Uhuke jwa Chwapi, ngabatumbu kulongelanga kila mundu nikilonge chikigeni andi Uhuke jwa Chwapi apanhwotwiye.

⁵Kwenio Kuyelusalemu bakibanga Akayahudi batamanga penia, bandu bambone kwa Nnoongo, ababokelinge kila kilambo kumbengu.

⁶Apabilijoanga lilobe lyene, nkengeni nkolongwa gwa bandu nguukongana pamwe. Boa ngabaomongwa muno magambu kila mundu penia ngabajoa akaumini benia bakalongela kilonge chakwe mwene ojwajoa.

⁷Ngabajitukanga nu kuomongwa bakalenga, “Bo, bamba boa abatajoanga bakalongela yene, bandu buku Galilayaje?

⁸Iteibo twe tuboa, tajoa balonge kilonge chito tubene?

⁹Twe tuboke kukilambo cha Kupatia na bange kukilambo cha Kumedia bange kukilambo cha Kuelamia, bange kukilambo cha Masopotamia na kukilambo cha ku Yudea na kukilambo cha Kapadokia na kukilambo cha Ponto na kukilambo cha Asia,

¹⁰Kuboka kukilambo cha Fulugia na kuboke kukilambo cha Pamfilia na kuboke kukilambo cha Misili na kuboke kukilambo cha Kulibia papipi na Kulene. Bange bandu pamba akageni kuboke kukilambo cha Loma,

¹¹Akayahudi na bandu bange banga akayahudi abajingi dini ja Kiyaudi, bange kuboke kukilambo cha Kulete na bange kubeke kukilambo cha Alabia. Tuboa twenga tujoa bakalongela kukilonge chito tabene kuminhalo mikolongwa ejatei Nnoongo!”

¹²Boa ngabaomongwa nukube na mbwele kongo bakakonyananga, “Genia gabi na mana nii?”

¹³Nambu bandu bange ngabatukananga bakalenga, “Bandu benia bate kulobela!”

¹⁴Nambu Petulo ngajema pamwe na bange bala komi na jumwe ngatumbula kalengelanga bandu kulilobe lya kanonoya, “Makalongo Makayahudi na mmoa mantamanga pamba pa Yelusalemu, mpenekiange maha ganga gambakunnengela mana gakwe ganga.

¹⁵Bandu bamba balobalingeje, anda apa nhwachanga, ngoe saa tatu tango kindabi tu.

¹⁶Chenje kilebe chikipitile ngaechalenga Yoeli, nnondoli jwa Nnoongo.

¹⁷‘Nnoongo alengite chenje nga echimbakamula mumachoba ga kupela, Manajelelanga bandu boa Uhuke jwango. Ingota yinu ikinalome na ikikege, ipakulondola unhwalo gwango, ikakombo inu ipakulondola, na akananhota binu mabalota maloto.

¹⁸Uyo, ata akapakachi bango, akinalome na akikege, Manajelela Uhuke jwango machoba genia, bombe mabalondola nhwalo gwango.

¹⁹Manaya gukuomongwa kunani kamaunde ni iingi pae ja dunia. Kupakube na myai, mwoto na malyoi matopeu,

²⁰lichoba libakujeligwa lubendu, na mwei upakube nkele anda myai, tango nukuikaje lichoba lyale likolongwa lya kibumo cha Angwana.

²¹Penia, mundu jwajoa ojwapakujopa kujangatigwa kwa liina lya Angwana makomboligwa.’

²²“Mabandu ba Kuisilaeli, mpenakiange malobe ganga! Yesu jwa ku Nazaleti akiba mundu jwenio amuli jakwe jiki Nnoongo ejibonekana kwinu kundela ji ikobo nu gukuomongwa ni iingi, eyakamula Nnoongo kupete jwombe. Mangweto mmene magamanyi ganga, gambu gapitila pamba kati jinu.

²³Kuboka pitumbulaga mwene Nnoongo ngabeka kube Yesu abekigwe mumaboko ginu, na mangweto ngamankoma kwa kalekelanga bandu akabaja bammambe panchalaba.

²⁴Nambu Nnoongo nganhyoya kuboka kwa abawile, ngammeka agabwa kuboke mumakakala ga kiu, magambu kabi iwechakineje kiu kintabe.

²⁵Gambu Daudi akalenga minhalo ja jwenio Yesu kulenga, ‘Nganabona Angwana nnongi jango kila kingobu, babi papipi nane, na ne nagaje.

²⁶Na kuyene mwojo gwango ngualalila, kabe malobe gango nganonge kukuala mwojo. Mmele gwango mautama mukuhyobalela, mambomalela kukuhyobalela,

²⁷magambu mulekaje mwojo gwango kumambi, wala kunneka mmanda jwinu jwa chwapi abole kulikabuli.

²⁸Unaite ndela ja bwomi, kube kwinu kumekite kube kuala mwojo.’

²⁹“Makalongo bango, nanengalanga kipola nhwalo gwa Nngwana Daudi anhokabito. Bombe ngabawe na ngabachikwa, kabe ndunda yabe ibi pamba upamba pito mpaka lele.

³⁰Kwa nyenie akiba Nnondoli, na ngamanya goa Nnoongo atekunnapila, kutenda apakumpambu jumwe kati ji kibelei chakwe nu kummeka pikitebu chakwe chutawala.

³¹Daudi ngajibona minhalo ejapakamu Nnoongo nnongi, ku yene ngalenga nhwalo gwa kuyoka kwa Kilisto kingobu echalenga, ‘Bannekiteje kumambi, mmele gwakwe uboliteje mulikabuli.’

³²Nnoongo ngannyoya Yesu kuboka kumambi na twe tuboa takachaili ba kunhwalo gwenio.

³³Yesu ngajinuligwa kunani nu kummeka kingonu chakalelo ja Nnoongo Awamundu, ngapokela Uhuke jwa Chwapi kuboka ka Awamundu anda apabalagila. Penia ngatujela Uhuke jwenio ngachenie echimikibona nu kukijoa ngoe.

³⁴Mana Daudi ajabwije mpaka kumbengu, nambu jwombe ngalenga, ‘Angwana ngabalengela Angwana bango, Ntame kingono chango cha kalelo

³⁵mpaka nabekange akangondwa binu pae ja makongono ginu.’

³⁶“Bandu boa ba Isilaeli, bapaligwa, kumanya kweli kube Yesu, jwenio ojwa mammambangite, nga jwenio Nnoongo ammekite abe Nngwana na Kilisto Nkomboi ojwapambuligwe na Nnoongo!”

³⁷Bandu apabajoanga genia, ngajabinia myojo ngabankonya Petulo na achandundame ajakwe bala, “Akalonga bito, tutenda bole?”

³⁸Petulo ngajanga, “Kila mundu kati jinu alape mabaja gakwe na abatichigwe kuliina lya Yesu Kilisto, na Nnoongo mannekekea mabaja ginu, na mangweto mampokele lilagano lya Nnoongo lya Uhuke jwa Chwapi.

³⁹Gambu lilagano lyale lyakiba magambu jinu na ingota inu nu kuboa abatamanga kutaali na magambu ga kila mundu ojwa apaukemigwa na Angwana ana Nnoongo bito.”

⁴⁰Petulo ngabakwajilila kulenga gange ndu, akalenga, “Mikikombolange kuboka muhukumu ejiika mulungolo londo lubaja.”

⁴¹Bandu ajingi abajoininge nhwalo gwakwe ngabajeketela ngababatichigwa, na bandu elufu tatu ngabajonjekeka munkenga gwenio lichoba lyene.

⁴²Bamba boa ngabajendekea kukibola kuboka kwa achandundame, kutama pamwe kiulongo, kulye pamwe na kugongalela pamwe.

⁴³Iingi yi ikobo nu gukuomongwa majingi ngagakamuligwa kukupetela achandundame penia kila mundu ngabe na mbwele.

⁴⁴Abunhwamine boa ngabajendekea kutama pamwe na ilebe yabe ngababagana na ilebe yabe.