Menge Ininang 28:3-23

³Nengimon si Pablo te kayo itabon. Pegsawol din diyà te apoy, dimelog se memokan tandà te keinit, aw tinongkà se belad din.

⁴Pegkità te menge tege Malta te memokan diyà te belad din, migpebelaw-belaway dan, kagi dan, “Sikandin besi se metibonò. Pengkey wedà sikandin kematay doton te dagat, meneng dini te tanà matay sikandin, so yan se pelumun te salà din.”

⁵Meneng impilik i Pablo se memokan doton te apoy aw wedà palos elegi.

⁶Migtagad se menge doma otaw te lomebag se belad din aw penga niyan matay. Pegkenamay-namay te wedà sikandin kemeno, yan nealin se aneng-aneng dan, aw minikagi dan te sikandin se sebad timanem.

⁷Doen dakel tanà medapag kidoen tinig-apò te datò te polò sìyan si Publio. Neidowan aw sinagman kay din te telo se delem.

⁸Nesekitan se amay din piglegenaw aw mig-indes. Dimoton si Pablo kandin aw migtawal-tawal diyà te Timanem. Nemaed si Pablo kandin, aw yan negolian se temoay.

⁹Pegketaga-taga te menge doma otaw, kimidoen se kedita dan doen mesakit, aw negolian dan heman.

¹⁰Dakel se imbowang dan kenami. Pegsakay day te doma pangkò lekat kidoen, inlolan dan se kedita te keilangan day.

¹¹Penga te telo se bolan, nesayo kay simakay te sebad pangkò lekat te Alejandriya ngadan din Pingin Timanem tapay impondo kidoen te Malta dalem te eked pekelowà.

¹²Pegdateng day doton te Sirakusa, mig-ogpà kay doton te telo se delem.

¹³Lekat te Sirakusa, dimeleg kay doton te Regyo. Keeldawan niyan, doen ebagat aw nesayo kay pesalo doton te Putiyoli. Dimateng kay kidoen te iketelo te aldaw.

¹⁴Netelaan day se menge otaw egpemenal kidoen te Putiyoli. Nemoyò dan te meg-ogpà kay kidoen kandan te sebad simana. Penga niyan, minipanaw kay pesalo doton te Roma.

¹⁵Doen menge otaw egpemenal kidoen te Roma. Pegketaga-taga dan te dimateng kay, doen simongon kenami doton te Foro i Apyo, aw doen menge doma simongon kenami doton te lonsod iningedanan Telo Bentokanan. Pegkità i Pablo kandan, migpesiontong sikandin diyà te Timanem, aw neluba se pedowan din.

¹⁶Pegdateng day doton te Roma, wedà kelebosowi si Pablo, meneng impeogpà doton te sebad balay tinonggoan te sondalo.

¹⁷Penga te telo se delem, pigtipon i Pablo se menge melangkaw Judiyo. Pegketipon dan, minikagi si Pablo, “Menge kedowa ko, pengkey wedad salà ko diyà te menge doma tadon Judiyo, aw diyà te ketanem te kemonaan tadon, meneng dinakep a dan doton te Jerusalem, aw in-ated a diyà te belad te gobirno te Roma.

¹⁸Peg-osay dan kanak, ibeg dan ipelowà a dan peden, so wedad salà ko mepakay ipelumun aw iimatay kanak.

¹⁹Meneng doen menge doma Judiyo migsagda kandan. Doun niyan, pinemoyò ko te si Cesar se meg-osay kanak. Meneng wedà a keopal diyà te menge Judiyo, so siaken heman se sebad Judiyo.

²⁰Yan se doun te pigtipon ko sikiyo, amon megkità kidon aw megpebelaw-belaway. Iniketan a pa te sengkalì seini so pinemenalan ko sikandin egpelimanan tadon menge bowad-bowad i Israel.”

²¹Minikagi dan, “Wedad solat dimateng kenami lekat te menge Judiyo tepad kamno. Wedad heman otaw dimini amon meg-indan kenami te medaet ka otaw.

²²Meneng netegahan day olò te doen ekon otaw doton te kedita te doma lonsod neopal diyà te menge otaw egpemenal. Yan ibeg day menenalan te kamno kagi.”

²³Penga niyan, pinemallì dan se aldaw aw kano dan ketipon. Pegdateng te aldaw sìyan, ontò medita se otaw netipon doton te balay inogpaan din. Lekat te iselem lamig te meapon, migtoladà si Pablo kandan. Mig-indan sikandin kandan tepad te peglowan te Timanem, aw miglebad-lebad sikandin te punù ingkeliwat i Moises aw insolat te menge doma telekeliwat te kagi te Timanem amon memenal se otaw ki Jesus.