تَرُشُي 28:3-23

³ثْلُ تٌ بٌلٍيٍ مَتٌنفٌ سَقٍ تّ عِ، بْشِمَسٍ نَشَ مِنِ نَ تّ وُيٍنيِ شَ قٍ رَ، عَ نَشَ عَ بّلّشّ شِن.

⁴مَلِتَكَيٍ تٌ بْشِمَسٍ تٌ، عَ بَرَ عَ بّلّشّ شِن عَ سِنفَنشِ عَ رَ، عٍ نَشَ عَ قَلَ عٍ بٌرٍ بّ، «نْندِ رَ، نِبَ نَن يِ مِشِ رَ، بَرِ مَ هَاكّ مُ تِنشِ عَ شَ بَلٌ، هَلِ عَ تٌ تَنفَشِ بَا مَ.»

⁵ثْلُ نَشَ بْشِمَسٍ رَلِسَن تّ، سٍسٍ مُ عَ تٌ.

⁶نَ مِشِيٍ نُ مَمّ تِقٍ نّ عَ شِندٍ شَ قُنتُ، شَ نَ مُ عَ رَ عَ شَ قَشَ كٍرٍن نَ، كْنْ سٍسٍ مُ عَ تٌ. عٍ تٌ مَمّ تِ، عٍ نَشَ عٍ شَ مَحْشُنيِ مَسَرَ. عٍ نَشَ عَ قَلَ عَلَ ندٍ نَن عَ رَ.

⁷سُرِ كُنتِفِ شُنفبٍ، نَشَن شِلِ ثُبِلِيُ، نَشَ مُشُ يِفِيَ عَ قَنيِ رَ عَ شْنيِ شِ سَشَن بُن مَ.

⁸ثُبِلِيُ بَبَ نُ سَشِ، عَ قُرَشِ، مَنفَقَشّ نُ نَ عَ مَ. ثْلُ تٌ عَ مَكْرّ عَ رَ، عَ نَشَ عَ بّلّشّ سَ عَ مَ، عَ عَلَ مَشَندِ، عَ نَشَ عَ رَيَلَن.

⁹نَ شَنبِ، سُرِ قُرٍ مَ فبّتّيٍ نَشَ قَ، ثْلُ نَشَ عٍ قَن نَيَلَن.

¹⁰عٍ نَشَ مُشُ بِنيَ عَ قَنيِ رَ. مُشُ تٌ كٍلِ سِفَدٍ، عٍ نَشَ قَندّ قِ مُشُ مَ.

¹¹مُشُ تٌ كِكٍ سَشَن نَدَنفِ نَا، مُشُ نَشَ بَكِ كُنكُي كُي، نَشَن كٍلِ عَلٍسَندِرٍ. عَ نُ بَرَ حّمّ رَدَنفِ سُرِ مَ. تْنشُمَ نُ عَ مَ نَشَن قِندِشِ كُيٍ مَسٌلِشِ قِرِنيِ رَ.

¹²مُشُ تٌ سٌ كِلْن سِرَكُسِ، مُشُ نَشَ لُ نَا شِ سَشَن.

¹³مُشُ تٌ كٍلِ نَا، مُشُ نَشَ سِفَ رٍفِيٌ بَا دّ رَ. قٌيٍ تٌ كٍلِ يِرٍقَنيِ مَ نَ كُيٍ عِبَ، مُشُ نَشَ شِ قِرِن حّرّ رَبَ هَن ثُسٌلِ.

¹⁴مُشُ نَشَ نفَشَكٍرٍنيِيٍ لِ نَا نَشٍيٍ مُشُ مَيَندِ شِ سٌلٌقٍرٍ رَدَنفِقٍ رَ عٍ شْنيِ. نَ تّمُي مُشُ سِفَ نّ هَن رْ مَ.

¹⁵مُشُ نفَشَكٍرٍنيِ رْ مَكَيٍ، نَشٍيٍ مُشُ شَ قٍ مّ، عٍ نَشَ قَ مُشُ رَلَندٍ، كٍلِ رْ مَ هَن عَثِيُسِ مَلَن يِرٍ نُن تَا نَشَن شِلِ بَنشِ سَشَنيِيٍ. ثْلُ تٌ عٍ تٌ عَ نَشَ عَلَ نُوَلِ سَ، عَ نَشَ لِمَنِيَ.

¹⁶مُشُ تٌ سٌ رْ مَ، سْورِ مِشِ كّمّ شُنمَتِ نَشَ فٍيلِمَنِيٍ سٌ مَنفّ يِ رَ، كْنْ عَ نَشَ ثْلُ لُ عَ كٍرٍنيِ مَ، عَ نُن سْورِ كٍرٍن نَشَن عَ كَنتَمَ.

¹⁷شِ سَشَن تٌ دَنفِ، ثْلُ نَشَ يُوِقِ كُنتِفِيٍ شِلِ. عٍ تٌ مَلَن، عَ نَشَ يِ وْيّنيِ تِ عٍ بّ، «ﭑ نفَشَكٍرٍنيِيٍ، هَلِ ﭑ تٌ مُ قٍقٍ رَبَشِ وٌن مَ مِشِيٍ رَ، نُن وٌن بٍنبَيٍ شَ نَامُنيِيٍ رَ، يُوِقِيٍ بَرَ ﭑ سَ فٍيلِ كُي دَرِ سَلَمُ، نَ شَنبِ عٍ مَن قَ ﭑ سٌ رْ مَكَيٍ يِ رَ.

¹⁸عٍ تٌ فّ ﭑ مَشْرِندٍ، عٍ نُ وَ مَ ﭑ نَبٌلٌقٍ نّ، بَرِ مَ عٍ مُ سٍسٍ تٌشِ ﭑ قَشَمَ نَشَن مَ.

¹⁹كْنْ يُوِقِيٍ مُ تِن. نَ مَ، ﭑ نَشَ مَنفّ شُنفبٍ شَ كِيتِ مَشَندِ، كْنْ ﭑ مُ وَ ﭑ بْنسْي نَن كَلَمُقٍ.

²⁰نَ نَ عَ رَ، ﭑ نَشَ وَ وٌ تٌقٍ عَلَكٌ ﭑ شَ وْيّن وٌ رَ، بَرِ مَ عِسِرَيِلَكَيٍ شَشِلِ تِشِ شّيرَ نَشَن نَ، نَ شَ قٍ نَن عَ تٌشِ عٍ يِ يْلْنشْنيِ سَشِ ﭑ مَ.»

²¹عٍ نَشَ عَ يَابِ، «مُشُ مُ بَتَاشّ يٌ سْتْشِ عِ شَ قٍ رَ كٍلِ يُدَيَ. وٌن نفَشَكٍرٍنيِ يٌ مُ قَشِ قٍ حَاشِ قَلَدٍ عِ شَ قٍ رَ.

²²كْنْ، مُشُ وَ مَ عَ كٌلٌنقٍ نّ عِ نَشَن مَحْشُنشِ، بَرِ مَ مُشُ عَ كٌلٌن عٍ يِ دِينّ شَ قٍ عِبَشَنتِنمَ يِرٍ بِرِن.»

²³ثْلُ نَشَ لْشْي كٍرٍن سٌ عٍ يِ. مِشِ وُيَشِ تٌ قَ عَ شْنيِ، ثْلُ نَشَ عَلَ شَ مَنفّيَ سٍيدٍحْشْيَ بَ. عَ نَشَ عِسَ شَ قٍ مَسٍن عٍ بّ تَوُرٍتَ مُنسَ نُن نَمِحْنمّيٍ شَ كِتَابُي سَابُي رَ كٍلِ فّيسّفّ هَن نُنمَرٍ.